អ៊ុយក្រែននិយាយថា រុស្ស៊ី បានវាយប្រហារលើនាវាដឹកគ្រាប់ធញ្ញជាតិស៊ីវិល នៅសមុទ្រខ្មៅ

អ៊ុយក្រែន បានចោទប្រកាន់រុស្ស៊ី កាលពីថ្ងៃព្រហស្បតិ៍ថា បានប្រើប្រាស់យន្តហោះទម្លាក់គ្រាប់បែកយុទ្ធសាស្ត្រ វាយប្រហារលើនាវាដឹកគ្រាប់ធញ្ញជាតិស៊ីវិលដោយមីស៊ីល នៅសមុទ្រខ្មៅ ក្នុងតំបន់សេដ្ឋកិច្ចដែនសមុទ្ររបស់សមាជិកសម្ព័ន្ធយោធាណាតូរបស់ប្រទេសរ៉ូម៉ានី ជាអ្វីដែលខ្លួនពណ៌នាថា ជាការវាយប្រហារដ៏គឃ្លើនលើសេរីភាពនៃការធ្វើនាវាចរណ៍។

ប្រធានាធិបតី លោក Volodymyr Zelenskyy បាននិយាយថា នាវាដែលកំពុងដឹកគ្រាប់ធញ្ញជាតិអ៊ុយក្រែន ទៅកាន់ប្រទេសអេហ្ស៊ីប បានរងការវាយប្រហារដោយមីស៊ីលរបស់រុស្ស៊ី បន្ទាប់ពីនាវា បានចាកចេញពីដែនទឹកអ៊ុយក្រែន ប៉ុន្តែពុំមានអ្នករងរបួសនោះទេ។

ប្រសិនបើត្រូវបានបញ្ជាក់ ឧបទ្ទវហេតុនេះនឹងបង្ហាញពីការកើនឡើងខ្លាំងនៃភាពតានតឹង រវាងទីក្រុងមូស្គូ និងសម្ព័ន្ធមិត្តយោធាណាតូ ដែលបានព្យាយាមដោះស្រាយច្រកមួយ រវាងការព្រួយបារម្ភកើនឡើង និងការគាំទ្រអ៊ុយក្រែនក្នុងសង្រ្គាមរបស់ប្រទេសនេះជាមួយរុស្ស៊ី ចាប់តាំងពីការវាយលុករបស់ទីក្រុងមូស្គូ ក្នុងខែកុម្ភៈ ឆ្នាំ២០២២។

ក្រុមហ៊ុនសន្តិសុខដែនសមុទ្ររបស់ចក្រភពអង់គ្លេស Ambrey បាននិយាយនៅក្នុងកំណត់ត្រាមួយថា នាវាផ្ទុកទំនិញខ្នាតធំមានទង់ជាតិប្រទេសកោះសង់ឃីតនិងណេវីស ត្រូវបានវាយប្រហារដោយមីស៊ីល បាញ់ដោយរុស្ស៊ី បន្ទាប់ពីបានចាកចេញពីកំពង់ផែ Chornomorsk របស់អ៊ុយក្រែន ក្នុងទីក្រុង Odesa របស់អ៊ុយក្រែន។