ប្រធានរដ្ឋសភាកម្ពុជា និងនាយករដ្ឋមន្រ្ដីវៀតណាម ជំរុញទំនាក់ទំនងមិត្តភាពឱ្យកាន់តែស៊ីជម្រៅ

នៅរសៀលថ្ងៃទី៩ ខែតុលា ឆ្នាំ២០២៦នេះ សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា និងឯកឧត្ដម ឡេ មិញហ៊ឹង (Le Minh Hung)​ នាយករដ្ឋមន្រ្ដី នៃសាធារណរដ្ឋសង្គមនិយមវៀតណាម បានជួបពិភាក្សាការងារ ជំរុញទំនាក់ទំនងមិត្តភាពឱ្យកាន់តែស៊ីជម្រៅ ក្នុងឱកាសឯកឧត្ដមអញ្ជើញមកបំពេញទស្សនកិច្ចនៅព្រះរាជាណាចក្រកម្ពុជា។

ឯកឧត្ដម កែវ ពិសិដ្ឋ នាយកខុទ្ទកាល័យសម្ដេចប្រធានរដ្ឋសភា ប្រាប់ឱ្យដឹង ថា ជំនួបរវាងសម្ដេចប្រធានរដ្ឋសភា និងនាយករដ្ឋមន្រ្ដីវៀតណាម ជាកិច្ចចាប់ផ្ដើមសម្ដេចប្រធានរដ្ឋសភា បានស្វាគមន៍យ៉ាងកក់ក្ដៅ គណៈប្រតិភូវៀតណាម និងចាត់ទុកថា ដំណើរទស្សនៈកិច្ចពេលនេះ គឺជាការពូនជ្រុំ និងបន្តពង្រឹងកិច្ចសហប្រតិបត្តិការទ្វេភាគី រវាងប្រទេសទាំងពីរឱ្យកាន់តែរឹងមាំ និងស៊ីជម្រៅបន្ថែមទៀត ខណៈប្រទេសទាំងពីរ គឺជាប្រទេសជិតខាងល្អ ដែលគោរពគ្នាទៅវិញទៅមក ឱ្យតម្លៃខ្ពស់លើមិត្តភាព ព្រំដែនសន្ដិភាព។

សម្ដេចប្រធានរដ្ឋសភា បានសង្កត់ធ្ងន់ថា ទំនាក់ទំនងជាប្រពៃណីរវាងកម្ពុជា និងវៀតណាម បន្តពូនជ្រុំរីកចម្រើនជាលំដាប់ ជាក់ស្ដែង​អនុស្សរណៈ​នៃការយោគយល់គ្នា ទាំង៦ រវាងនាយករដ្ឋមន្រ្ដីកម្ពុជា និងវៀតណាម គឺជាការបង្ហាញលទ្ធផលជាក់ស្ដែង ក្នុងដំណើរឆ្ពោះទៅប្រយុទ្ធប្រឆាំងគ្រឿងញៀន ការឆបោកតាមប្រព័ន្ធបច្ចេកវិទ្យា និងការជួញដូរមនុស្សឆ្លងដែន។

មានប្រសាន៍ក្នុងជំនួបនេះ ឯកឧត្តម នាយករដ្ឋមន្រ្ដីវៀតណាម បានបង្ហាញការកោតសរសើរចំពោះការអភិវឌ្ឍរបស់កម្ពុជា។ ឯកឧត្តម​ បានជម្រាបសម្ដេចប្រធានរដ្ឋសភា ថា ក្នុងនាមជាអ្នកជិតខាងល្អ វៀតណាម នឹងបន្តកិច្ចសហប្រតិបត្តិការឱ្យខ្លាំងបន្ថែមទៀតជាមួយកម្ពុជា។ ចំណែកកិច្ចសហប្រតិបត្តិរវាង រដ្ឋសភា នៃប្រទេសទាំងពីរ នាពេលខាងមុខនេះ នឹងបន្តចុះអនុស្សរណៈ ជាមួយគ្នា ដើម្បីជាឧត្ដមប្រយោជន៍សម្រាប់ប្រជាជន និងប្រជាជន រួមចំណែកជំរុញកំណើនសេដ្ឋកិច្ចសម្រេចគោលដៅ កម្ពុជា ជាប្រទេសអភិវឌ្ឍ ឆ្នាំ២០៥០៕

អត្ថបទ: លៀ ស៊ីណា