សម្តេចធិបតី៖ រដ្ឋកំពុងសិក្សាធ្វើផ្លូវជិះកង់តាមមាត់សមុទ្រពីខេត្តកែប ទៅខេត្តកោះកុង

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកាសថា រាជរដ្ឋាភិបាល បានកំពុងធ្វើការសិក្សាលើកគម្រោង ធ្វើផ្លូវជិះកង់នៅតាមមាត់សមុទ្រ ដោយចាប់ពីខេត្តកែប ដល់ខេត្តកោះកុង ដើម្បីធ្វើយ៉ាងណាបង្កលក្ខណៈងាយស្រួលបន្ថែមទៀត ដល់ភ្ញៀវទេសចរជាតិ និងអន្តរជាតិដែលចង់ជិះកង់កម្សាន្ត​​ គយគន់​តាមមាត់​សមុទ្រនោះ។

ក្នុងឱកាសអញ្ជើញចូលរួមពិធីសម្ពោធ«វិថីតេជោសន្តិភាពឆ្នេរអង្កោលមានប្រវែងសរុប​១២.៦៤៥ ម៉ែត្រ» នៅខេត្តកែប នាព្រឹកថ្ងៃទី១១ ខែវិច្ឆិកា ​ ឆ្នាំ២០២៤នេះសម្តេចនាយករដ្ឋមន្រ្តី ហ៊ុន ម៉ាណែត បានលើកឡើងថា ​តាមផែនការរបស់ឯកឧត្តម សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ គ្រោងរៀបចំផ្លូវជិះកង់ ផ្លូវរត់ តភ្ជាប់ ​ខេត្តនៅមាត់សមុទ្រ ​ដោយ​ថ្ងៃក្រោយ​ អ្នកអាចជិះកង់ពីខេត្តកែប រហូតដល់កោះកុងតាមមាត់សមុទ្រ បើតាមគម្រោងដែលកំពុងសិក្សានោះ។

សម្តេចធិបតីនាយករដ្ឋមន្រ្តីនៃកម្ពុជា ​ក៏បានណែនាំឲ្យមន្រ្តីពាក់ព័ន្ធ ​ត្រូវ​ិនិ្យ​ឱ្យបាន​ហ្មត់ចត់​លើ​គម្រោងនេះ (ផ្លូវជិះកង់) ​ដើម្បីធានាឱ្យការអនុវត្តបានជោគជ័យ ខណៈខេត្តជាប់មាត់សមុទ្រទាំង៤ របស់កម្ពុជានេះ ​មាន​សក្តានុពល​ទេសចរច្រើន ​ហើយ​ការអភិវឌ្ឍ​ហេដ្ឋារចនាសម្ព័ន្ធបែបនេះ​មិនត្រឹមតែជួយដល់លើកកម្ពស់សេដ្ឋកិច្ចក្នុងស្រុកតាមរយៈការជិះកង់​ប៉ុណ្ណោះទេ ថែមទាំង​ជួយលើកកម្ពស់សុខភាព ​និង​សុខុមាលភាព​ដល់ប្រជាពលរដ្ឋ ​និងភ្ញៀវទេសចរណ៍ផងដែរ។

ជាមួយគ្នានោះដែរ ​សម្តេចធិបតី នាយករដ្ឋមន្រ្តី ក៏បានលើកឡើងផងដែរថា «វិថីតេជោសន្តិភាព​ឆ្នេរអង្កោល» គឺជាខ្សែផ្លូវទេសចរណ៍ស្របមាត់ទឹកសមុទ្ររបស់ខេត្តកែប ហើយវាបាន​និងកំពុង​ដើរតួនាទី យ៉ាងសំខាន់ក្នុងការសម្រួលចរាចរណ៍ដឹកជញ្ជូន ​និងការធ្វើដំណើរផ្សេងៗ​របស់​ប្រជាពលរដ្ឋ​រាប់ពាន់គ្រួសារសម្រាប់ខេត្តនេះ​ ហើយមិនតែប៉ុណ្ណោះវិថីនេះ ក៏មានការរៀបចំ​ផ្លូវជិះកង់ ​និងផ្លូវ​ថ្មើរជើង​ប្រកបដោយ​សោភ័ណភាព ​និង​ផាសុកភាព​ផងដែរ ខណៈការ​ធ្វើនេះ​គឺសុទ្ធតែជាការទាក់ទាញ​ទេសចរជាតិ​ និង​អន្តរជាតិឱ្យ​មកកម្សាន្ត លំហែកាយ​នៅខេត្តកែប​កាន់តែច្រើនឡើង​បន្ថែមទៀតនោះ៕ អត្ថបទបាន ចក់