មន្រ្តីជាន់ខ្ពស់កម្ពុជា ស្នើដល់លោក Chris Larsen ជួយបញ្ជ្រាបអំពី​បរិយាកាស​វិនិយោគ​នៅកម្ពុជា

មន្រ្តីជាន់ខ្ពស់រាជរដ្ឋាភិបាលកម្ពុជា សំណូមពរទៅកាន់បុគ្គលដែលលេចធ្លោ ក្នុងវិស័យ​ឧស្សាហកម្ម​បច្ចេកវិទ្យា និងជាសហស្ថាបនិក ក្រុមហ៊ុនបច្ចេកវិទ្យាល្បីៗ នៅទីក្រុង​សាន់​ហ្វ្រាន់​ស៊ីស្កូ ជួយបញ្ជ្រាបអំពីបរិយាកាសវិនិយោគនៅកម្ពុជា ផ្សព្វផ្សាយទៅកាន់បណ្តាញធុរកិច្ច ក៏ដូច​ជាក្នុងសហរដ្ឋអាម៉េរិកទាំងមូល ឱ្យកាន់តែទូលំទូលាយបន្ថែមទៀត។

ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី ២៣ ខែ កញ្ញា ឆ្នាំ២០២៤ បានអញ្ជើញជួបសំណេះសំណាល និងពិភាក្សាការងារជាមួយលោក Chris Larsen បុគ្គលលេចធ្លោ ក្នុងវិស័យឧស្សាហកម្មបច្ចេកវិទ្យា និងជា​សហស្ថាបនិ​ក​ក្រុម​ហ៊ុន​បច្ចេក​វិទ្យាល្បីៗជាច្រើន ព្រមទាំងលោកស្រី Lyna Lam ជាភរិយា ដែលសព្វថ្ងៃត្រូវបានគេស្គាល់ថា ជាសប្បុរសជនចិត្តធម៌មានដើមកំណើតខ្មែរ សញ្ជាតិអាម៉េរិកាំង នៅក្នុងទីក្រុងសាន់ហ្វ្រាន់ស៊ីស្កូ។

នៅក្នុងជំនួបនេះ, ឯកឧត្តមឧបនាយករដ្ឋមន្ត្រី បានសំណូមពរទៅកាន់លោកស្រី Lyna Lam ក្នុងនាមជាជនរួមជាតិ តែមួយ សូមលោកស្រីបន្តជួយបញ្ជ្រាបអំពីវប្បធម៌ប្រពៃណីដ៏ផូរផង់របស់ជាតិយើង ទៅកាន់សហគមន៍ ព្រមទាំងជួយពាំនាំនូវបច្ចុប្បន្នភាពនៃ បរិយាកាសវិនិយោគនៅកម្ពុជា ផ្សព្វផ្សាយទៅកាន់បណ្តាញធុរកិច្ច នៅទីក្រុងសាន់ហ្វ្រាន់ស៊ីស្កូ ក៏ដូចជាក្នុងសហរដ្ឋអាម៉េរិកទាំងមូល ឱ្យកាន់តែទូលំទូលាយបន្ថែមទៀត។

ឆ្លៀតក្នុងឱកាសនោះដែរ, ឯកឧត្តមឧបនាយករដ្ឋមន្ត្រី ក៏បានអញ្ជើញ លោក Chris Larsen និងលោកស្រី Lyna Lam ធ្វើ ទស្សនកិច្ចមកកាន់កម្ពុជា ដើម្បីបានសិក្សាស្វែងយល់បន្ថែមដោយផ្ទាល់ ទៅលើទិដ្ឋភាពទូទៅនៃសង្គម ស្ថានភាពសេដ្ឋកិច្ច បរិយាកាស វិនិយោគ និងសក្តានុពលនានា ដើម្បីបានជាមូលដ្ឋានក្នុងការពិចារណា ពិនិត្យលទ្ធភាព ក្នុងការសម្រេចចិត្តបោះទុនវិនិយោគនាពេល អនាគត ជាពិសេសក្នុងវិស័យឧស្សាហកម្មបច្ចេវិទ្យា ដែលរូបលោក Chris ជាបុគ្គលលេចធ្លោ ប្រកបដោយជំនាញ និងបទពិសោធន៍ ឈានមុខក្នុងវិស័យនេះ។

ឯកឧត្តម ស៊ុន ចាន់ថុល បានបង្ហាញនូវសុទិដ្ឋិនិយមថា តាមរយៈជំនួបនេះ និងទស្សនកិច្ច​ដែលនឹងអាចកើតមាននៅពេលខាងមុខ នឹងធ្វើឱ្យទំនាក់ទំនងរវាងប្រទេសទាំងពីរ កម្ពុជា-អាម៉េរិក កាន់តែមានភាពល្អប្រសើរឡើង ហើយចំនួនវិនិយោគិនអាម៉េរិកនៅកម្ពុជា ក៏នឹងមាន​ការកើន​ឡើងថែមមួយកម្រិតទៀតផងដែរ៕ អត្ថបទ៖ សុន រ៉ាឌី