ថ្នាក់ដឹកនាំក្រសួងកសិកម្ម​ និងអភិបាលខេត្តតាកែវ​ រួមគ្នាជួបសំណេះសំណាល​ជាមួយអាជីវករលក់ជី និងថ្នាំកសិកម្ម

ភ្នំពេញ៖​ ឯកឧត្តម​ គង់​ ច័ន្ទវាសនា​ រដ្ឋលេខាធិការ​ក្រសួងកសិកម្ម​ រុក្ខាប្រមាញ់​ និងនេសាទ​ និងឯកឧត្តម​ វុី​ សំណាង​ អភិបាលនៃគណ:អភិបាលខេត្តតាកែវ​ នាព្រឹកថ្ងៃទី៣ ខែកុម្ភៈ ឆ្នាំ២០២៥នេះ បានជួបសំណេះសំណាលជាមួយអាជីវករលក់ជី​ និងថ្នាំកសិកម្មចំនួន​ជាង២០០នាក់ ដោយមាន​ការចូលរួមពីថ្នាក់ដឹកនាំ​ និងមន្ត្រីពាក់ព័ន្ធ​។

ក្នុងអង្គពិធីនេះ ឯកឧត្តម​ វុី​ សំណាង​ បានលេីកឡេីងពីកិច្ចខិតខំរបស់រដ្ឋបាលខេត្ត​ ក្នុងការចូលរួមអភិវឌ្ឍវិស័យកសិកម្ម​ និងការដោះស្រាយបញ្ហាប្រឈម​​នានាជូនប្រជាកសិករ ជាពិសេសការសម្រួលដល់ការ​លក់ស្រូវរបស់កសិករក្នុងរដូវប្រមូលផល​នាពេលនេះ។

ឯកឧត្តម​ គង់​ ច័ន្ទវាសនា​ បានជម្រាបជូនអាជីវករអំពីកិច្ចខិតខំប្រឹងប្រែងរបស់រាជរដ្ឋាភិបាល​ និងក្រសួងកសិកម្ម​ ក្នុងការជំរុញអភិវឌ្ឍវិស័យកសិកម្ម​ និង​អំពី​កម្មវិធីគោលនយោបាយអាទិភាពទី៥ និងទី៦ ដែលផ្តោតលើយន្តការរក្សាលំនឹងថ្លៃកសិផល ការដាក់ពង្រាយមន្ត្រីកសិកម្មឃុំ និងការអភិវឌ្ឍសហគមន៍កសិកម្មទំនើប​ ដើម្បី​កាត់​បន្ថយ​ថ្លៃ​ដើម​ផលិត​ បង្កេីនប្រាក់ចំណេញ​ និងលើក​កម្ពស់​ជីវភាព​ប្រជា​កសិករ​។

ទន្ទឹមនេះ​ ឯកឧត្តមរដ្ឋលេខាធិការ បានគូស​បញ្ជាក់ថា អាជីវករលក់ជី និងថ្នាំទាំងអស់គឺជាដៃគូដ៏សំខាន់របស់ក្រសួងកសិកម្ម រដ្ឋបាលខេត្ត និងមន្ទីរកសិកម្មរាជធានី/ខេត្ត​ ដេីម្បីជួយដល់កសិករ​ និងបានលេីកទឹកចិត្តឱ្យអាជីវករទាំងអស់ចូលរួមផ្សព្វផ្សាយអ្វីដែលផ្តល់ផលប្រយោជន៍ដល់កសិករ​ ជាពិសេស​ បច្ចេកទេសប្រេីប្រាស់ជី​ និងថ្នាំកសិកម្ម​ដេីម្បីជួយកាត់បន្ថយថ្លៃដេីម​ផលិតរបស់កសិករ៕