មន្ទីរពេទ្យបង្អែកស្រុកអង្គរជុំ ក្នុងខេត្តសៀមរាប បានបើកដំណើរការវិញហើយ ក្រោយទឹកស្រកអស់

សៀមរាប៖ ប្រធានមន្ទីរពេទ្យបង្អែកស្រុកអង្គរជុំ ខេត្ដសៀមរាប បានឱ្យដឹងនៅរសៀលថ្ងៃទី២៩ ខែកញ្ញា នេះថា ជំនន់ទឹកភ្លៀងដែលលិចមន្ទីរពេទ្យទាំងស្រុងរយៈ៤ថ្ងៃ បានស្រកវិញអស់ហើយ និងបានបើកដំណើរការទទួលព្យាបាលអ្នកជំងឺឡើងវិញដែរនៅថ្ងៃនេះ។

លោក យីញ គៀម បានបន្ដថា ជំនន់ទឹកភ្លៀងនេះ បានស្រកទៅវិញកាលពីល្ងាចថ្ងៃទី២៨ ក្រុមគ្រូពេទ្យបានបោសម្អាត និងនាំយកសម្ភារៈបរិក្ខាពេទ្យ ដែលបានជម្លៀសចេញពីទឹកជំនន់នោះ ទៅទុកក្នុងអគារមន្ទីរពេទ្យរួចរាល់ហើយ។

លោកបានថ្លែងអំណរគុណដល់កងម្លាំងសមត្ថកិច្ចអាជ្ញាធរគ្រប់លំដាប់ថ្នាក់ ដែលបានជួយជ្រោម ជ្រែងជួយក្រុមគ្រូពេទ្យ ទាំងការជម្លៀសអ្នកជំងឺចេញពីមន្ទីរពេទ្យ និងសម្ភារៈបរិក្ខាពេទ្យទាន់ពេលវេលាក្នុងអំឡុងពេលទឹកជំនន់កន្លងមកនេះ។

លោកបានបញ្ជាក់ថា មកដល់ពេលនេះ មន្ទីរពេទ្យបង្អែក បានពិគ្រោះជំងឺក្រៅមនុស្សធំ ២៥នាក់ កុមារ៥នាក់ និងសម្រាកពេទ្យ៥នាក់។

លោកប្រធានមន្ទីរពេទ្យបង្អែកស្រុកអង្គរជុំ ខេត្ដសៀមរាប បានឱ្យដឹងថា ក្នុងរយៈពេលជំនន់ទឹកភ្លៀងលិចមន្ទីរពេទ្យ មានអ្នកជំងឺប្រមាណជាង៦០នាក់ ត្រូវបានជម្លៀសចេញពីមន្ទីរពេទ្យ ទៅរកទីទួលសុវត្ថិភាព ខណៈដែលជំនន់ទឹកភ្លៀងបានជន់លិចមន្ទីរពេទ្យបង្អែកធ្ងន់ធ្ងរ ចាប់ពីល្ងាចថ្ងៃទី២៥ ខែកញ្ញា ឆ្នាំ២០២៦នេះ។

លោកបន្ដថា អ្នកជំងឺចំនួន៦៤នាក់ ត្រូវបានជម្លៀសចេញទៅកាន់មណ្ឌលសុខភាពចារឈូក ឃុំចារឈូក និងមន្ទីរពេទ្យបង្អែកនៅស្រុកពួក ព្រមទាំងមន្ទីរពេទ្យបង្អែកខេត្ដសៀមរាប។ ជំនន់ទឹកភ្លៀងនេះ បណ្ដាលមកពីទឹកហូរខ្លាំងពីខាងជួរភ្នំ ធ្លាក់មកដល់ស្រុកអង្គជុំ ទើបធ្វើឱ្យជន់មន្ទីរពេទ្យបង្អែក លើសពីឆ្នាំមុនៗ៕