សម្តេចហ៊ុន​សែន បញ្ជាក់ជំហរជាថ្មីថាមិនអោនក្បាលចំពោះការគាបសង្កត់ដែលប៉ះពាល់ដល់ស្ថិរភាពកម្ពុជា

នៅក្នុងពិធីសម្ពោធដាក់ឱ្យប្រើប្រាស់ជាផ្លូវការស្ពានឆ្លងទន្លេមេគង្គ ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ នៅព្រឹកថ្ងៃអង្គារ ទី២៣ ខែវិច្ឆិកា ឆ្នាំ២០២១នេះ សម្តេចនាយករដ្ឋមន្រ្តីហ៊ុន សែន បានបញ្ជាក់ជំហរជាថ្មីថា ទោះបីក្នុងតម្លៃណាក៏ដោយ ក៏សម្តេចមិនអោនក្បាលចំពោះការគាបសង្កត់ណាមួយរបស់បរទេសដែលធ្វើឱ្យប៉ះពាល់សន្តិភាព និងស្ថិរភាពនៅកម្ពុជាឡើយ។

បើតាមសម្តេចហ៊ុន សែន គឺកម្ពុជាទទួលបានសន្តិភាពពេញលេញនៅថ្ងៃទី២០ ខែធ្នូ ឆ្នាំ១៩៩៨ បន្ទាប់ពីមានសង្គ្រាមសម្លាប់ខ្មែរ និងខ្មែរអស់រយៈពេលជាយូរ។ សម្តេចតេជោ ក៏បានបរិហារទៅកាន់ប្រទេសប្រជាធិបតេត្យមួយចំនួនដែលមិនបានបង្ហាញការសោកស្តាយរបស់ខ្លួនទាល់តែសោះចំពោះការធ្វើរដ្ឋប្រហាររបស់លោកលន់ នល់ ទម្លាក់សម្តេច ព្រះនរោត្តម សីហនុ ដែលនាំឱ្យប្រទេសកម្ពុជាធ្លាក់ក្នុងភ្លើងសង្រ្គាមស៊ីវិល។

មិនតែប៉ុណ្ណោះទេ សម្តេចក៏បានគូសបញ្ជាក់ថា ប្រទេសអស់ទាំងនោះបានគាំទ្រការធ្វើរដ្ឋប្រហារនេះ ហើយថែមទាំងគាំទ្រអសនៈរបស់រដ្ឋាភិបាលលន់ នល់ នៅអង្គការសហប្រជាជាតិថែមទៀត។ លើសពីនេះទៅទៀត ពួកគេក៏បានបន្តគាំទ្ររបបខ្មែរក្រហមឱ្យមានអសនៈនៅអង្គការសហប្រជាជាតិផងដែរ។ សម្តេចបានសង្កត់ធ្ងន់ថា ពួកគេជាប្រទេសប្រជាធិបតេយ្យ តែបែរជាទៅគាំទ្រការធ្វើរដ្ឋប្រហារទៅវិញ៕

អត្ថបទពី៖ កម្ពុជាថ្មី