ភ្ញៀវអន្តរជាតិនាំគ្នាទស្សនា ពិធីបុណ្យកាន់បិណ្ឌតាមវត្តអារាមនៅរាជធានីភ្នំពេញ

បុណ្យកាន់បិណ្ឌ ភ្ជុំបិណ្ឌ គឺពិធីបុណ្យជាតិធំមួយរបស់ប្រទេសកម្ពុជា ដែលតាមទីវត្តអារាម តែងតែប្រារព្វរៀងរាល់ឆ្នាំរយៈពេល១៥ថ្ងៃ ចាប់ពីថ្ងៃទី១រោច ដល់ថ្ងៃទី១៥រោច ខែភទ្របទ។ បណ្តា​ភ្ញៀវទេសចរអន្តរជាតិ នានា ដែលមកទស្សនាកម្ពុជា ក្នុងអំឡុងពេលនេះ មានការ​ផ្តោត​ចាប់​អារម្មណ៍ខ្លាំង ទស្សនាពិធីបុណ្យនេះ ខណៈមើលឃើញពលរដ្ឋខ្មែរក្មេងចាស់ស្រុះស្រួល​គ្នាល្អ​ប្រកាន់​ខ្ជាប់ប្រពៃណីវប្បធម៌ទៅវត្តបានល្អប្រសើរ។

បណ្តាភ្ញៀវបរទេស បានថ្លែងប្រាប់ BTV នៅថ្ងៃទី២៦ ខែកញ្ញានេះថា នៅក្នុងដំណើរទស្សនា​កម្សាន្ត​រាជធានីភ្នំពេញក្នុងរយៈពេលប៉ុន្មានថ្ងៃ ភ្ញៀវទេសចរអន្តរជាតិទាំងអស់គ្នា បានទស្សនា និង​សិ​ក្សាស្វែងយល់ពិធីបុណ្យកាន់ ភ្ជុំបិណ្ឌនៅតាមបណ្តាអារាមក្នុងរាជធានីភ្នំពេញ ហើយ​ភ្ញៀវបាន​មើលឃើញប្រជាពលរដ្ឋខ្មែរ នាំគ្នាស្លៀកពាក់បែបប្រពៃណីស្អាតបាត មាននាំ​អាហារ​ចង្ហាន់​ប្រគេនព្រះសង្ឈ ក្នុងទឹកមុខញញឹមរាក់ទាក់ ជាមួយនឹងការធ្វើបុណ្យចែកទៀន ជូន​ពលរដ្ឋ​ដទៃ ហើយក៏ជាពិធីបុណ្យមួយដែលមិនធ្លាប់ឃើញនៅប្រទេសផ្សេងៗទៀត។

បើតាម ព្រះទស្សទានមុនី សួន តេង គង់នៅវត្តស្វាយអំពែ មានថេរដីការថា  នៅក្នុងពិធី​កាន់​បិណ្ឌ ក្នុងរយៈពេល៩ថ្ងៃមកនេះ វត្ត បានទទួលភ្ញៀវបរទេសចូលទស្សនាហូរហែរដែរ ក្នុងនោះ មានភ្ញៀវបរទេសខ្លះ ក៏បានចូលរួមធ្វើបុណ្យចែកទានជាមួយនឹងពលរដ្ឋខ្មែរផងដែរ ។

ព្រះសង្ឈ បានមានថេរដីកាទៀតថា វត្តស្វាយអំពែ ក៏ដូចជាវត្តអារាមនានាទៀតនៅទូទាំងប្រទេស គឺបានរៀបចំអភិវឌ្ឍវត្ត ឲ្យក្លាយជាវត្តទេសចរណ៍ និងទាក់ទាញភ្ញៀវបរទេសនានា ចូលទស្សនា និងទទួលយកបទពិសោធន៍ ក្នុងការមកធ្វើបុណ្យកាន់បិណ្ឌ ភ្ជុំបិណ្ឌ និងពិធីបុណ្យបែបសាសនា​នានា​ទៀតជាមួយពលរដ្ឋខ្មែរ៕ អត្ថបទ ស៊ុម សុខជា