សិក្ខាកាម ៨៤នាក់បានបញ្ចប់វគ្គបណ្ដុះបណ្ដាលបំប៉នជំនាញស៊ើបអង្កេតបទល្មើសគ្រឿងញៀន

ភ្នំពេញ ៖ ថ្នាក់ដឹកនាំប្រឆាំងបទល្មើសគ្រឿងញៀន ណែនាំសិក្ខាកាម ត្រូវយកចំណេះដឹង ដែលទទួលបានពីវគ្គបំប៉នជំនាញទៅបម្រើសង្គមជាតិ បម្រើអង្គភាព និងអនុវត្តឱ្យមានប្រសិទ្ធិភាព។

នាឱកាសអញ្ជើញជាអធិបតីក្នុងពិធីបិទវគ្គបណ្ដុះបណ្ដាលបំប៉នជំនាញស៊ើបអង្កេតបទល្មើសគ្រឿងញៀន នីតិវិធី និងច្បាប់ស្ដីពីការត្រួតពិនិត្យគ្រឿងញៀន នៅអគ្គស្នងការដ្ឋាននគរបាលជាតិ នៅថ្ងៃទី០៤ ខែកញ្ញា ឆ្នាំ២០២៤ ឧត្ដមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន បានណែនាំដល់សិក្ខាកាម ត្រូវយកចំណេះដឹង ដែលទទួលបានពីវគ្គបំប៉នជំនាញទៅបម្រើសង្គមជាតិ បម្រើអង្គភាព និងអនុវត្តឱ្យមានប្រសិទ្ធិភាព ជាពិសេសគឺត្រូវស្មោះត្រង់ជាមួយរាជរដ្ឋាភិបាលស្របច្បាប់ ដែលមានសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ។

នាយកមន្ទីរប្រឆាំងបទល្មើសគ្រឿងញៀន បានបញ្ជាក់ថា មុខវិជ្ជាដែលសិក្ខាកាមបានសិក្សាមកនេះ នឹងក្លាយជាមូលដ្ឋានគ្រឹះក្នុងការអនុវត្តតួនាទី ភារកិច្ចរបស់ខ្លួនក្នុងនាមជានគរបាលប្រយុទ្ធប្រឆាំងគ្រឿងញៀន និងនីតិវិធីផ្សេងៗ ដែលមានចែងក្នុងក្រមនីតិវិធីព្រហ្មទណ្ឌ ដែលនគរបាលត្រូវតែគោរព និងអនុវត្តតាមជាដាច់ខាត ។ ឧត្តមសេនីយ៍ឯក បន្ថែមថា មេរៀនដែលបានសិក្សារួចមកហើយនេះ គឺជាប្រភេទមេរៀន ដែលត្រូវចំណាយពេលជាច្រើនថ្ងៃ ដើម្បីធ្វើការលម្អិតឱ្យបានច្បាស់លាស់ ប៉ុន្តែដោយសារសិក្ខាកាមទាំងអស់ សុទ្ធតែជាមន្ត្រីអនុវត្តច្បាប់ ទើបបង្រួមវគ្គបណ្ដុះបណ្ដាលនេះ មកត្រឹម រយៈពេល ០៥ថ្ងៃ ដើម្បីទុកពេលឱ្យសិក្ខាកាមដកស្រង់បទពិសោធន៍ពីការងារប្រចាំថ្ងៃរបស់ខ្លួនបន្ថែមទៀត។ ដូច្នេះសិក្ខាកាម ត្រូវធ្វើការស្វ័យសិក្សា និងដកស្រង់បទពិសោធន៍ពីករណីជាក់ស្តែង ដែលខ្លួនបានជួប ឬដកស្រង់បទពិសោធន៍បន្ថែម ជាមួយថ្នាក់ដឹកនាំ ដើម្បីពង្រឹងសមត្ថភាពរបស់ខ្លួនឱ្យបានជ្រួតជ្រាបយល់កាន់តែស៊ីជម្រៅបន្ថែមទៀត។

ឧត្ដមសេនីយ៍ឯក ឃឹង សារ៉ាត់ ក៏បានថ្លែងអំណរគុណដល់គ្រូបង្គោល ក៏ដូចជាក្រុមការងាររៀបចំវគ្គបណ្ដុះបណ្ដាល និងធ្វើការសម្របសម្រួលរហូតដល់វគ្គបណ្ដុះបណ្ដាលនេះបញ្ចប់ទៅដោយរលូន និងជោគជ័យ។

សូមជម្រាបថា វគ្គបណ្ដុះបណ្ដាលនេះមានសិក្ខាកាមមកពីចំណុះមន្ទីរប្រឆាំងបទល្មើសគ្រឿងញៀនសរុបចំនួន ៨៤នាក់ និងបានធ្វើឡើងកាលពីថ្ងៃទី១២ រហូតដល់ថ្ងៃទី១៦ ខែសីហា ឆ្នាំ២០២៤៕  ដោយ ៖ តារាវុទ្ធី