ក្រសួងសុខាភិបាល បើកកិច្ចប្រជុំជាមួយប្រតិភូមជ្ឈមណ្ឌលអន្តរជាតិ សម្រាប់ដំណោះស្រាយ​ភាពស៊ាំ​នឹងឱសថប្រឆាំងមេរោគ International Center for Antimicrobial Resistant Solution (ICARS)

ឯកឧត្តមសាស្ត្រាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល និងជាអនុប្រធាន​គណៈកម្មការ​ប្រឹក្សាយោបល់លើគម្រោង “កំណត់ទំហំ និងផែនទី នៃកត្តាជំរុញ និងកត្តាប្រឈមដល់ការអនុវត្តគោលការណ៍ណែនាំជាតិស្តីពី៖ ការគ្រប់គ្រងការប្រើប្រាស់ឱសថប្រឆាំងមេរោគក្នុងប្រព័ន្ធសុខាភិបាលនៅកម្ពុជា” បានជួបពិភាក្សាការងារជាមួយប្រតិភូ មជ្ឈមណ្ឌលអន្តរជាតិសម្រាប់ដំណោះស្រាយភាពស៊ាំនឹងឱសថប្រឆាំងមេរោគ(ICARS), រសៀលថ្ងៃទី២៥ ខែកញ្ញា ឆ្នាំ២០២៤ នៅទីសី្តការក្រសួងសុខាភិបាល។

ក្នុងកិច្ចប្រជុំនេះ ប្រតិភូមជ្ឈមណ្ឌលអន្តរជាតិសម្រាប់ដំណោះស្រាយភាពស៊ាំ នឹងឱសថប្រឆាំងមេរោគ (ICARS) បានជម្រាបជូនអំពីគោលបំណង៖ គឺជាគម្រោងស្រាវជ្រាវតាមបែបអនុវត្ត រួមមានប្រទេសចំនួន២១ចូលរួម ដែលក្នុងនោះមានកម្ពុជាផងដែរ ក្រោមគម្រោងមេ “សុខភាពតែមួយ” ដែលគ្របដណ្តប់ទៅលើសុខភាពមនុស្ស និងសត្វ និងធ្វើការស្រាវជ្រាវមានទិន្នន័យវិទ្យាសាស្រ្ត ដើម្បីកាត់បន្ថយការប្រើប្រាស់ឱសថប្រឆាំងមេរោគមិនសមស្របឱ្យបានត្រឹម ឬក្រោម ២០%។ ជាមួយការគាំទ្រពីក្រសួងសុខាភិបាល គម្រោងស្រាវជ្រាវរបស់ICARSនេះ បានឆ្លងពីរដំណាក់កាលរួចមកហើយ។ បច្ចុប្បន្នចូលដល់ដំណាក់កាលទី៣ ដែលត្រូវរៀបចំគម្រោងលម្អិតបន្ថែមទៀត និងការរៀបចំចុះអនុស្សារណៈ នៃការយោគយល់រវាងក្រសួងសុខាភិបាល និង ICARS ដើម្បី «អនុវត្ត» បន្តរយ:ពេល៣ឆ្នាំទៀត។ គម្រោងនេះនឹងគាំទ្រដល់ការរៀបចំ «និយាមនីតិវិធីប្រតិបត្តិ» ស្តីពីការគ្រប់គ្រងការប្រើប្រាស់ឱសថប្រឆាំងមេរោគ សម្រាប់មូលដ្ឋានសុខាភិបាល ពិសេសមន្ទីរពេទ្យ។

គួរបញ្ជាក់ផងដែរថា កិច្ចប្រជុំនេះមានការអញ្ជើញចូលរួមពីអ្នកជំនាញសុខាភិបាល និងអ្នកជំនាញមកពី តំណាង ICARS លោកបណ្ឌិត Dr. Wesal Zaman លោក ជួប សុខចំរើន នាយកប្រត្តិបត្តិអង្គការ KHANA លោកសាស្រ្តាចារ្យ HSU Ly Yang តំណាងសាកលវិទ្យាល័យជាតិសិង្ហបុរី និងក្រុមការងារគម្រោងស្រាវជ្រាវសរុប ចំនួន១៤នាក់៕ អត្ថបទ រដ្ឋា