ពលរដ្ឋខ្មែរជាង ២០០នាក់ ចូលរួមកម្មវិធីច្រូតស្រូវ និងដាល់អំបុកសាមគ្គីនៅជប៉ុន

ស្ថានឯកអគ្គរាជទូតកម្ពុជាប្រចាំប្រទេសជប៉ុន សហការជាមួយក្រុមការងារយុវជន ESEA កាល​ពី​ថ្ងៃ​ទី២០ ខែតុលា ឆ្នាំ២០២៤ បានរៀបចំកម្មវិធីច្រូតស្រូវ និងដាល់អំបុក នៅក្នុងខេត្តកាណាហ្គាវ៉ា ប្រទេស​ជប៉ុន ដើម្បីអបអរសាទរព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក​។

កម្មវិធីនេះ បានប្រារព្ធធ្វើឡើងក្រោមអធិបតីភាព ឯកឧត្តម ទុយ រី ឯកអគ្គរាជ​ទូតក​ម្ពុជា​ប្រចាំ​ប្រទេស​ជប៉ុន និងមានការចូលរួមពីសហគមន៍ខ្មែរ និស្សិត កម្មសិក្សាការី និងពលករជំនាញ​ដែល​កំពុ​ង​ស្នាក់នៅសិក្សា និងធ្វើការនៅប្រទេសជប៉ុនចំនួនសរុបប្រមាណជាង ២០០នាក់។

យោង​តាមក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា កម្មវិធីខាងលើនេះ រៀបចំ​ឡើង​ក្នុង​គោលបំណងចូលរួមអបអរសាទរព្រះរាជពិធីបុណ្យអុំទូក បណ្តែតប្រទីប និងសំពះ​ព្រះ​ខែ អកអំបុក ក៏ដូចជាការរៀបចំព្រឹត្តិការណ៍ដើម្បីជួបជុំបងប្អូនប្រជាពលរដ្ឋខ្មែរដែលកំពុងរស់នៅ សិក្សា និងធ្វើការនៅប្រទេសជប៉ុនទាំងអស់ ព្រមទាំង​លើក​ស្ទួយ​ថែ​រក្សា​វប្បធម៌​ទំនៀម​ទម្លាប់​ដ៏​ប្រពៃ​របស់​កម្ពុជា។

នៅក្នុងកម្មវិធីនេះដែរ ក៏មានរៀបចំនូវកម្មវិធីទៅតាមទំនៀមទម្លាប់សាសនា កម្មវិធីអាហារសាមគ្គី សកម្ម​ភាពច្រូតស្រូវ និងដាល់អំបុក អកអំបុកសាមគ្គី និងការលេងល្បែងប្រជាប្រិយ ប្រកប​ដោយ​បរិយាកាស​ស្និទ្ធស្នាល និងរីករាយក្នុងនាមជាមហាគ្រួសារខ្មែរ៕