សម្ដេធិបតី ណែនាំឱ្យរៀបចំផែនការយុទ្ធសាស្ត្រស្តីពីការធ្វើទំនើបកម្មបណ្ណសារដ្ឋានជាតិឱ្យបានឆាប់

សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានណែនាំក្រសួងពាក់ព័ន្ធរួមគ្នាធ្វើទំនើបកម្មបណ្ណសារដ្ឋានជាតិ, បណ្ណាល័យជាតិ និងសារមនី្ទរជាតិ ព្រមទាំងថែរក្សា និងអភិរក្សបេតិកភណ្ឌជាតិសំខាន់ៗដទៃទៀតក្នុងប្រទេសកម្ពុជា ខណៈថ្មីៗនេះសម្តេចក៏បានបង្កើតគណៈកម្មាធិការជាតិវប្បធម៌ ប្រវត្តិសាស្ត្រ និងអារ្យធម៌ខ្មែរ ដែលមាន ឯកឧត្តម ឧបនាយករដ្ឋមន្ត្រីប្រចាំការ វង្សី វិស្សុត រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ជាប្រធានគណៈកម្មាធិការជាតិនេះ ដើម្បីតម្រង់ទិសសម្របសម្រួល និងជំរុញសំដៅលើកស្ទួយអំណាចទន់របស់កម្ពុជា។

សម្ដេចធិបតី នាយករដ្ឋមន្រ្ដីបានថ្លែងបញ្ជាក់បែបនេះ ក្នុងឱកាស អញ្ជើញជាអធិបតី ពិធីបើកពិព័រណ៍ខួប ១០០ឆ្នាំ នៃបណ្ណសារដ្ឋានជាតិ នៅព្រឹកថ្ងៃទី៤ ខែវិច្ឆិកា ឆ្នាំ២០២៦នេះ។

ក្នុងឱកាសនោះ សម្ដេចធិបតី មានប្រសាសន៍បញ្ជាក់ថា គោលបំណងជំរុញការធ្វើទំនើបកម្មបណ្ណសារដ្ឋានជាតិនេះ គឺដើម្បីរួមចំណែកដល់ការលើកកម្ពស់ការយល់ដឹងរបស់សាធារណជនអំពីបណ្ណសារដ្ឋានជាតិ ជាពិសេសគុណតម្លៃរបស់បណ្ណសារដ្ឋានជាតិ ដែលជាគ្រឹះសំខាន់នៃអត្តសញ្ញាណជាតិ។ សម្តេចថ្លែងថា បណ្ណសារដ្ឋានជាតិ មានតម្លៃជាងមាសដុំ ព្រោះបានតម្កល់ឫសគល់អត្តសញ្ញាណ និងប្រវត្តិសាស្រ្ដ និងសាវតាររបស់ជាតិយើង។

សម្ដេចធិបតី ក៏បានផ្ដល់អនុសាសន៍ និងការណែនាំឱ្យក្រសួង ស្ថាប័នពាក់ព័ន្ធ ជំរុញឱ្យមានការរៀបចំផែនការធ្វើទំនើបកម្មបណ្ណសារដ្ឋានជាតិ បណ្ណាល័យជាតិ និងសារមន្ទីរជាតិ ឱ្យបានឆាប់រហ័ស ដើម្បីឆ្លើយតបទៅនឹងតម្រូវការនៃការអភិវឌ្ឍជាតិ និងណែនាំឱ្យពិនិត្យ និងធ្វើវិសោធនកម្មចាំបាច់ណាមួយចំពោះ «ច្បាប់ស្តីពីបណ្ណសារ» ដើម្បីឱ្យស្របទៅតាមស្ថានភាពនៃការវិវត្តសង្គម សេដ្ឋកិច្ចកម្ពុជា និងពិភពលោកនាពេលបច្ចុប្បន្ន។

សូមជម្រាបថា បណ្ណសារដ្ឋានជាតិ និងបណ្ណាល័យជាតិ បានបំពេញតួនាទីជាឃ្លាំងរក្សាបណ្ណសារប្រវត្តិសាស្ត្រ សៀវភៅបុរាណ កាសែត ផែនទី និងកំណត់ត្រាសំខាន់ៗ និងឯកសារជាច្រើនទៀត ដែលជាស្ពានឆ្លងកាត់របត់ប្រវត្តិសាស្ត្រ និងជាថ្នាលចំណេះដឹងសម្រាប់អ្នកស្រាវជ្រាវ និងមនុស្សជំនាន់ក្រោយ។ ទោះឆ្លងកាត់សង្គ្រាម និងការលំបាកក៏មរតកទាំងនេះ ត្រូវបានថែរក្សាមកដល់សព្វថ្ងៃ ដោយសារការលះបង់ និងស្មារតីស្រឡាញ់ជាតិ៕