ពលរដ្ឋរីករាយ ដែលស្ពានអាកាសភ្លោះសម្តេចបវរធិបតីពីរខែទៀតនឹងដាក់ដំណើរការ

ភ្នំពេញ ៖ បណ្តាពលរដ្ឋ បង្ហាញក្តីរីករាយ ខណៈគម្រោងសាងសង់ស្ពានអាកាសភ្លោះ«សម្តេចមហាបវរធិបតី» កំពុងពន្លឿនសាងសង់ស្ពានទី១ តភ្ជាប់ពីមហាវិថីសម្តេច ហ៊ុន សែន ទៅអាកាសយានដ្ឋានអន្តរជាតិតេជោ ឲ្យហើយ នៅមុនខែមេសា ឆ្នាំ២០២៥ និងបញ្ចប់គម្រោងទាំងមូលនៅខែមិថុនាឆ្នាំ២០២៥។

​ពលរដ្ឋថ្លែងប្រាប់BTV នៅថ្ងៃទី៣០ ខែមករានេះថា បច្ចុប្បន្ន នៅក្នុងរាជធានីភ្នំពេញ និងនៅជាយរាជធានីភ្នំពេញ គឺមានស្ពានអាកាសជាច្រើនកន្លែង ហើយតាមរយៈការសាងសង់ស្ពានអាកាសភ្លោះ«សម្តេចមហាបវរធិបតី» តភ្ជាប់ពីមហាវិថីសម្តេច ហ៊ុន សែន ទៅអាកាសយានដ្ឋានអន្តរជាតិតេជោ កាត់ផ្លូវជាតិលេខ២ គឺនឹងចូលរួមចំណែកជាច្រើន ក្នុងការកាត់បន្ថយការកក់ស្ទះចរាចរណ៍ ធ្វើដំណើរលឿន ចំណិញថវិកា ហើយវាក៏បង្ហាញពីភាពរីកចម្រើនរុងរឿងរបស់ប្រទេសកម្ពុជា លើវិស័យហិត្ថារចនាសម្ព័ន្ធផ្លូវថ្នល់នេះដែរ។

អ្នកនាំពាក្យសាលារាជធានីភ្នំពេញ លោកស្រី ដោ សម្ផស្ស ថ្លែងថា គម្រោងសាងសង់ស្ពានអាកាសភ្លោះ«សម្តេចមហាបវរធិបតី» មកដល់ពេលនេះ សាងសង់សម្រេចប្រមាណ៥០% នៃគម្រោងសាងសង់ទាំងមូល ហើយតាមការគ្រោងទុក គម្រោងសាងសង់នឹងបញ្ចប់នៅចុងខែមិថុនា ឆ្នាំ២០២៥នេះ ពោលគឺធ្វើឲ្យហើយមុន អាកាសយានដ្ឋានអន្តរជាតិតេជោបើកដំណើការនៅក្នុងខែកក្កដាឆ្នាំ២០២៥នេះ។

លោកស្រី បញ្ជាក់ថា បច្ចុប្បន្នស្ពានទី១ ដែលមានទិសដៅពីផ្លូវសម្តេចហ៊ុន សែន ឬហៅផ្លូវ៦០ម៉ែតទៅព្រលានយន្ត គឺបានសាងសង់គ្រឹះ និងសរសរស្ពានរួចរាល់អស់ហើយ ហើយពេលនេះកំពុងសាងសង់តំឡើងធ្នឹមនិងបេតុងបាន៦០% ហើយគ្រោងបញ្ចប់អ៊ុតកៅស៊ូលើផ្លូវលើស្ពាននៅក្នុងខែមីនានេះ។

ដោយឡែកសម្រាប់ស្ពានទី២ តភ្ជាប់ផ្លូវមកពីព្រលានយន្តហោះចូលទៅផ្លូវ៦០ម៉ែត្រវិញ គឺបានសាងសង់គ្រឹះ និងសរសររួច ហើយនឹងតំឡើងធ្នឹមនៅខែមេសាខាងមុខនេះ។

សូមបញ្ជាក់ថា ឱកាសបើកសម្ពោធការដ្ឋានសាងសង់ស្ពានអាកាសភ្លោះក្រោមអធិបតីភាពខ្ពង់ខ្ពស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កាលពីអំឡុងពាក់កណ្តាលខែមករាឆ្នាំ២០២៤កន្លងទៅនេះ បានឲ្យដឹងថា ស្ពានអាកាសភ្លោះនេះ សាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) ដោយគ្រោងប្រើរយៈពេលសាងសង់ចំនួន ១២ខែ និងត្រូវចំណាយថវិកាចំនួន ១៦,២០០,៥០០ដុល្លារ មានបណ្ដោយស្ពានសរុប ៦២២ម៉ែត្រ, បណ្ដោយតួស្ពាន ២៨១ម៉ែត្រ, ផ្លូវតភ្ជាប់ក្បាលស្ពានទៅមក ខាងមហាវិថីសម្តេចតេជោ ហ៊ុន សែន ប្រវែង ១៨០ម៉ែត្រ, ផ្លូវតភ្ជាប់ក្បាលស្ពានទៅមកខាងព្រលានយន្តហោះអន្តរជាតិតេជោ ១៦១ម៉ែត្រ។

អត្ថបទ ស៊ុម សុខជា