សម្តេចរដ្ឋសភាធិបតី ឃួន សុដារី អញ្ជើញប្រារព្ធពិធីបុណ្យកាន់បិណ្ឌវេនទី៧ នៅវត្តស្រះចក បួងសួងសុំសេចក្តី សុខចម្រើនជូនប្រជាពលរដ្ឋខ្មែរនិងប្រទេសជាតិ

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា រួមទាំងញាតិមិត្តជិតឆ្ងាយ ប្រជាពុទ្ធបរិស័ទ បានប្រារព្ធពិធីបុណ្យកាន់បិណ្ឌវេនទី៧ នៅវត្តវិមានតេជះ ហៅវត្តស្រះចក ស្ថិតនៅសង្កាត់ស្រះចក ខណ្ឌដូនពេញ រាជធានីភ្នំពេញ នាព្រឹកថ្ងៃសៅរ៍ ៧រោច ខែភទ្របទ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៣​ ខែតុលា ឆ្នាំ២០២៦ ដើម្បីឧទ្ទិសកុសលជូនបុព្វការីជន ញាតកាទាំង៧សណ្តាន និងវីរជនស្នេហាជាតិ វីរ:កងទ័ពដែលបានពលីជីវិតការពារបូរណភាពទឹកដី។

នៅក្នុងឱកាសនក្ខត្តឫក្សនោះ សម្តេចប្រធានរដ្ឋសភា បានបួងសួងសូមឱ្យប្រជាពលរដ្ឋខ្មែរ បានជួបប្រទះតែសេចក្តីសុខ សេចក្តីចម្រើន និងសុភមង្គលគ្រប់ៗរូប និងជាពិសេស សូមឱ្យប្រទេសជាតិ ឈ្នះអស់មារសត្រូវ បន្តការអភិវឌ្ឍរីកចម្រើនឥតឈប់ឈរ ក្រោមម្លប់សុខសន្តិភាព ឯកភាព និងសាមគ្គីជាតិ លើកកម្ពស់កិត្យានុភាពលើឆាកអន្តរជាតិ ជានិរន្តរ៍តទៅ។

ការប្រារព្ធពិធីបុណ្យកាន់បិណ្ឌវេនទី៧ នៅវត្តវិមានតេជះ ហៅវត្តស្រះចកនាឱកាសនេះ ក្រោមព្រះវត្តមាន សម្តេចព្រះឧត្តមចរិយាបណ្ឌិត ឈឹង ប៊ុនឈា ព្រះអនុប្រធានថេរសភាព្រះពុទ្ធសាសនានៃព្រះរាជាណាចក្រកម្ពុជា និងជាព្រះគ្រូចៅអធិការវត្តស្រះចក ព្រមទាំងព្រះថេរានុត្ថេរៈគ្រប់ព្រះអង្គ ដោយ បានប្រារព្ធប្រតិបត្តិ តាមគន្លងប្រពៃណីសាសនា មានថ្វាយទៀន ផ្កា គ្រឿងសក្ការបូជា ចំពោះព្រះពុទ្ធរូប សូត្រមន្ត នមស្ការ ចម្រើនព្រះបរិត្ត រាប់បាត្រ ប្រគេនទេយ្យទាន ចំពោះព្រះសង្ឃ ក្នុងសទ្ធាជ្រះថ្លាជាទីបំផុត។

ក្រៅពីបានប្រគេនទេយ្យទានចំពោះព្រះសង្ឃ សម្តេចប្រធានរដ្ឋសភា ក៏បានប្រគេនបច្ច័យសម្រាប់ការកសាងសមិទ្ធផលនានានៅក្នុងវត្ត និងបានជូនទានជាថវិកា សំពត់ស អាវស ដល់លោកតា លោកយាយ ចាស់ព្រឹទ្ធាចារ្យ ដែលបានអញ្ជើញចូលរួមពិធីបុណ្យផងដែរ។

បុណ្យកាន់បិណ្ឌត្រូវបានពលរដ្ឋខ្មែរប្រារព្ធតាំងពីបុរាណកាលមក ដើម្បីឧទ្ទិសកុសលផលបុណ្យជូនដល់ដួងវិញ្ញាណក្ខន្ធ ញាតកាទាំង៧សណ្តាន រួមមាន មាតា បិតា ជីដូន ជីតា បងប្អូន កូនចៅ គ្រូឧបជ្ឈាយាចារ្យ បុព្វការីជន បុព្វបុរសជាតិ និងបងប្អូនជនរួមជាតិទាំងឡាយ ដែលបានលាចាកលោកនេះទៅកាន់លោកខាងមុខ និងសូមអញ្ជើញមកទទួលយកផលានិសង្សបានគ្រប់ៗគ្នា។

ពិធីបុណ្យភ្ជុំបិណ្ឌ ឆ្នាំ២០២៦នេះ ប្រព្រឹត្តទៅពីថ្ងៃ១រោច ដល់ថ្ងៃ១៥រោច ខែភទ្របទ ដែលត្រូវនឹងថ្ងៃទី២៧ ខែកញ្ញា ដល់ថ្ងៃទី១១ ខែតុលា ឆ្នាំ២០២៦៕