ស្នងការនគរបាលខេត្តកំពង់ធំ ណែនាំ​ដល់កងកម្លាំង​គ្រប់​ផ្នែកត្រៀម​​កិច្ច​អន្តរាគមន៍​ដល់​ប្រជា​ពលរដ្ឋ​ក្នុង​ករណី​មាន​ទឹកជំនន់​កើនឡើងខ្ពស់

កំពង់ធំ៖ នៅថ្ងៃទី២៧ ខែកញ្ញា ឆ្នាំ២០២៦ លោកឧត្តមសេនីយ៍ទោ ហេង សុផល ស្នង​ការ​នគរបាល​ខេត្ត ដឹកនាំកងកម្លាំងចុះត្រួតពិនិត្យស្ថានភាពជំនន់ទឹកភ្លៀង នៅក្នុងភូមិសាស្ត្រ​ស្រុក​ស្ទោង ​ដើម្បីតាមដានស្ថានភាពទឹក និងត្រៀមលក្ខណៈអន្តរាគមន៍ ជួយប្រជាពលរដ្ឋ​ដែល​អាច​រង​ផល​ប៉ះពាល់។

ក្នុងឱកាសនោះ លោកឧត្តមសេនីយ៍ទោ លើកឡើងថា ក្នុងរយៈពេលប៉ុន្មាន​ថ្ងៃ​កន្លង​មក​ព្រះរាជាណាចក្រកម្ពុជាបានទទួលរងឥទ្ធិពលប្រព័ន្ធសម្ពាធទាប បង្ករឱ្យមាន​ខ្យល់​កន្ត្រាក់​ និងភ្លៀងធ្លាក់ជាបន្តបន្ទាប់ ដែលបានធ្វើឱ្យ​តំបន់​មួយ​ចំនួន​រង​ការ​កើន​ឡើងនៃ​ជំនន់​ទឹក​ភ្លៀង និងរងផលប៉ះពាល់ដល់អគាររដ្ឋបាល ទីកន្លែងសម្រាប់មន្ត្រី បំពេញភារកិច្ច ហេដ្ឋា​រចនា​សម្ព័ន្ធ ​ផ្ទះសម្បែង និងដំណាំរបស់បងប្អូនប្រជាពលរដ្ឋ ក្នុងនោះ តំបន់មួយចំនួន​ក្នុង​ភូមិសាស្ត្រ​ខេត្តកំពង់ធំ ក៏បានរងផលប៉ះពាល់ផងដែរ។ លោកស្នងការ ណែនាំដល់លោកអធិការនគរបាល ក្រុង ស្រុក និងកងកម្លាំងពាក់ព័ន្ធ ត្រូវបង្កើនការយកចិត្តទុកដាក់ និងចាត់វិធានការចាំបាច់ ដោយ​ត្រូវ​សហការជាមួយអាជ្ញាធរ និងសមត្ថកិច្ចពាក់ព័ន្ធ ចុះពិនិត្យប្រព័ន្ធប្រឡាយ ដើម្បីរំដោះទឹក ព្រម​ទាំង​ស្វែងរក និងរៀបចំទីទួលសុវត្ថិភាព សម្រាប់ប្រជាពលរដ្ឋ​ក្នុង​ករណី​មាន​ការ​ជម្លៀស​ជា​បន្ទាន់​។ ជាមួយគ្នានេះ កងកម្លាំងត្រូវចុះផ្សព្វផ្សាយ ជូនដំណឹងដល់​ប្រជាពលរដ្ឋ​ដែល​រស់​នៅ​តាម​តំបន់​មាត់​ទន្លេ ស្ទឹង បឹងបួរ ព្រែក និងអូរ ឱ្យបង្កើនការប្រុងប្រយ័ត្នចំពោះសុវត្ថិភាពអាយុជីវិតមនុស្ស សត្វ និងទ្រព្យសម្បត្តិ ព្រមទាំង​ប្រយ័ត្ន​ចំពោះ​សត្វ​អសិរពិស​ដែល​អាច​បង្ក​គ្រោះ​ថ្នាក់​ក្នុង​ពេល​មាន​ទឹកជំនន់។ ចំពោះទីតាំងអាជីវកម្មចម្លងផ្សេងៗ ត្រូវធ្វើការ​អប់រំ​ណែនាំ​ដល់​ម្ចាស់​អាជីវកម្ម​ឱ្យ​គោរព​វិធាន​សុវត្ថិភាព ដោយចៀសវាងការផ្ទុកមនុស្ស សត្វ និងទ្រព្យសម្បត្តិលើសទម្ងន់ ដែលអាច​បង្ក​ហានិភ័យ​ដល់​អាយុជីវិត។ លោកស្នងការ បានសង្កត់ធ្ងន់ឱ្យកងកម្លាំង​បន្ត​តាម​ដាន​ស្ថាន​ភាព​ទឹក​នៅ​តាម​ស្ទឹង បឹង និងទន្លេជាប្រចាំ ដើម្បីមានព័ត៌មានទាន់ពេលវេលា និងអាចចាត់វិធាន​ការ​ជួយ​សង្គ្រោះ ឬជម្លៀសប្រជាពលរដ្ឋទៅកាន់ទីទួលមានសុវត្ថិភាពបានទាន់ពេលវេលា ក្នុងករណី​ស្ថាន​ភាព​ទឹក​មានការកើនឡើង ។ ហើយកងកម្លាំង នៃអធិការដ្ឋាននគរបាល ក្រុងស្រុក ទាំងអស់​ត្រូវ​ត្រៀម​លក្ខណៈជាស្រេច ដោយប្រើប្រាស់កម្លាំង និងមធ្យោបាយសរុប សម្រាប់ធ្វើអន្តរាគមន៍ និង​សង្គ្រោះ​ប្រជាពលរដ្ឋនៅពេលមានហេតុការណ៍ជាយថាហេតុ៕