កីឡាកាយសម្ព័ន្ធ បន្ដបញ្ជ្រាបចំណេះដឹងថ្មីៗ ដល់គ្រូជំនាញ ដើម្បីពង្រឹង និងពង្រីកការអភិវឌ្ឍ

សហព័ន្ធកីឡាកាយសម្ព័ន្ធកម្ពុជា បានរៀបចំវគ្គបណ្ដុះបណ្ដាល គ្រូជំនួញអាអេរ៉ូប៊ិកកម្រិត១ ឆ្នាំ២០២៤ នៅខេត្តកំពង់ឆ្នាំង ចាប់ពីថ្ងៃទី១៧ ដល់ថ្ងៃទី២១ ខែវិច្ឆិកា ដើម្បីបញ្ជ្រាប​ចំណេះ​ដឹង​ថ្មី​ៗ ក្នុងន័យពង្រឹង និងពង្រីកការអភិវឌ្ឍវិស័យកីឡាអូឡាំពិកនេះឲ្យកាន់តែរីកចម្រើន ។

វគ្គ​បណ្ដុះបណ្ដាលនេះ មានសិក្ខាកាមចូលរួមចំនួន ២២នាក់ មកពីបណ្ដាលរាជធានី-ខេត្ត​មួយ​ចំនួន ដែលបង្រៀនដោយគ្រូឧទ្ទេសឯកឧត្តម ណយ ផាណា អគ្គលេខាធិការសហព័ន្ធ និងជា​គ្រូ​បង្វឹក​ក្រុម​ជម្រើសជាតិកម្ពុជា និងកញ្ញា សោ សុគី គ្រូជំនួយក្រុមជម្រើសជាតិ ។

តាមការបញ្ជាក់របស់ឯកឧត្តម ណយ ផាណា វគ្គបណ្ដុះបណ្ដាលនេះ ផ្ដោតលើ ៣ចំណុច​សំខាន់​ៗ ស្ដីពី ១- វគ្គបណ្ដុះបណ្ដាលគ្រូជំនាញកីឡាកាយសម្ព័ន្ធអាអេរ៉ូប៊ិកកម្រិត១, ២-ការ​អភិវឌ្ឍ​កីឡា​កាយ​សម្ព័ន្ធ​ថ្នាក់ជាតិ+ការបោះជុំរំហ្វឹកហាត់ និងទី៣-ការកំណត់អត្តសញ្ញាណកីឡាទេពកោសល្យ ។

ឯកឧត្តមបន្ដថា វគ្គនេះរៀបចំឡើង ដើម្បីរក្សានូវការបញ្ជរាបណេះជំនាញថ្មីៗ ពង្រីក និង​ពង្រឹង​សមត្ថភាព​បច្ចេកទេសទៅគ្រូបង្វឹកកីឡាជំនាញមួយនេះឲ្យមានការយល់ដឹងច្បាស់ថាខ្លួន គឺជា​បន្ទាត់​សម្រាប់​តម្រង់ទិសលើការអភិវត្តប្រភេទកីឡាកាយសម្ព័ន្ធ ទៅតាមកម្រិត​អាយុ​របស់​កីឡាករ កីឡាករិនី។

មួយវិញទៀត វគ្គនេះបានសង្កត់ធ្ងន់ឲ្យគ្រូបង្វឹកទាំងអស់ ទទួលបាន​ការ​យល់​អំពី​ការ​ជ្រើស​រើស​កីឡាករ​-កីឡាការិនី វ័យក្មេងតាមតាមផែនការ និងគោលការណ៍ នៃការកំណត់​អត្ត​សញ្ញាណ​ទេពកោសល្យ កីឡាវ័យផងដេរ ។

គួរដឹងថា វគ្គបណ្ដុះណ្ដាលប្រចាំឆ្នាំនេះ រៀបចំឡើងក្រោមគម្រោងថវិការបស់ក្រសួងអប៎រំ យុវជន និង​កីឡា ដើម្បីពន្លឿនការអភិវត្តលើធនធានមនុស្ស ៕ អត្ថបទ៖ លី ឈុនឡា