​តំណាងអចិន្ត្រៃយ៍កម្ពុជា ប្រចាំ UN ស្នើអ្នករាយការណ៍ពិសេសស្តីពីស្ថានភាពសិទ្ធិមនុស្សបន្តយកចិត្តទុកដាក់ចំពោះប្រជាជនភៀសសឹកកម្ពុជា និងការវិលត្រឡប់ទៅកាន់លំនៅឋានវិញដោយសុវត្ថិភាព និងសេចក្តីថ្លៃថ្នូរ

(ទីក្រុងហ្សឺណែវ) នៅថ្ងៃទី៣០ ខែកញ្ញា ឆ្នាំ២០២៦ – ឯកឧត្តម កែ សុវណ្ណ ឯកអគ្គរាជទូត និងជាតំណាងអចិន្ត្រៃយ៍នៃព្រះរាជាណាចក្រកម្ពុជា ប្រចាំការិយាល័យអង្គការសហប្រជាជាតិ និងអង្គការអន្តរជាតិនានា នៅទីក្រុងហ្សឺណែវ បានជួបប្រជុំជាមួយលោក Thomas Andrews អ្នករាយការណ៍ពិសេស ស្តីពីស្ថានភាពសិទ្ធិមនុស្សនៅកម្ពុជា។

ក្នុងជំនួបនោះ ឯកឧត្តមឯកអគ្គរាជទូត កែ សុវណ្ណ បានជម្រាបជូនអំពីប្រវត្តិសាស្ត្រ និងបរិបទជាតិកម្ពុជា ដោយបានគូសបញ្ជាក់អំពីបទពិសោធន៍នៃជម្លោះជាច្រើនទសវត្សរ៍ ដែលធ្វើឱ្យកម្ពុជាយកចិត្តទុកដាក់ខ្លាំងចំពោះសន្តិភាព សន្តិសុខ ស្ថិរភាព ការអភិវឌ្ឍ ព្រមទាំងសុខុមាលភាព និងសិទ្ធិមនុស្សរបស់ប្រជាពលរដ្ឋកម្ពុជា។

ភាគីទាំងពីរ បានផ្លាស់ប្តូរទស្សនៈគ្នាលើស្ថានភាពនៅតាមបណ្តោយព្រំដែនកម្ពុជា-ថៃ ដោយ ឯកឧត្តមឯកអគ្គរាជទូត បានស្នើឱ្យមានការបន្តយកចិត្តទុកដាក់ចំពោះសិទ្ធិមនុស្សរបស់ប្រជាជនភៀសសឹកកម្ពុជា និងការវិលត្រឡប់ទៅកាន់លំនៅឋានវិញដោយសុវត្ថិភាព និងសេចក្តីថ្លៃថ្នូរ។

ភាគីទាំងពីរ ក៏បានពិភាក្សាអំពីរបាយការណ៍របស់អ្នករាយការណ៍ពិសេស ដែលនឹងដាក់ជូនសម័យប្រជុំលើកទី៦៣ នៃក្រុមប្រឹក្សាសិទ្ធិមនុស្ស និងបានគូសបញ្ជាក់សាជាថ្មីនូវសារៈសំខាន់នៃការបន្តកិច្ចសន្ទនា និងកិច្ចសហប្រតិបត្តិការ ប្រកបដោយការស្ថាបនាលើបញ្ហាសិទ្ធិមនុស្ស។