ក្រុមកីឡាការិនីត្រៀមខ្លួនរួចរាល់សម្រាប់ការចូលរួមប្រណាំងទូកងថ្នាក់រាជធានីនៅថ្ងៃស្អែកនេះ

ក្រុមកីឡាការនី ត្រៀមខ្លួនរួចរាល់ សម្រាប់ការចូលរួមប្រណាំងទូកងថ្នាក់រាជធានី ដែល​នឹង​ប្រព្រឹត្តិ​ទៅ​នៅថ្ងៃទី១២ ខែវិច្ឆិកា ឆ្នាំ២០២៤ស្អែកនេះ។

ទូកង «សំហេងមហាសែនតេជោ បារមីសារវ័នតេជោ» ជាទូករបស់ថ្នាក់រដ្ឋបាលខណ្ឌបឹងកេងកង ក្រោម​ការឧបត្ថម្ភទាំងស្រុងរបស់ឯកឧត្តម អ៊ិត សំហេង ប្រធានក្រុម​ការងារ​គណបក្ស​ប្រជាជន​កម្ពុជា ចុះជួយខណ្ឌបឹងកេងកង។

ក្រុម​កីឡាការិនី ទូកង ខាងលើនេះ បង្ហាញក្តីរំភើបរីករាយ ក្នុងនាមជានារីភេទ ដែល​បាន​ចូល​រួម​ក្នុង​ការ​ប្រណាំង​ទូកថ្នាក់រាជធានីនេះ។ ក្រុមកីឡាការិនីបញ្ជាក់​ថា​ពួក​គេ​បាន​ត្រៀម​ខ្លួន​រួច​រាល់​១០០​ភាគ​រយហើយ សម្រាប់ការប្រកួតយកជ័យជម្នះ ក្នុងការប្រណាំងទូក​ថ្នាក់​រាជ​ធានី​នៅ​ថ្ងៃ​ស្អែក​នេះ និងបន្តឡើងទៅប្រកួតថ្នាក់ជាតិនៅថ្ងៃទី១៤ ខាងមុខ ។

នៅព្រឹកថ្ងៃទី១១ ខែវិច្ឆិកា ឆ្នាំ២០២៤នេះ លោក សុខ សម្បត្តិ អភិបាលខណ្ឌបឹងកេងកង បាន​ដឹក​នាំ​មន្ត្រី ចុះសំណេះសំណាល ជាមួយបងប្អូនក្រុមកីឡាការិនីនៅវត្តសារាវ័ន ដើម្បីជា​ការ​លើក​ទឹក​ចិត្ត និងកម្លាំងចិត្តដល់ពួកគាត់ ឱ្យមានភាពស្វាហាប់ ប្រកួតយក​ជ័យ​ជម្នះ​នៅ​ថ្ងៃ​ប្រកួត​ទាំង​ថ្នាក់​រាជ​ធានី និងថ្នាក់ជាតិ ។ ការសំណេះសំណាលនោះ ក៏បានឧបត្ថម្ភនូវគ្រឿងបរិភោគ , ភេសជ្ជៈ ក៏ដូចជាថវិការមួយចំនួនដល់ក្រុមកីឡាការិនីផងដែរ។

សូមបញ្ជាក់ថានៅក្នុងខណ្ឌបឹងកេងកង គឺមានទូកងចំនួន២ ដែលនឹងត្រៀម​ចូល​រួម​ក្នុង​ការ​ប្រណាំង​ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែអកអំបុក ក្នុងឆ្នាំ២០២៤នេះ ដែល​ជាទូក ង ក្រោមការផ្តួចផ្តើម និងឧបត្ថម្ភទាំងស្រុង របស់ឯកឧត្តមបណ្ឌិត អ៊ិត សំហេង៕ អត្ថបទ៖ លីហេង