បញ្ហាសន្តិសុខ និងអគ្គិភ័យនៅផ្សារទួលទំពូង ត្រូវបានត្រៀមធានាសុវត្ថិភាពយ៉ាងប្រសើរល្អ ក្នុងឱកាសបុណ្យចូលឆ្នាំចិន-វៀតណាម

កិច្ចការងារធានាសន្តិសុខសុវត្ថិភាព ពិសេសការបង្ការលើបញ្ហាអគ្គិភ័យនៅក្នុងផ្សារទួលទំពូង ត្រូវបានគិតគូរយកចិត្តទុកដាក់បានយ៉ាងល្អប្រសើរ ពីសំណាក់ក្រុមគណៈកម្មាការគ្រប់គ្រងផ្សារទាំងមូល ក្នុងឱកាសបុណ្យចូលឆ្នាំប្រពៃណីចិន-វៀតណាម នេះ ។

លោកចំរើន សុខលីម ប្រធានគណៈកម្មការគ្រប់គ្រងផ្សារទួលទំពូង បានប្រាប់ BTVឱ្យដឹងថា  ដោយអនុវត្តទៅតាមគោលការណ៍នាំដ៏ខ្ពង់ខ្ពស់របស់ឯកឧត្តមឃួង ស្រេង អភិបាលរាជធានីភ្នំពេញ និងគណៈបញ្ជាការឯកភាពរដ្ឋបាលខណ្ឌចំការមន គណៈកម្មការផ្សារបានយកចិត្តទុកដាក់ខ្ពស់ លើការលក់ដូររបស់បងប្អូនអាជីវករនៅទូទាំងផ្សា ដោយបានពិនិត្យ និងចុះណែនាំមិនឱ្យមានការលក់ដូរ ឬចែកចាយគ្រឿងផ្ទុះ មានដូចជាផាវ ឬកាំជ្រួចនោះឡើយ ។

បន្ថែមពីលើការហាមប្រាមខាងលើហើយនោះ គណៈគ្រប់គ្រងផ្សារ ក៏បានចុះប់រំណែនាំជាប្រចាំ និងជារឿយៗដល់បណ្តាអាជីវករ សូមប្រុងប្រយ័ត្ន និងបង្ការឱ្យបានខ្ពស់បំផុតលើបញ្ហាអគ្គិភ័យ ដោយសូមពន្លត់ទៀនធូប និងបិទកុងតាក់ភ្លើងឱ្យបានរួចរាល់មុនពេលចាកចេញពីតូបទៅកាន់លំនៅឋាន ឬទៅដើរលេងកម្សាន្តតាមតំបន់នានា ក្នុងឱកាសបុណ្យចូលឆ្នាំចិននេះ ។

ទាក់ទងបញ្ហាអគ្គិភ័យនេះដែល បច្ចុប្បន្នផ្សារបានត្រៀមបំពង់អគ្គិភ័យសរុបជាង៥០០បំពង់ ហើយបំពង់អគ្គិភ័យទាំងអស់ បានពង្រាយទៅតាមតូបលក់ដូរ និងបានដាក់នៅចំណុចកណ្តាលនៅតំបន់សម្ខាន់ៗ ដើម្បីអាចឱ្យបងប្អូនអាជីវករ យកប្រើប្រាស់បានក្នុងការបាញ់ពន្លត់បឋម ប្រសិនកើតមានគ្រោះអគ្គិភ័យជាយថាហេតុណាមួយឡើងមកនោះ ។

លោកប្រធានផ្សារបន្តថា ស្ថានភាពទូទៅ ក្នុងរយៈពេលប៉ុន្មានថ្ងៃក្រោយមកនេះ ពិសេសនៅថ្ងៃទី២៧ ខែមករា ឆ្នាំ២០២៥នេះ គឺមានបងប្អូនប្រជាពលរដ្ឋជាច្រើនបានអញ្ចើញមកផ្សារ ដើម្បីទិញម្ហូបអាហារ និងសម្ភារៈផ្សេងៗ មានដូចជាទៀនធូប និងក្រដាសសែនជាដើម ដើម្បីត្រៀមសែនចូលឆ្នាំ តាមប្រពៃណីចិន នៅថ្ងៃ២៨ ស្អែកនេះ ។

លោកបានបញ្ជាក់ថា ថ្ងៃបុណ្យចូលឆ្នាំចិនរៀងរាល់ឆ្នាំ គឺផ្សារមានសភាពស្ងាត់ហើយ ព្រោះបងប្អូនអាជីវករ សុទ្ធតែកូនខ្មែរខ្សែស្រឡាយកាត់ចិន អញ្ចឹងហើយនៅថ្ងៃសែន ពួកគាត់លក់ដូរតែមួយព្រឹកប៉ុណ្ណោះ ហើយចាប់ពីថ្ងៃសែនទៅ អាជីវករភាគច្រើននឹងបិទទ្វារលក់ដូរ ដើម្បីប្រើប្រាស់ពេលវេលាផ្ទាល់ខ្លួនជួបជុំសាច់ញាតិក្រុមគ្រួសារ ឬធ្វើដំណើរទៅដើរលេងកម្សាន្តនៅទីជិតទីឆ្ងាយនានា ជាដើម ។

ប៉ុន្តែបើទោះបីជាយ៉ាងណា ក្នុងរយៈពេលពេញ០៤ថ្ងៃ នៃបុណ្យចូលឆ្នាំចិននេះ ក្រុមការងារគណៈកម្មការគ្រប់គ្រងផ្សារ ក៏មានក្រុមប្រចាំការជានិច្ច ដើម្បីការពារសន្តិសុខ និងសុវត្ថិភាពនៅក្នុង និងក្រៅបរិវេណផ្សារ មិនឱ្យមានអំពើ ឬបញ្ហាអសន្តិសុខណាមួយអាចកើតឡើងនោះឡើយ ៕ លីហេង