ព័ត៌មាន

មន្ទីរសាធារណការខេត្តសៀមរាប ផ្អាកការធ្វើចរាចរណ៍លើកំណាត់ផ្លូវមួយចំនួន ក្នុងភូមិសាស្ត្រស្រុកជីក្រែង ជាបណ្តោះអាសន្ន

យោងតាមសេចក្ដីជូនដំណឹងរបស់មន្ទីរសាធារណការ និងដឹកជញ្ជូនខេត្តសៀមរាប បានបង្ហាញ នាថ្ងៃទី២៥ខែកញ្ញាឆ្នាំ២០២៤នេះថា មន្ទីរបានផ្អាកការធ្វើចរាចរណ៍ លើកំណាត់ផ្លូវមួយចំនួន ក្នុងភូមិសាស្ត្រស្រុកជីក្រែង ខេត្តសៀមរាប ជាបណ្តោះអាសន្ន យោងតាមស្ថានភាពជំនន់ទឹកភ្លៀងក្នុងភូមិសាស្ត្រស្រុកជីក្រែង បាននិងកំពុងជន់ឡើងខ្លាំង ធ្វើឱ្យលិចលង់លើកំណាត់ផ្លូវមួយចំនួនដូចជា ផ្លូវខេត្តលេខ ៦២-៣, ២៦៦, ២៦៥, ២៦៥០, ២៩៧១ ដែលបង្កឱ្យមានការព្រួយបារម្ភ។ មន្ទីរសាធារណការ និងដឹកជញ្ជូនខេត្តសៀមរាប សូមធ្វើការផ្អាកការធ្វើចរាចរណ៍ទាំងស្រុង លើកំណាត់ផ្លូវខេត្តលេខ ៦២-៣ (បេងមាលា-ខ្វាវ)ផ្អាកការធ្វើចរាចរណ៍ចំពោះរថយន្តដឹកទំនិញធុនធ្ងន់គ្រប់ប្រភេទ លើកំណាត់ផ្លូវខេត្តលេខ២៦៦ (កំពង់ក្តី-ខ្លាវ), ផ្លូវខេត្តលេខ ២៦៥៧ (កំពង់ក្តី អន្លង់សំណរ), ផ្លូវខេត្តលេខ២៦៥០ (គោកធ្លកក្រោម អន្លង់សំណរ), ផ្លូវខេត្តលេខ ២SR១ (ឃុំស្ពានត្នោត ស្រុកជីក្រែង) ជាបណ្ដោះអាសន្ន រហូតដល់មានការ ជូនដំណឹងសារជាថ្មី៕