សម្តេចធិបតីផ្តាំទៅបុគ្គល ជេម សុខ កុំវិភាគតាមអារម្មណ៍គប្បីវិភាគ ដោយយកព័ត៌មានឲ្យបានគ្រប់ជ្រុងជ្រោយ

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានផ្តាំទៅកាន់បុគ្គល ជេម សុខ កុំធ្វើការ​វិភាគ​ទៅតាមរម្មណ៍របស់ខ្លួន គប្បីរៀនវិភាគតាមវិទ្យាសាស្រ្តវិញ ដោយការវិភាគ និងការរិះគន់​ដល់រាជរដ្ឋាភិបាលអាណត្តិទី៧ ពីសំណាក់បុគ្គលរូបនេះ នាពេលកន្លងមកថា រាជរដ្ឋាភិបាលគ្មាន​ធ្វើអ្វីនោះ គឺទទួលបានព័ត៌មានមិនគ្រប់ជ្រុងជ្រោយ ខណៈការដឹកនាំ​របស់​រាជរដ្ឋាភិបាល​អាណត្តិថ្មីរយៈពេល១៥ខែមកនេះ សម្រេចបាននូវសមិទ្ធផលទាំងតូចទាំងធំគួរឲ្យកត់សម្គាល់។

ក្នុងឱកាសអញ្ជើញចូលរួមពិធីសម្ពោធវិថីតេជោសន្តិភាព ឆ្នេរអង្កោល នៅខេត្តកែប នៅព្រឹកថ្ងៃទី ១១ ខែវិច្ឆិកា ឆ្នាំ២០២៤នេះ សម្តេចធិបតី ហ៊ុន ម៉ាណែត បានផ្តាំទៅបុគ្គល ជេម សុខ ឲ្យមក​ស្រុកខ្មែរ ​ដើម្បីមើលការអភិវឌ្ឍស្រុកខ្មែរដោយផ្ទាល់ុំធ្វើការវិភាគតាមអារម្មណ៍ ហើយសម្តេច​ប្រកាស​ស្វាគមន៍ ​និងធានានូវសុវត្ថិភាពដល់បុគ្គលរូបនេះពេលមកដល់ស្រុកខ្មែរថា​នឹងគ្មានការ​ចាប់ចង​អ្វីនោះទេ​ ថែមទាំង​អនុញ្ញាត​ឲ្យ​ទៅជួបរដ្ឋមន្រ្តីទាំងអស់​ ក្នុងជួររាជរដ្ឋាភិបាលផងដែរ ដើម្បី​សិក្សាស្វែងយល់​ និងស្រង់ព័ត៌មានពិត ​និងច្បាស់លាស់បន្ថែមទៀតនោះ។

យ៉ាងណាក៏ដោយសម្តេចធិបតី ហ៊ុន ម៉ាណែត ​បានលើកឡើងផងដែរថា​ ក្នុងនាមសម្តេចផ្ទាល់ក៏ ដូចជា​រាជរដ្ឋាភិបាល​ សម្តេចប្រកាស​ទទួល​ស្វាគមន៍​ចំពោះការរិះគន់ និង​ការវិភាគ​របស់បុគ្គល​ទាំង​ឡាយណា ​ដែលរិះគន់ដើម្បីស្ថាបនា​ ពុំមែនរិះគន់​តាមអារម្មណ៍ ​និង​ចោទប្រកាន់​ដោយគ្មាន​មូលដ្ឋាន​ច្បាស់​លាស់​ដើម្បី​តែគេងចំណេញ​នយោបាយនោះឡើយ៕ អត្ថបទ បាន ចក់