វេទិកាស្រូវអង្ករកម្ពុជាលើកទី៧ គ្រោងរៀបចំឡើងនៅថ្ងៃទី១០ កញ្ញាខាងមុខ ក្រោមអធិបតីភាពសម្តេចធិបតី

សហព័ន្ធស្រូវអង្ករកម្ពុជា នៅថ្ងៃទី១០ ខែកញ្ញា ឆ្នាំ២០២៤ខាងមុខនេះ នឹងរៀបចំកម្មវិធី “វេទិកាស្រូវអង្ករកម្ពុជាលើកទី៧” ក្រោមប្រធានបទ៖ ការប្រែក្លាយខ្សែចច្រវាក់ផ្គត់ផ្គង់អង្ករកម្ពុជាឲ្យកាន់តែមានភាពធន់ បរិយាបន្ន និងនិរន្តរភាព ដែលប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។

នៅក្នុងសេចក្តីប្រកាសព័ត៌មាន ចេញផ្សាយនៅល្ងាចថ្ងៃទី៤ ខែកញ្ញានេះ សហព័ន្ធស្រូវអង្ករកម្ពុជា បានឲ្យដឹងថា វេទិកានេះរៀបចំឡើងក្រោមកិច្ចគាំទ្រពីរាជរដ្ឋាភិបាល ដែលមានក្រសួងកសិកម្ម រុក្ខាប្រមាញ់ និងនេសា , ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ , ក្រសួងពាណិជ្ជកម្ម , ប្រទេសអូស្រ្តាលី តាមរយៈកម្មវិធីភាពជាដៃគូ កម្ពុជា អូស្រ្តាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ , ធនាគារអភិវឌ្ឍន៍ជនបទ និងកសិកម្ម , សហគ្រិនខ្មែរ និងគម្រោងទីភ្នាក់ងារសហរដ្ឋអាម៉េរិកសម្រាប់អភិវឌ្ឍន៍អន្តរជាតិ។

វេទិកានេះរៀបចំឡើងក្នុងគោលបំណង ដើម្បីផ្សព្វផ្សាយអំពីសក្តានុពលនៃវិស័យស្រូវអង្ករកម្ពុជាទៅកាន់ពិភពលោក តាមរយៈការបង្ហាញអំពីសមត្ថភាពផលិតកម្មស្រូវ ការកិនកែច្នៃ និងភាពប្រជែងឈ្នះផ្សេងទៀតរបស់វិស័យស្រូវអង្ករកម្ពុជា ចែករំលែកពីនិន្នាការនៃទីផ្សារ ការដាំដុះ និងបច្ចេកវិទ្យាដែលពាក់ព័ន្ធដល់ការដាំដុះស្រូវ ការកិនកែច្នៃស្រូវអង្ករ ក៏ដូចជាចែករំលែកស្តីអំពីទស្សនៈវិស័យ គោលនយោបាយ និងវិធានការនានារបស់រាជរដ្ឋាភិបាលលើវិស័យស្រូវអង្ករកម្ពុជា និងស្វែងរកធាតុចូល និងអនុសាសន៍នានាសម្រាប់លើកកម្ពស់វិស័យស្រូវអង្ករនៅកម្ពុជា។

សហព័ន្ធស្រូវអង្ករកម្ពុជា បានបញ្ជាក់ឲ្យដឹងទៀតថា វេទិកានេះដែរ ក៏នឹងមានធ្វើបទបង្ហាញ និងពិភាក្សាពីអ្នកជំនាញសំខាន់ៗពីថ្នាក់ជាតិ និងអន្តរជាតិ ទៅលើប្រធានបទសំខាន់ៗចំនួន៣ មានដូចជា ១. គន្លឹះសំខាន់នៃភាពប្រកួតប្រជែង និងភាពធន់លើការធ្វើកសិកម្មដាំដុះស្រូវនៅកម្ពុជា។ ២. គោលការណ៍បរិដ្ឋាន សង្គម អភិបាលកិច្ចល្អ និងនិរន្តភាពហិរញ្ញប្បទានដល់វិស័យស្រូវអង្ករ និងប្រធានបទទី៣. និន្នាការទីផ្សារអង្ករពិភពលោក និងបញ្ហាសន្តិសុខស្បៀង៕ អត្ថបទ ឈិត បូរ៉ាវី