សម្ដេចធិបតី៖ ក្នុងបរិបទពិភពលោកបោះជំហានលឿនទៅមុខកម្ពុជា​​បានធ្វើកំណែទម្រង់​លើវិស័យជា​ច្រើន​​

​សម្ដេច​មហាបវរធិបតី ហ៊ុន​ ម៉ាណែត នាយកដ្ឋមន្រ្ដីនៃកម្ពុជា មានប្រសាសន៍បញ្ជាក់ថា នៅក្នុងបរិបទដែលពិភពលោកកំពុងបោះជំហានលឿនចូលទៅក្នុងបរិវត្តឧស្សាហកម្មជំនាន់ទី៤ និងសេដ្ឋកិច្ច សង្គមឌីជីថល ជាមួយនឹងការវិវត្តដ៏ស្មុគស្មាញនៃភូមិសាស្រ្ដនយោបាយ និងភូមិសាស្រ្ដសេដ្ឋកិច្ច, រាជរដ្ឋាភិបាលនីតិកាលទី៧ នៃរដ្ឋសភាបានដាក់ចេញនូវយុទ្ធសាស្រ្ដបញ្ចកោណដំណាក់កាលទី១ ដែលមានគោលបំណងចំបង និងយូរអង្វែង សំដៅលើការកសាង និងការពង្រឹងរដ្ឋ និងជាតិរបស់កម្ពុជា។

សម្ដេច​ធិបតី នាយករដ្ឋមន្រ្ដី បានថ្លែង​បែបនេះ ក្នុងឱកាសអញ្ជើញជាអធិបតី បើកពិព័រណ៍ខួប១០០ឆ្នាំនៃបណ្ណសារដ្ឋានជាតិនៃកម្ពុជា ក្រោមប្រធានបទ «មួយ​សត​វត្សរ៍នៃការចងចាំ ឆ្ពោះទៅការលើក​កម្ពស់​អត្តសញ្ញាណជាតិ» នៅព្រឹកថ្ងៃ ទី៤ ខែវិច្ឆិកា ឆ្នាំ២០២៦នេះ។

ការ​បញ្ជាក់​របស់​សម្ដេច​ធិបតីថា «ក្នុងបរិបទពិភពលោកបោះជំហានលឿនទៅមុខ កម្ពុជាបានធ្វើកំណែទម្រង់លើវិស័យជាច្រើន» គឺជាការលើកឡើងដ៏សំខាន់ ដែលឆ្លុះបញ្ចាំងពីចក្ខុវិស័យ និងការប្ដេជ្ញាចិត្តរបស់រាជរដ្ឋាភិបាលអាណត្តិទី៧ ក្នុងការអភិវឌ្ឍប្រទេសជាតិឱ្យទាន់សភាពការណ៍សកលលោក។

សម្ដេច​ធិបតីបានបន្តថា នៅក្នុងដំណើរនៃការ​កសាងរដ្ឋ រាជរដ្ឋាភិបាលក៏បាននិងកំពុង​រៀបចំ និងការ​អនុវត្ត​ការ​កែទម្រង់ពង្រឹង​ប្រព័ន្ធច្បាប់ និងវិធានគតិយុត្តសម្រាប់គ្រប់គ្រង​ប្រទេស ព្រមទាំង​កំពុងរៀបចំ និងអនុវត្ត​ការ​កែទម្រង់ និងលើកកម្ពស់​សមត្ថភាព ប្រសិទ្ធភាពស្ថាប័ន ប្រព័ន្ធការងារដើម្បីឱ្យរដ្ឋអាច​បំពេញបេសកកម្ម និងមុខងារ​របស់ខ្លួន​ប្រកបដោយស័ក្ដិសិទ្ធិភាព​ ដូចជា​ការការពារអធិបតេយ្យ បូរណភាពទឹកដី ការ​រក្សា​ស្ថិរភាពនយោបាយ និងសន្ដិសុខសណ្ដាប់ធ្នាប់សង្គម ការ​អភិវឌ្ឍសង្គមសេដ្ឋកិច្ច ការផ្ដល់សេវាសាធារណៈ និងការ​អភិវឌ្ឍមូលធនមនុស្សជាដើម។

សូមជម្រាបថា កំណែទម្រង់គន្លឹះៗដែលរាជរដ្ឋាភិបាលកម្ពុជាក្រោមការ​ដឹកនាំដោយសម្ដេច​ធិបតី កំពុងរុញច្រានយ៉ាងខ្លាំងក្លា ក្នុងនោះរួមមាន​ ការ​ធ្វើ​កំណែទម្រង់រដ្ឋបាលសាធារណៈ៖ តាមរយៈការពង្រឹងសមត្ថភាព មន្ត្រីរាជការ ការដាក់ឱ្យអនុវត្តប្រព័ន្ធបច្ចេកវិទ្យាក្នុងការផ្តល់សេវាសាធារណៈ (E-Government) និងការលុបបំបាត់ភាពស៊ាំញ៉ាំមិនចាំបាច់។ ការធ្វើ​កំណែទម្រង់វិស័យអប់រំ និងកាយសម្បទា៖ ការពង្រឹងគុណភាពអប់រំចាប់ពីកម្រិតមត្តេយ្យសិក្សា រហូតដល់ឧត្តមសិក្សា និងការផ្ដោតលើការបណ្ដុះបណ្ដាលជំនាញបច្ចេកទេស និងវិជ្ជាជីវៈ (TVET) ដល់យុវជនមកពីគ្រួសារក្រីក្រ និងងាយរងគ្រោះ។ ការ​ធ្វើ​កំណែទម្រង់វិស័យសុខាភិបាល៖ ការពង្រីកវិសាលភាពនៃមូលនិធិសមធម៌សុខាភិបាល និងការលើកកម្ពស់គុណភាពសេវាព្យាបាលនៅតាមមន្ទីរពេទ្យបង្អែក និងមណ្ឌលសុខភាពមូលដ្ឋាន។ ការធ្វើ​កំណែទម្រង់ប្រព័ន្ធយុត្តិធម៌៖ ការដោះស្រាយភាពមិនប្រក្រតី និងការជំរុញយុទ្ធនាការដោះស្រាយវិវាទក្រៅប្រព័ន្ធតុលាការ ដើម្បីបង្កើនទំនុកចិត្តពីសាធារណជន និងវិនិយោគិនជាដើម​៕