ប្រិយមិត្តធ្លាប់ឆ្ងល់ឬអត់ ថាហេតុអ្វីបានជាសំណើចចុងសប្តាហ៍សម្តែងនៅតែតាមបណ្តាខេត្ត?

ទស្សនិកជនប្រាកដជាបានទស្សនាជាច្រើនមកហើយនៅកម្មវិធីសំណើចចុងសប្តាហ៍របស់ ស្ថានីយ៍ទូរទស្សន៍បាយ័ន។ សំណើចចុងសប្តាហ៍ជាខ្សែភាពយន្តភាគខ្មែរបែបកំប្លែងដែលមានបង្កប់ពីអត្ថន័យអប់រំជាច្រើននៅក្នុងសាច់រឿង។ ជាធម្មតាទស្សនិកជនជាច្រើនអាចនឹងសើចសប្បាយជាមួយនឹងសាច់រឿងក៏ដូចជាការសម្តែងរបស់តួអង្គនីមួយៗ តែមានចំណុចសំខាន់ៗមួយចំនួនទៀតដែលអ្នកដឹកនាំបានបង្កប់ចូលទៅក្នុងសាច់រឿងនេះ។

លោក អ៊ូ ប៊ុនណ្ណារ៉ាត់ ហៅនាយ ក្រឹម បានបង្ហើបប្រាប់ឲ្យដឹងថា

“ មូលហេតុដែលខ្ញុំដឹកនាំក្រុមសម្តែងនៅតែក្នុងស្រុកភូមិជនបទគោលបំណងគឺចង់ឲ្យក្មេងជំនាន់ក្រោយ ក៏ដូចជាអ្នកនៅទីក្រុងដែលមិនសូវមានឱកាសបានធ្វើដំណើរទៅតាមបណ្តាខេត្តបានឃើញនិងយល់ដឹងពីរបៀបនៃការរស់នៅរបស់បងប្អូនប្រជាពលរដ្ធដែលរស់នៅក្នុងស្រុកភូមិតូចៗតាមបណ្តាខេត្ត។

ហើយមួយវិញទៀត គឺយើងតម្រូវទៅ តាមពុកម៉ែបងប្អូននៅតាមបណ្តាខេត្តដែលគាត់និយមចូលចិត្តការរស់នៅបែបនេះ តែអ្វីកាន់តែពិសេសជាងនេះទៅទៀតគឺសម្រាប់បងប្អូនខ្មែរនៅឯនាយសមុទ្រដែលមានចិត្តនឹករលឹកមាតុភូមិស្រុកកំណើត នៅពេលដែលបានទស្សនាក៏អាចជួយឲ្យរសាយចិត្តនឹករលឹកបានមួយគ្រា” ។

គួររំលឹកផងដែរថាលោក អ៊ូ ប៊ុណ្ណារ៉ាត់ ហៅនាយ ក្រឹម ក្រៅពីជាតួសម្តែងនាំមុខហើយនោះលោកក៏ជាផលិតករ និង ជាអ្នកដឹកនាំសម្តែងនៅក្នុងសំណើចចុងសប្តាហ៍នេះផងដែរ។  លោកបានបន្ថែមទៀតថា

“ ខ្ញុំបានលះបង់ទាំងកម្លាំងកាយចិត្តក្នុងការ ផលិត និង ដឹកនាំ ព្រមទាំងត្រូវចូលសម្តែងថែមទៀតវាពិតជាហត់នឿយខ្លាំងណាស់។ តែអ្វីដែលជាកម្លាំងចិត្តធ្វើឲ្យខ្ញុំមានកម្លាំងធ្វើមកដល់សព្វថ្ងៃនេះគឺការគាំទ្រពីសំណាក់ពុកម៉ែបងប្អូន និងការគោរពឲ្យតម្លៃពីក្រុមការងារទាំងអស់ ខ្ញុំពិតជាថ្លែងអំណរគុណយ៉ាងក្រៃលែងចំពោះការស្រឡាញ់ ការគាំទ្រចំពោះរូបខ្ញុំបាទនិងស្នាដៃរបស់ខ្ញុំកន្លងមក” ៕

អត្ថបទដោយ៖ កូនទន្សាយតូច