ស្ថាប័នជំនាញ៖ កម្ពុជាចាប់ផ្ដើមមានខ្យល់ស្អាតឡើងវិញហើយ ក្រោយរងការបំពុលប៉ុន្មានថ្ងៃមកនេះ

ភ្នំពេញ ៖ ក្រោយរងការបំពុលប៉ុន្មានថ្ងៃកន្លងមកនេះ ស្ថានភាពខ្យល់នៅកម្ពុជាបានវិលមករកប្រក្រតីភាពឡើងវិញហើយ។ ទិន្នន័យដែលបង្ហាញដោយស្ថាប័នជំនាញឱ្យដឹងថា នៅទូទាំងកម្ពុជាស្ថានភាពខ្យល់ បានឈានដល់កម្រិតល្អណាស់ និងល្អ នៅទូទាំងប្រទេស។

ចាប់ពីម៉ោង ២ រសៀលនៃថ្ងៃទី២៧ ខែមករា ឆ្នាំ២០២៥ មក កំហាប់ភាគល្អិតនិចលនៅកម្ពុជាគិតជាមធ្យមស្មើនឹង ១៤.៨៩ µg/m3 ធៀបនឹងស្តង់ដា ៥០ ug/m3 ។ តួលេខនេះបញ្ជាក់ឱ្យឃើញថា គុណភាពខ្យល់នៅកម្ពុជាគឺល្អណាស់។ នេះបើតាមសេចក្ដីជូនដំណឹងរបស់ក្រសួងបរិស្ថាន ដែលបានផ្សព្វ ផ្សាយឱ្យដឹងនៅល្ងាចថ្ងៃទី២៧ មករានេះ។

អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន ឯកឧត្ដម ខ្វៃ អាទិត្យា ក៏បានបញ្ជាក់ផងដែរថា ក្រោយមានការបំពុលខ្យល់ ដែលបង្កឡើងដោយកត្តាមនុស្ស និងកត្តាធម្មជាតិមួយចំនួន នៅថ្ងៃនេះ គុណភាពខ្យល់នៅកម្ពុជាបានវិលមករកភាពប្រក្រតីវិញហើយ។

ទិន្នន័យដែលបានផ្សព្វផ្សាយដោយក្រសួងបរិស្ថាននៅថ្ងៃនេះបានបង្ហាញឱ្យឃើញថា នៅគ្រប់ ២៥ រាជធានី/ខេត្ត គុណភាពខ្យល់បានវិលមករកកម្រិតល្អណាស់ និងល្អនៅទូទាំងប្រទេស។

ប៉ុន្មានថ្ងៃកន្លងមកនេះ កម្ពុជាក៏ដូចជាបណ្ដាប្រទេសក្នុងតំបន់ជាច្រើនបានរងឥទ្ធិពលខ្យល់ពុលជាច្រើនថ្ងៃ ក្នុងនោះប្រទេសខ្លះបានឈានដល់បិទសាលារៀនថែមទៀត ដោយសារស្ថានភាពខ្យល់ពុលធ្ងន់ធ្ងរ។

អ្នកនាំពាក្យក្រសួងបរិស្ថាន ឯកឧត្ដម ខ្វៃ អាទិត្យា ក៏បានអំពាវនាវដល់សាធារណជនសូមចូលទៅកាន់គេហទំព័រ ឬដោនឡូតយក App ផ្លូវការរបស់ក្រសួង ដើម្បីតាមដានគុណភាពខ្យល់នៅកម្ពុជាផងដែរ ដើម្បីបញ្ជៀសការទទួលបានព័ត៌មានមិនពិត ឬព័ត៌មានចេញដោយស្ថាប័នមិនផ្លូវការណាមួយ៕

ដោយ៖ គង់ ឌិន