កម្លាំងនគរបាលត្រៀមលក្ខណៈរួចរាល់ការពារសន្តិសុខក្នុងដំណើការពិនិត្យបញ្ជីឈ្មោះ និង​ចុះ​ឈ្មោះបោះឆ្នោត

ស្នងការនគរបាលជាតិ បានត្រៀមលក្ខណៈរួចរាល់ ការពារសន្តិសុខ សណ្តាប់ធ្នាប់ របៀប​រៀប​រយ និងមានសុវត្ថិភាព ក្នុងដំណើរពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៦ ដែល​នឹង​ប្រព្រឹត្តិទៅចាប់ពីថ្ងៃទី៧ ខែតុលា ដល់ថ្ងៃទី៣០ ខែវិច្ឆិកា ឆ្នាំ២០២៦។

ឧត្តមសេនីយ៍ទោ កង បូផា អនុប្រធានសេនាធិការដ្ឋាន នៃអគ្គស្នងការនគរបាលជាតិ នៅ​ព្រឹក​ថ្ងៃ​ទី​២៨ ខែកញ្ញា ឆ្នាំ២០២៦នេះ បានផ្តល់បទសម្ភាសជាមួយBTVថា អគ្គស្នងការនគរបាលជាតិ បាន​រៀប​ចំ​កងកម្លាំងនគរបាលរួចរាល់នៅទូទាំងប្រទេសកម្ពុជា ក្នុងនោះនៅប៉ុស្តិ៍​នគរបាល​ជាង ១ពាន់​៦រយ និងអធិការដ្ឋានស្រុក/ខណ្ឌចំនួនជាង២០០ ដើម្បីធានាការពារសន្តិសុខសណ្តាប់ ក្នុង​ដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៦។ ការថ្លែងយ៉ាងដូច្នេះ ធ្វើ​ក្នុង​ពេលឧត្តមសេនីយ៍ទោ កង បូផា បាន​អញ្ជើញ​ចូលរួម​ក្នុង​កិច្ច​ប្រជុំ​ផ្សព្វ​ផ្សាយ​ជាមួយ​ភាគី​ពាក់ព័ន្ធ ការងារសន្តិសុខ សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ការចុះ​ឈ្មោះ​ភ្នាក់​ងារ​គណបក្សនយោបាយ និងសភាពការណ៍ទូទៅ មុនចាប់ផ្តើមដំណើការ នៃការ​ពិនិត្យ​​បញ្ជី​ឈ្មោះ ​និងការចុះឈ្មោះបោះឆ្នោត ដែលរៀបចំដោយ គ.ជ.ប ក្រោមអធិបតីភាព ឯកឧត្តម សោម សូរីដា សមាជិក គ.ជ.ប ស្ថិតនៅទីស្តីការ គ.ជ.ប រាជធានីភ្នំពេញ។

នៅក្នុងកិច្ចសម្ភាសជាមួយ BTV ឧត្តមសេនីយ៍ទោ កង បូផា បន្តថា ការពិនិត្យបញ្ជីឈ្មោះ និង​ចុះ​ឈ្មោះ​បោះ​ឆ្នោត​ឆ្នាំ២០២៦ គឺមានសារៈសំខាន់​ណាស់​សម្រាប់​ពលរដ្ឋ​មាន​សិទ្ធិ​គ្រប់​គ្រាន់​ក្នុង​ការ​បោះ​ឆ្នោត​ជ្រើស​ក្រុមប្រឹក្សាឃុំសង្កាត់ នៅឆ្នាំ២០២៧ខាងមុខនេះ ដូច្នេះហើយខ្ញុំសូម​អំពាវ​នាវ​ដល់​ប្រជាពលរដ្ឋទៅពិនិត្យបញ្ជីឈ្មោះ និងពលរដ្ឋមានអាយុ១៨ឆ្នាំឡើង មិនទាន់​មាន​ឈ្មោះ​ក្នុង​បញ្ជី​បោះ​ឆ្នោត សូមទៅចុះឈ្មោះបោះឆ្នោត ក្នុងករណីពលរដ្ឋ​ខ្មែរ​មិន​ទាន់​មាន​អត្ត​សញ្ញាណ​ប័ណ្ណ​សញ្ជាតិ​ខ្មែរ ដែលជាឯកសារដ៏សំខាន់មួយសម្រាប់ទៅចុះឈ្មោះបោះឆ្នោត គឺពលរដ្ឋ​អាច​ទៅ​ធ្វើ​នៅ​ប៉ុស្តិ៍នគរបាល តាមឃុំ សង្កាត់ និងអធិការដ្ឋានស្រុក/ខណ្ឌជាដើម។

ឯកឧត្តម សោម សូរីដា សមាជិក គ.ជ.ប បានថ្លែងថា រាជរដ្ឋាភិបាល នីតិកាលទី៧ នៃ​រដ្ឋសភា​បាន​សម្រេច​បង្កើតគណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោត ថ្នាក់ជាតិ និង​ថ្នាក់​ក្រោម​ជាតិ ហៅកាត់ «គ.ស.អ» ជាសេនាធិការ ដើម្បីបញ្ជាដឹកនាំកិច្ចការពារ ការពិនិត្យ​បញ្ជី​ឈ្មោះ និងការចុះឈ្មោះបោះឆ្នោតប្រចាំឆ្នាំ និងការបោះឆ្នោតថ្នាក់ជាតិ និងថ្នាក់ក្រោមជាតិ គ្រប់នីតិកាល និងអាណត្តិ ឱ្យប្រព្រឹត្តទៅប្រកបដោយសន្តិសុខ មានសណ្តាប់ធ្នាប់ របៀបរៀបរយ និងមានសុវត្ថិភាព គ្មានការភ័យខ្លាច គ្មានការបំភិតបំភ័យ គ្មានការគំរាមកំហែង និងគ្មានអំពើហិង្សាផ្សេងៗ។ សមាសភាពនៃ គ.ស.អ រួមមាន រដ្ឋមន្ត្រីក្រសួងមហាផ្ទៃជាប្រធាន អនុប្រធានចំនួន ៤រូប ដែលជារដ្ឋមន្ត្រីក្រសួងការពារជាតិ ក្រសួងសេដ្ឋកិច្ច និងហិរញ្ញវត្ថុ ក្រសួងការបរទេស និងសហប្រតិបត្តិការអន្តរជាតិ ក្រសួងយុត្តិធម៌ និងមានសមាជិកជាច្រើនរូបដែលជាថ្នាក់ដឹកនាំនៃក្រសួង ស្ថាប័ន អង្គភាពពាក់ព័ន្ធ រួមទាំងអភិបាល នៃគណៈអភិបាលរាជធានី ខេត្ត និងជាប្រធានគណៈបញ្ជាការឯកភាពរដ្ឋបាលរាជធានី ខេត្ត ជាសមាជិកផងដែរ។

គួរបញ្ជាក់ដែរថា ការពិនិត្យបញ្ជីឈ្មោះ និងការចុះឈ្មោះបោះឆ្នោត នៅតាមឃុំ/សង្កាត់ ទូទាំងប្រទេសកម្ពុជា មានរយៈពេល៥៥ថ្ងៃ ដោយចាប់ផ្តើមពីថ្ងៃទី០៧ ខែតុលា រហូតដល់ថ្ងៃទី៣០ខែវិច្ឆិកា ឆ្នាំ២០២៦។ ការបិទផ្សាយបញ្ជីបោះឆ្នោតផ្លូវការឆ្នាំ២០២៥ មានគោលបំណងឱ្យប្រជាពលរដ្ឋដែលមានឈ្មោះក្នុងបញ្ជីបោះឆ្នោត មកពិនិត្យ និងផ្ទៀងផ្ទាត់ឈ្មោះ និងទិន្នន័យរបស់ខ្លួនឡើងវិញ។ ប្រសិន​បើទិ​ន្នន័យ​ក្នុង​ប​ញ្ជី​បោះ​ឆ្នោត​មិន​ត្រឹម​ត្រូវ​តាម​ទិន្នន័យក្នុងអត្តសញ្ញាណបណ្ណសញ្ជាតិខ្មែរដែលមានសុពលភាព សាមីខ្លួន​អាច​ស្នើ​សុំ​កែ​តម្រូវទិន្នន័យជីវប្រវត្តិ ឬអាចប្តូរការិយាល័យបោះឆ្នោតក្នុងឃុំ សង្កាត់ ឬផ្លាស់ប្តូរឯក​សារ​ចុះ​ឈ្មោះ​បោះឆ្នោ​តចំពោះអ្នកចុះឈ្មោះបោះឆ្នោតក្នុងឆ្នាំ២០១៦ និងឆ្នាំ២០១៧ ដែលមិនធ្លាប់​បាន​ធ្វើ​បច្ចុប្បន្ន​ភាពទិន្នន័យជីវមាត្រ។ រីឯពលរដ្ឋដែល​មាន​អាយុ​១៨​ឆ្នាំ​ឡើង ​មិនមានឈ្មោះ​ក្នុ​ង​ប​ញ្ជី​បោះ​ឆ្នោត ​អាចទៅចុះឈ្មោះ​នៅ​តាម​ឃុំ​/សង្កាត់​ក្នុង​មូលដ្ឋាន​រស់​នៅ ​ដោយភ្ជាប់ទៅជាមួយអត្ត​សញ្ញាណ​​បណ្ណ​សញ្ជាតិ​ខ្មែរ​ដែល​មាន​សុពលភាព ឬឯកសារ​បញ្ជាក់​​អត្ត​សញ្ញាណ​បម្រើ​ឲ្យ​ការ​ចុះ​ឈ្មោះ​បោះឆ្នោត៕ អត្ថបទ៖ទូច សោភ័ណ