កំណាត់ផ្លូវប្រវែង ១ ៧៦០ម៉ែត្រ នៅបរិវេណប្រាសាទសំបូរព្រៃគុក ត្រូវបានបើកការដ្ឋានសាងសង់ជាផ្លូវ DBST

កំពង់ធំ៖ កំណាត់ផ្លូវប្រវែង១ ៧៦០ម៉ែត្រ នៅបរិវេណប្រាសាទសំបូរព្រៃគុក ត្រូវបានបើកការដ្ឋានសាងសង់ជាផ្លូវ កៅស៊ូ DBST ដើម្បីបង្កើនភាពទាក់ទាញ និងផ្តល់ផលងាយស្រួលដល់ភ្ញៀវទេសចរណ៍ជាតិ និងអន្តរជាតិ។

នៅថ្ងៃទី២៨ ខែមករា ឆ្នាំ២០២៥ ឯកឧត្តមបណ្ឌិត ថោង ខុន ទេសរដ្ឋមន្ត្រីទទួលបេសកកម្មពិសេស របស់រាជរដ្ឋាភិបាលកម្ពុជា អញ្ជើញជាអធិបតីក្នុងពិធីបើកការដ្ឋានសាងសង់ផ្លូវកៅស៊ូ DBST នៅតំបន់​រមណីយដ្ឋាន​ប្រាសាទបេតិកភណ្ឌពិភពលោកសំបូរព្រៃគុក។

ក្នុងឱកានោះឯកឧត្ដម នួន ផារ័ត្ន អភិបាលខេត្តកំពង់ធំ បានលើកឡើងថា កំណត់ផ្លូវឆ្លងកាត់​ប្រាសាទ​សំបូរព្រៃគុក ដែលមានប្រវែង១៨០០ម៉ែត្រ បច្ចុប្បន្ន ជាផ្លូវក្រាល​គ្រួសក្រហម និង​មានធូលីដី​ហ៊ុយប៉ះពាល់ដល់ការធ្វើរបស់ប្រជាពលរដ្ឋ និងភ្ញៀវទេសចរណ៍ ។ ឥឡូវនេះ អាជ្ញាធរ​ជាតិប្រាសាទសំបូរព្រៃគុក ក្នុងនាមរាជរដ្ឋាភិបាលកម្ពុជា បានឆ្លងកិច្ចប្រជុំពី អាយ ស៊ី ស៊ី (ICC) សម្រេចអនុញ្ញាតឲ្យសាងសង់ឡើងវិញនូវផ្លូវកៅស៊ូ ប្រភេទ DBST មានប្រវែងសរុប ​១៧៦០ម៉ែត្រ ទទឹង៦ម៉ែត្រ ​មានចិញ្ចើមផ្លូវក្រាលលក្បាយក្រួសក្រហម ម្ខាងៗប្រវែង ១ម៉ែត្រ, មានសំណង់លូមូល ចំនួន៤កន្លែង រយៈពេលសាងសង់ចំនួន៦ខែ ដែលស្ថាបនាដោយកងវិស្វកម្ម នៃក្រសួងការពារជាតិ។

ជាមួយគ្នានេះ ឯកឧត្តម បណ្ឌិត ថោង ខុន ​ទេសរដ្ឋមន្ត្រីទទួលបេសកកម្មពិសេស របស់​រាជរដ្ឋាភិបាល​កម្ពុជា បានលើកឡើងថា ការសាងសង់ផ្លូវមួយខ្សែនៅក្នុងបរិវេណ​ប្រាសាទបេតិកភណ្ឌពិភពលោកសំបូរព្រៃគុក គឺត្រូវបានអនុញ្ញាតដោយ​គណៈកម្មាធិការ​សម្បត្តិបេតិកភណ្ឌពិភពលោក ព្រោះប្រាសាទសំបូរព្រៃគុក ជា​សម្បត្តិរួមរបស់មនុស្ស​ជាតិទូទាំង​ពិភលោក បានដឹង និងទទួលស្គាល់ ​ទាំងសោភណ្ឌភាព វប្បធម៌ និងអរិយធម៌ របស់ដូនតាខ្មែរ ដែលបានបន្សល់ទុកដល់កូនខ្មែរ ជំនាន់ក្រោយ។ ការធ្វើការសាងសង់នេះ គឺនឹងផ្តល់នូវ​សោភណ្ឌភាព​កាន់តែស្រស់ស្អាតបន្ថែមមួយកម្រឹតទៀត ​ដល់បរិវេណប្រាសាទ ផ្តល់ភាព​ងាយស្រួលក្នុងការធ្វើដំណើររបស់ភ្ញៀវទេសចរណ៍ជាតិ និងអន្តរជាតិ ព្រមទាំងមានភាពទាញ​ភ្ញៀវទេសចរណ៍ឲ្យកាន់តែកើនឡើងច្រើនជាងមុនបន្ថែមទៀត។ ផ្លូវនេះ ក៏ជាការតភ្ជាប់ កាន់​តែងាយស្រួលដល់ប្រជាពលរដ្ឋរស់នៅភូមិអូរគ្រូកែ ​ទៅកាន់ឃុំសំបូរ ដែលជាប្រយោជន៍ សម្រាប់ប្រជាពលរដ្ឋនៅមូលដ្ឋានប្រើប្រាស់ជាប្រចាំផងដែរ។

ឯកឧត្តមបន្ថែមថា ​ការក៏កើតនៃសមិទ្ធផល ទាំងអស់នេះ គឺសារប្រទេសកម្ពុជារក្សាបាននូវ​ស្ថេរភាព​នយោបាយ ធ្វើប្រទេសជាតិរក្សាបាននូវសុខសន្តិភាព ​និងការអភិវឌ្ឍគ្រប់វិស័យ ទាំងប្រព័ន្ធ​ហេដ្ឋារចនាសម្ព័ន្ធ វិស័យអប់រំ កិច្ចការបរទេស ធ្វើឲ្យប្រទេសនៅក្នុងតំបន់អាស៊ាន និងប្រទេស​ផ្សេងទៀតនៅ​លើ​ពិភពលោកងាកមកចាប់អារម្មណ៍ វិនិយោគ ​ផ្នែកកសិកម្ម ​ឧស្សាហ៍កម្ម ពាណិជ្ជកម្មផងដែរ៕