យុវជនរាជធានី-ខេត្ត ផុលផុសបន្តនាំគ្នាទៅស្នើសុំពាក្យបំពេញកាតព្វកិច្ចយោធា

ចូលថ្ងៃទី២ហើយ នៅថ្ងៃទី២ ខែតុលា ឆ្នាំ២០២៦នេះ ជាការ​ចាប់​ផ្ដើម​អនុវត្ត​ច្បាប់​កាតព្វកិច្ច​យោធា ​សង្កេតឃើញថា មានយុវជន យុវនារី ដែលគ្រប់អាយុ (១៨ដល់២៥ឆ្នាំ) ច្រើនហូរហែរ បាន​នាំ​ទៅទទួលពាក្យសុំចុះឈ្មោះបំពេញកាតព្វកិច្ចយោធាដោយការស្ម័គ្រចិត្ត និងមោះមុត នៅ​បណ្ដា​តាម​មូលដ្ឋានកងរាជអាវុធហត្ថក្រុង ស្រុក ខណ្ឌ។

យុវជន និងយុវនារី នៅរាជធានីភ្នំពេញ ខេត្តកណ្ដាល បាត់ដំបង និងកំពង់ឆ្នាំង នៅថ្ងៃទី២នេះ បាន​បន្តទៅទទួលពាក្យសុំចូលបំពេញកាតព្វកិច្ចយោធាយ៉ាងរួសរាន់ និង​ស្វាហាប់​ដោយ​គ្មាន​ការ​បង្ខិត​​បង្ខំ ​តែក្រោមការជំរុញលើកទឹកចិត្តដោយឪពុកម្ដាយ និងអាណាព្យាបាលផងដែរ។

យុវជន​បានរួសរាន់ស្នើសុំពាក្យសុំចូលបំពេញកាតព្វកិច្ចយោធាយកទៅបំពេញ ដើម្បី​ពន្លឿន​ការ​យក​ឯកសារពាក់ព័ន្ធនានាទៅបញ្ជាក់នៅសាលាឃុំសង្កាត់ ដើម្បីយកពាក្យ​ស្នើ​សុំ​​នេះ​យក​មក​ដាក់​ជូន​មូលដ្ឋានកងរាជអាវុធហត្ថវិញ ឲ្យបានទាន់ពេលវេលា ដើម្បីត្រៀមទទួល​យក​ការ​ហ្វឹក​ហាត់​ក្នុង​ជួរ​កងទ័ព ទទួលយកបទពិសោធន៍ ចំណេះដឹង និងជំនាញ ក្នុងការងារបំពេញ​កាតព្វ​កិច្ច​ចំពោះ​ជាតិ​ឱ្យ​បានមុនគេ មុននឹងទៅធ្វើការងារផ្សេងៗទៀត។

ចំណែក អាណាព្យាបាល បានសម្តែងការពេញចិត្ត និងបានជំរុញ​កូនចៅ​ដែល​គ្រប់​អាយុ​ឱ្យ​ទទួល​ពាក្យ​សុំ​ចូល​បំពេញកាតព្វកិច្ចយោធាទៅតាមការស្ម័គ្រចិត្ត ដើម្បីទទួលយកឱកាសដ៏ល្អនេះ ឲ្យ​បាន​មុន​គេ និងទាន់ពេលជាតិកំពុងមានសេចក្តីតម្រូវការ។

យុវជនបានបញ្ជាក់ថា ក្នុងនាមឈាមជ័រជាខ្មែរ គឺត្រូវតែមានកាតព្វកិច្ចដាច់ខាតមួយ គឺ​បន្ត​ថែ​រក្សា​ទឹកដី និងប្រទេសជាតិ ព្រោះអធិបតេយ្យជាតិ ពុំមានរដ្ឋបរទេស ឬជាតិសាសន៍​ដទៃ​ណា​គេ​មក​ជួយ​ការ​ពារយើងនោះឡើយ មានតែយើងជាយុវជន ជាអ្នកបន្តវេននេះឯង ទើប​ជា​អ្នក​ការ​ពារ​ទឹក​ដី​មួយ​នេះ កុំឲ្យបាត់បង់ទៅលើខ្មាំងសត្រូវទាំងឡាយណាដែលប៉ងឈ្លានពានកាន់កាប់នោះ។

យុវជន​បានបញ្ជាក់ទៀតថា ការបំពេញកាតព្វកិច្ចយោធា រយៈពេល២៤ខែ មិន​ត្រឹម​តែ​ជា​ការ​ចូល​រួម​បំពេញ​កាតព្វកិច្ចចំពោះជាតិប៉ុណ្ណោះទេ ប៉ុន្តែថែមទាំងជា​ឱកាស​សម្រាប់​ពួក​គេ​ក្នុង​ការ​ហាត់​ពត់​លត់​ដំខ្លួន ឱ្យមានវិន័យ សីលធម៌ ការគោរពបទបញ្ជា ការរស់នៅជាក្រុម និងការទទួល​ខុស​ត្រូវ​ក្នុង​សង្គម។ ការអនុវត្តកាតព្វកិច្ចយោធា អាចជួយលើកកម្ពស់ស្មារតីស្នេហាជាតិ និង​បង្កើន​ការ​យល់​ដឹង​របស់យុវជនអំពីតួនាទី និងភារកិច្ចចូលរួមចំណែកការពារឯករាជ្យ អធិបតេយ្យ និង​បូរណ​ភាព​ទឹកដី។ ប្រទេសជាច្រើនបានអនុវត្តច្បាប់ ស្តីពីកាតព្វកិច្ចយោធា ដូច្នេះការ​អនុវត្ត​នៅ​កម្ពុជា​ក៏​ជា​ផ្នែកមួយ នៃការពង្រឹងវិស័យការពារជាតិ និងការអភិវឌ្ឍធនធានមនុស្សផងដែរ៕