ប្រជាការពារកំពុងរួមចំណែកថែរក្សាសន្តិសុខ និងអនុវត្តន៍គោលនយោបាយ​ភូមិឃុំមាន​សុវត្ថិភាព​នៅមូលដ្ឋាន

ប្រជាការពារបាននិងកំពុងរួមចំណែកក្នុងការថែរក្សាសុខវត្ថិភាព សណ្តាប់ធ្នាប់ និងចូលរួម​យ៉ាង​សកម្ម​ក្នុងការអនុវត្តនូវគោលនយោបាយភូមិឃុំមានសុវត្ថិភាព នៅតាមមូលដ្ឋាន។

នៅថ្ងៃទី១៩ ខែតុលា ឆ្នាំ២០២៤ ឯកឧត្តម ម៉េង ប៉ូគន្ធ ក្រុមការងារថ្នាក់ជាតិមូលដ្ឋានឃុំរុងរឿង ជួប​សំណេះសំណាល សួរសុខទុក្ខ និងចែកឯកសណ្ឋានប្រជាការពារចំនួន៨១កំផ្លេ ជូន​បង​ប្អូន​ប្រជា​ការពារ នៅក្នុងឃុំរុងរឿង ស្រុកស្ទោង ខេត្តកំពង់ធំ។

ក្នុងឱកាសនោះឯកឧត្តម លើកឡើងថា ប្រជាការពារគឺជាអ្នក ដែលអាចថែរក្សានូវសន្តិសុខ សណ្តាប់​ធ្នាប់សាធារណៈក្នុងមូលដ្ឋានប្រកបដោយប្រសិទ្ធភាព ព្រោះប្រជា ការពារ គឺជា​ប្រជា​ពលរដ្ឋ​ដែល​រស់នៅដោយផ្ទាល់ជាមួយក្រុមគ្រួសារ នៃបងប្អូនក្នុងភូមិ ឃុំ ហើយបាន ដឹង​ច្បាស់​អំពី​ស្ថានភាព មុខរបរ និងការរស់ ដែលស្ថិតនៅជិតបំផុតផងដែរ។ ជាមួយគ្នានេះប្រជាការពារ បានរួមចំណែកផ្តល់នូវដំណឹងមិនប្រក្រតីដែលបានកើតឡើងក្នុងមូលដ្ឋាន មានដូចជា បទ​ល្មើស​គ្រឿង​ងញៀន ក្មេងទំនើង ដែលធ្វើសមត្ថកិច្ចកំណត់មុខសញ្ញា និងបង្ក្រាបបានជាបន្តបន្ទាប់។

ឯកឧត្តម បានធ្វើការកោតសរសើរ និងលើកទឹកចិត្តដល់ប្រជា ការពារទាំងអស់ និងធ្វើការ​គាំនូវ​សកម្មភាព​ដ៏ប្រសើរក្នុងឆន្ទះរួមគ្នាអភិវឌ្ឍន៍ និងការថែរក្សាសន្តិភាព​ក្រោម​ការ​ដឹកនាំ​របស់​រាជ​រដ្ឋាភិបាល​កម្ពុជា និងសូមឲ្យប្រជាការពារ​ព្រម​ទាំង​ប្រជាពលរដ្ឋ​ទាំងអស់​បន្ត​អនុវត្តន៍​គោល​នយោបាយ​ភូមិមានសុវត្ថិភាពក្នុងមូលដ្ឋានជារៀងរហូត។ ជាមួយគ្នានេះប្រជាការពារ បាន​លើក​ដែរ​ថា បើទោះបីជាពួកគាត់មិនមានប្រាក់ខែក្តី ប៉ុន្តែពួកនៅតែ ពេញចិត្ត ស្ម័គ្រចិត្ត​ការពារស​ន្តិសុខ​នៅ​ក្នុង​មូលដ្ឋានរបស់ពួកគាត់ដើម្បីឲ្យ ប្រជាពលរដ្ឋនៅក្នុងភូមិរស់នៅដោយ មិនព្រួយបារម្ភ​ ស្រប​តាម​គោល​នយោបាយរបស់រាជ រដ្ឋាភិបាល។

រាជរដ្ឋាភិបាលកម្ពុជា បានធ្វើការចាត់តាំងចលនាការពាសន្តិសុខមាតុភូមិ ឬហៅថាប្រជាការពារ ក្នុង​គោលដៅពង្រឹងវិធានការរក្សាការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម និង​ធ្វើការអនុវត្តគោលនយោបាយភូមិមានសុវត្ថិភាពប្រកបដោយប្រសិទ្ធភាពកើនឡើងទ្វេរដង ជា​ពិសេស គឺបំផុសនូវស្មារតីស្រឡាញ់ជាតិ មាតុភូមិ របស់ពលរដ្ឋគ្រប់រូបឲ្យចេះសាមគ្គី និង​មាន​មនសិការ​ខ្ពស់ ក្នុងសកម្មភាពចូលរួមអភិវឌ្ឍន៍ និងថែរក្សាសន្តិសុខក្នុងមូលដ្ឋានរៀងៗខ្លួន៕