លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អញ្ជើញជាអធិបតីភាពប្រកាសបើកជាផ្លូវការ «ពិព័រណ៍ផលិតផលខ្មែរឆ្នាំ២០២៦»

នារសៀលថ្ងៃទី៦ ខែវិច្ឆិកា ឆ្នាំ២០២៦ លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជំទាវទី១ នៃព្រះរាជាណាចក្រកម្ពុជា បានអញ្ជើញជាអធិបតីដ៏ខ្ពង់ខ្ពស់ក្នុងពិធីបើកពិព័រណ៍ផលិតផលខ្មែរ ឆ្នាំ២០២៦ ក្រោមប្រធានបទ «ខ្មែរធ្វើបាន៖ ចូលរួម ជំរុញ គាំទ្រផលិតផលក្នុងស្រុក» នៅមជ្ឈមណ្ឌលសន្និបាត និងពិព័រណ៍កោះពេជ្រ អគារ G–L។ ពិធីនេះមានការអញ្ជើញចូលរួមពីឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា (ស.ស.យ.ក.) ឯកឧត្តម លោកជំទាវ ទេសរដ្ឋមន្ត្រី រដ្ឋមន្ត្រី និងសមាជិក សមាជិករាជរដ្ឋាភិបាល ឯកឧត្តម លោកជំទាវ សមាជិកគណៈអចិន្ត្រៃយ៍ ស.ស.យ.ក. សមាជិក សមាជិកា ស.ស.យ.ក. តំណាងក្រុមហ៊ុន/ស្ថាប័ន សហគ្រិន សិប្បករ កសិករ សិស្សានុសិស្ស និងសាធារណជនជាច្រើនរូប។

ជាកិច្ចចាប់ផ្ដើម ឯកឧត្តម ហ៊ុន ម៉ានី បានបង្ហាញក្ដីសោមនស្សរីករាយ និងថ្លែងអំណរគុណយ៉ាងជ្រាលជ្រៅជូនចំពោះលោកជំទាវ ពេជ ចន្ទមុន្នី ដែលអញ្ជើញចូលរួមជាអធិបតីភាព ដែលញ៊ាំងឱ្យកម្មវិធីនារសៀលនេះ កាន់តែមានភាពអធិកអធម។ ឯកឧត្តមបានលើកឡើងថា ប្រធានបទ «ខ្មែរធ្វើបាន» មានគោលបំណងប្រមូលផ្ដុំកម្លាំង និងពង្រឹងសាមគ្គីភាពក្នុងនាមជាខ្មែរតែមួយ ដើម្បីគាំទ្រដល់សហគ្រិនក្នុងស្រុក និងរួមគ្នាលើកកម្ពស់ផលិតផលខ្មែរ។ ឯកឧត្តមក៏បានចាត់ទុកពិព័រណ៍នេះជាឱកាសបង្ហាញសក្ដានុពលសេដ្ឋកិច្ចកម្ពុជា និងជាចំណែកមួយនៃកិច្ចខិតខំប្រឹងប្រែងរួមជាមួយរាជរដ្ឋាភិបាល ដើម្បីអភិវឌ្ឍសង្គមជាតិ និងពង្រឹងអធិបតេយ្យភាព ព្រមទាំងឯករាជ្យភាពរបស់កម្ពុជា។

មានប្រសាសន៍នាឱកាសនោះ លោកជំទាវបណ្ឌិតបានកោតសរសើរ និងវាយតម្លៃខ្ពស់ចំពោះ ស.ស.យ.ក. ក្រោមការដឹកនាំរបស់ឯកឧត្តម ហ៊ុន ម៉ានី ដែលតែងផ្ដួចផ្ដើមកម្មវិធីប្រមូលផ្ដុំកម្លាំងសង្គម ដើម្បីបម្រើប្រយោជន៍ជាតិ។ ជាក់ស្ដែង ប្រធានបទនៃពិព័រណ៍ផលិតផលខ្មែរ មានអត្ថន័យលើសពីការរៀបចំពិព័រណ៍។ «ខ្មែរធ្វើបាន» បង្ហាញពីស្មារតីនៃប្រជាជាតិខ្មែរទាំងមូល ស្របតាមប្រសាសន៍របស់សម្ដេចអគ្គមហាសេនាបតីតេជោ ហ៊ុន សែន ដែលធ្លាប់មានប្រសាសន៍ថា «ខ្មែរធ្វើបាន គឺបង្ហាញពីមោទនភាពជាតិ ដែលខ្មែរគ្រប់ជំនាន់អាចធ្វើបាន»។

លោកជំទាវ បានគូសបញ្ជាក់ផងដែរថា នាពេលថ្មីៗនេះ រាជរដ្ឋាភិបាលកម្ពុជា បានដាក់ឱ្យអនុវត្តនូវយុទ្ធសាស្ត្រជាតិស្ដីពីការអភិវឌ្ឍសហគ្រាសធន់មីក្រូតូច និងមធ្យម ឆ្នាំ២០២៦-២០៣០ ដែលនេះជាការឆ្លុះបញ្ចាំង ពីការយកចិត្តទុកដាក់របស់រាជរដ្ឋាភិបាល ក្នុងការពង្រឹងបរិយាកាសធុរកិច្ច លើកកម្ពស់ផលិតភាពបច្ចេកវិទ្យា នវានុវត្ត ស្ដង់ដារ ការទទួលបាបហិរញ្ញប្បទាន និងការតភ្ជាប់ទីផ្សារ។ យ៉ាងណាមិញ គោលនយោបាយ និងការគាំទ្រពីស្ថាប័នតែមួយមុខ ក៏មិនអាចធ្វើឱ្យសហគ្រាសរីកចម្រើនបានដែរ ប្រសិនបើគ្មានការចូលរួមពីម្ចាស់អាជីវកម្ម និងគ្មានទំនុកចិត្តពីអ្នកប្រើប្រាស់។ ការកសាងផលិតផលខ្មែរឱ្យបានរឹងមាំ គឺជាកិច្ចការរួមគ្នា។

ក្នុងស្មារតីនេះ លោកជំទាវបណ្ឌិតបានលើកទឹកចិត្តដល់បងប្អូនប្រជាពលរដ្ឋ អញ្ជើញមកចូលរួមពិព័រណ៍ផលិតផលខ្មែរឱ្យបានច្រើនកុះករ ដើម្បីបង្ហាញស្មារតីជាតិ តាមរយៈការគាំទ្រផលិតផលខ្មែរ៕