ក្រសួងឧស្សាហកម្មរៀបចំវិធានការ ដើម្បីកាត់បន្ថយការរំខានដល់សេវាទឹកស្អាតក្នុងរដូវប្រាំង

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បើកកិច្ចប្រជុំពិភាក្សារៀបចំផែនការធានាប្រភពទឹកដែលចាំបាច់ សម្រាប់ផលិតកម្មទឹកស្អាតនៅទូទាំងប្រទេស និងកាត់បន្ថយការរំខាន ដល់ការផ្គត់ផ្គង់ទឹកស្អាតនៅចុងរដូវប្រាំងខាងមុខ។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងនៅក្នុងកិច្ចប្រជុំពិភាក្សា ដើម្បីរៀបចំផែនការធានាប្រភពទឹក ដែលចាំបាច់សម្រាប់ផលិតកម្មទឹកស្អាតនៅទូទាំងប្រទេស នៅថ្ងៃទី ២៧ ខែ មករា ឆ្នាំ ២០២៥ នេះថា ជុំវិញបញ្ហាទឹកស្អាតនេះ យើងត្រូវប្រកាន់យកអភិក្រមដែលមានវិធានច្បាស់លាស់ ដើម្បីកំណត់តំបន់អាចហានិភ័យប្រភពទឹក មុននឹងបញ្ហាខ្វះទឹកអាចឈានចូលមកដល់ ដោយផ្លាស់ប្តូរវិធីសាស្ត្រពីការដោះស្រាយបញ្ហាមួយករណីម្តងៗ។ ការផ្លាស់ប្តូរជាយុទ្ធ សាស្ត្រនេះ គឺដើម្បីបង្កើតយន្តការផ្លូវការទៀងទាត់ និងជាសមូហភាពមួយ ដើម្បីដោះស្រាយបញ្ហាប្រភពទឹក សម្រាប់និរន្តរភាពសេវា ផ្គត់ផ្គង់ទឹកស្អាត ក្នុងបរិបទនៃការវិវត្តជឿនលឿនយ៉ាងឆាប់រហ័សផ្នែកបច្ចេកវិទ្យា។

ឯកឧត្តមរដ្ឋមន្ត្រី ក៏បានរំលេចអំពីហានិភ័យ ដែលបង្កដោយការអស់ទឹកពីប្រភពទឹក ក្នុងករណីភាពរាំងស្ងួតអូសបន្លាយរយៈ ពេលវែង ព្រមទាំងការប្រជែងក្នុងការប្រើប្រាស់ទឹកសម្រាប់គោលបំណងផ្សេងៗ ព្រមទាំងបានលើកឡើងពីភាពចាំបាច់នៃកិច្ច សហការរវាងរដ្ឋាករទឹក ប្រតិបត្តិករទឹកស្អាតឯកជន មន្ទីរពាក់ព័ន្ធក្រោមរដ្ឋបាលខេត្ត និងអាជ្ញាធរមូលដ្ឋាន ដើម្បីធានាការប្រើប្រាស់ ប្រភពទឹកប្រកបដោយប្រសិទ្ធភាព និងនិរន្តរភាព និងជួយ គ្នាដោះស្រាយពេលមានវិបត្តិ៕ អត្ថបទ៖ សុន រ៉ាឌី