នគរបាលច្រកទ្វារអន្តរជាតិប៉ោយប៉ែតបណ្ដេញជនជាតិថៃ២៥នាក់ចេញកម្ពុជា ខណៈលួចស្នាក់នៅធ្វើការដោយខុសច្បាប់

បន្ទាយមានជ័យ៖ ជនជាតិថៃប្រុសស្រី ចំនួន២៥នាក់ ត្រូវបាននគរបាលច្រកទ្វារព្រំដែនអន្តរជាតិប៉ោយប៉ែត សហការជាមួយ កម្លាំងការិយាល័យអនុវត្តនីតិវិធី និងគ្រប់គ្រងកន្លែងត្រៀមបណ្ដេញចេញ នៃនាយកដ្ឋានស៊ើបអង្កេត និងអនុវត្តនីតិវិធី ធ្វើការបណ្ដេញចេញពីកម្ពុជា បន្ទាប់ពីរកឃើញថា លួចឆ្លងដែន និងស្នាក់នៅធ្វើការងារខុសច្បាប់ (គ្មានលិខិតឆ្លងដែន) នៅកម្ពុជា ។

ការបណ្តេញចេញដោយមានការប្រគល់-ទទួល និងបញ្ជូនចេញនូវជនជាតិថៃខាងលើ ធ្វើឡើង​នៅថ្ងៃទី០៤ ខែកុម្ភៈ ឆ្នាំ២០២៥ នៅមាត់ច្រកទ្វារព្រំដែនអន្ដរជាតិប៉ោយប៉ែត ​ខេត្តបន្ទាយមានជ័យ ខាងកម្ពុជាដឹកនាំដោយលោកវរសេនីយ៍ទោ ឌុច ចាន់តារារិទ្ធ ឋានៈនាយរងការិយាល័យ ធ្វើការប្រគល់-ទទួល។ ដោយឡែកខាងភាគីថៃដឹកនាំដោយ លោកស្រីអនុសេនីយ៍ឯក JARUDA TONPRANG ឋានៈនាយរងផ្នែក ប៉ុស្តិ៍នគរបាលអន្តោប្រវេសន៍ច្រកទ្វារព្រំដែនអន្តរជាតិបានខ្លងលឹក ស្រុកអារញ្ញប្រាថេត ខេត្តស្រះកែវ ប្រទេសថៃ ។ ជនជាតិថៃខាងលើ ត្រូវបានប៉ុស្តិ៍ន​គរបាលច្រកទ្វារព្រំដែន​អន្តរជាតិប៉ោយប៉ែត​ បានប្រថាប់ត្រាហាមចូលប្រទេសរយៈពេល ០៥ឆ្នាំ បន្ទាប់មកធ្វើការប្រគល់ថៃ ដើម្បីអនុវត្តនីតិវិធីបន្ត ។