ពានសម្ដេចតេជោ-ថ្នាក់ខេត្ត៖ កំពង់ចាម រកបាន ៣ពិន្ទុពេញ ខណៈស្ទឹងត្រែង ស្មើកំពង់ធំ

ក្រុមមន្ទីរអប់រំ យុវជន និងកីឡា ខេត្តកំពង់ចាម បានយកឈ្នះ​ក្រុមម្ចាស់​ផ្ទះ​សមាគម​កីឡា​ខេត្ត​មណ្ឌល​គិរី ៣-០ ក្នុងជំនួបបើកឆាកពូលG នៃពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី១៨ ឆ្នាំ២០២៤/២៥ (ថ្នាក់ខេត្ត) ស្របពេលក្រុមមន្ទីរអប់រំ យុវជន និងកីឡា ខេត្ត​ស្ទឹងត្រែង និងសមាគមកីឡាបាល់ទាត់ខេត្តកំពង់ធំ បានត្រឹមចែកគ្នា ១ពិន្ទុពីការប្រកួតដំបូង ក្នុង​ពូល​F កាលពីល្ងាចថ្ងៃទី២៦ ខែកញ្ញា ឆ្នាំ២០២៤ ។

សម្រាប់​ការប្រកួតនៅទីលានអនុវិទ្យាល័យ ហ៊ុន សែន សែនមនោរម្យក្រុ មមន្ទីរអប់រំ យុវជន និង​កីឡា ខេត្តកំពង់ចាម បានដាក់សម្ពាធលើក្រុមម្ចាស់ផ្ទះ រហូតរកបាន ៣គ្រាប់ជាបន្ដបន្ទាប់ ដែល​ធ្វើ​សម្រេច​ដោយកីឡាករ ជា ណាវីន ២គ្រាប់ នៅនាទី៤០ និងនាទី៤៧ ខណៈ ១គ្រាប់ទៀត រក​បាន​ដោយ​កីឡាករ សុក្រី អ៊ីសាន នៅនាទី៨៣ ខណៈសមាគមកីឡាខេត្តមណ្ឌលគិរី មិនអាច​ទម្លាយ​របាំង​ការពារក្រុមភ្ញៀវបានឡើយ ។

ចំណែកការប្រកួតទីលានសាលាបឋមសិក្សាស្ទឹងត្រែងវិញ បានបញ្ចប់ក្នុងលទ្ធផលស្មើគ្នា ១-១ ។ ជំនួប​ដ៏តានតឹងនេះ ក្រុមម្ចាស់ផ្ទះ មន្ទីរអប់រំ យុវជន និងកីឡា ខេត្តស្ទឹងត្រែង បានបើកការនាំមុខ ១​គ្រាប់មុន នៅវគ្គទី១ ដែលធ្វើសម្រេចដោយកីឡាករ ណាត ភក្ដី នៅនាទី៤១ ។ ប៉ុន្ដែចូលវគ្គទី២ មិន​ទាន់បាន ១០នាទីផង កីឡាករ នន់ មានុត ក៏រកបាន​គ្រាប់​តាម​ស្មើ​ឲ្យ​សមាគម​កីឡា​ខេត្ត​កំពង់ធំ​វិញ នៅនាទី៥៧ ហើយលទ្ធផលនេះ ក៏បានរក្សាដល់ការប្រកួតពេញម៉ោងតែម្ដង ។

ជាមួយ​លទ្ធផលនេះដែរ នាំឲ្យក្រុមមន្ទីរអប់រំ យុវជន និងកីឡា ខេត្តកំពង់ចាម ឡើងឈរ​កំពូល​តារាង​ពូល​G បណ្ដោះអាសន្ន ស្របពេលក្រុមមន្ទីរអប់រំ យុវជន និងកីឡា ខេត្តស្ទឹងត្រែង និង​សមាគម​កីឡាខេត្តកំពង់ធំ បានត្រឹមឈរលេខ១ និងលេខ២ ដោយរកបាន ១ពិន្ទុស្មើគ្នា មុន​បន្ដ​ការ​ប្រកួត​ក្រោយ​សម្រាកក្នុងឱកាសបុណ្យភ្ជុំបិណ្ឌ នាពេលឆាប់ៗខាងមុខ៕ អត្ថបទ លី ឈុនឡា