រាជរដ្ឋាភិបាលដំឡើងប្រាក់បៀវត្សជូនដល់កងទ័ពគ្រប់លំដាប់ថ្នាក់ទាំងអស់ចំនួន ៤ម៉ឺនរៀលបន្ថែម​ទៀត

ឧត្តមសេនីយ៍ឯក ម៉ឹង ពន្លក អគ្គនាយក អគ្គនាយកដ្ឋានភស្តុភារ ហិរញ្ញវត្ថុ ក្រសួង​ការពារ​ជាតិ​បាន​ឲ្យ​ដឹងថា ឆ្នាំ២០២៥នេះ រាជរដ្ឋាភិបាល​បាន​សម្រេច​ដំឡើង​ប្រាក់​បៀវត្ស​ដល់​យោធិន​គ្រប់​លំដាប់​ថ្នាក់​ទាំងអស់ ចំនួនបួនម៉ឺនរៀលបន្ថែមទៀត ស្របទៅតាម​គោល​នយោបាយ​របស់​រាជ​រដ្ឋាភិបាលក៏ដូចជាគោលនយោបាយជាតិ។

ថ្លែងក្នុងឱកាស អញ្ជើញដឹកនាំកិច្ចប្រជុំប្រកាសកញ្ចប់ឥណទានថវិកាជំនាញឆ្នាំ២០២៥ និង​ផ្សព្វ​ផ្សាយ​សេចក្តី​ណែនាំ ស្តីពីវិក្រឹត្យការនៃការរៀបចំផែនការយុទ្ធសាស្រ្តថវិកាឆ្នាំ២០២៦-២០២៨ នៅ​ទីស្តីការក្រសួងការពារជាតិនាព្រឹកថ្ងៃទី៤ ខែកុម្ភៈ ឆ្នាំ២០២៥នេះ ឯកឧត្តមឧត្តមសេនីយ៍ឯក ម៉ឹង ពន្លក បានបញ្ជាក់ថា រាជរដ្ឋាភិបាលបានយកចិត្តទុកដាក់យ៉ាងខ្លាំងចំពោះជីវភាព និង​ការ​រ​ស់​នៅ​រប​ស់យោធិន ជាក់ស្តែងសម្រាប់ឆ្នាំ២០២៥នេះកងទ័ពទាំង២០កាំ ត្រូវ​បាន​ដំឡើង​ប្រាក់​ខែ​គ្រប់​ៗ​គ្នា ហើយនិងប្រាក់ឧបត្ថម្ភ ផ្សេងៗទៀតជាពិសេសក្នុងឱកាសបុណ្យរបស់ជាតិធំៗតែម្តង។

ឯកឧត្តមឧត្តមសេនីយ៍ឯក ម៉ឹង ពន្លក ក៏បានលើកឡើងផងដែរថា ដើម្បីអនុវត្តបទបញ្ជារបស់រាជ រដ្ឋាភិបាល ក៏ដូចជា​រដ្ឋ​មន្រ្តី​ក្រសួង​ការពារ​ជាតិ​ឲ្យ​យក​ចិត្តទុកដាក់​ឲ្យបានខ្លាំងបន្ថែមទៀតចំពោះ​បញ្ហា​ជីវភាព សុខភាព របស់កងទ័ពនោះ អគ្គនាយកដ្ឋានភស្តុភារ ហិរញ្ញវត្ថុ​នឹង​ធ្វើ​ការ​ឆ្លើយ​តប​ឲ្យ​បាន​ទាន់​ពេលវេលា និងច្បាស់លាស់ស្របទៅតាមជំនាញរបស់ខ្លួន ទាក់ទងនឹងការ​បើក​ប្រាក់​បៀវត្ស និងប្រាក់ឧបត្ថម្ភ ផ្សេងៗទៀតជូនដល់កងទ័ពក៏ដូចជាក្រុមគ្រួសារកងទ័ព។

នៅក្នុងកិច្ចប្រជុំនោះដែរឧត្តមសេនីយ៍ឯក ម៉ឹង ពន្លក ក៏បាន​ស្នើ​សុំ​ដល់​បណ្តា​អង្គភាព​របស់​ក្រសួង​ការពារ​ជាតិទាំ​ងអស់ពោលគឺទាំង៧៣អង្គភាព គប្បីធ្វើកាតធនាគារកាណាឌីយ៉ា និងអេស៊ីលីដា ឲ្យ​បានគ្រប់ៗគ្នាផងដែរដើម្បីបើកប្រាក់បៀវត្សទៅតាមប្រព័ន្ធធនាគារ ខណៈ​បច្ចុប្បន្ន​នេះ​យោធិន​ទាំង​អស់​ជាង​មួយសែននាក់ ហើយមានអ្នក​ធ្វើកាត​ធនាគារ​ទាំង​ពីរ​ខាង​លើ​នេះ​មាន​ត្រឹម​តែ​ជាង​បួន​ពាន់​នាក់តែ​ប៉ុណ្ណោះដើម្បីបើកប្រាក់បៀវត្សប្រចាំខែ។

បើតាមឧត្តមសេនីយ៍ទោ គឹម សុណារ៉ា នាយកនាយកដ្ឋាន ហិរញ្ញវត្ថុ នៃអគ្គនាយកដ្ឋាន ភស្តុភារ ហិរញ្ញវត្ថុ ក្រសួងការពារជាតិបានលើកឡើងថា ក្នុងតួនាទីភារកិច្ចស្នូល នាយកដ្ឋានហិរញ្ញវត្ថុ ខិត​ខំ​យក​ចិត្តទុកដាក់ជាចម្បង លើការបម្រើសេវាកម្មបែងចែក បើកផ្ដល់​ថវិកា​ជូន​ប​ណ្ដា​កង​ឯកភាព​ជំនាញ ប្រើប្រាស់ប្រចាំឆ្នាំដោយក្នុងនោះមានប្រាក់បៀវត្ស រដ្ឋបាលជំនាញ ចំណាយផ្សេងៗ របប​សេវាកម្ម អត្ថប្រយោជន៍សង្គម បូជាសព ឧបត្ថម្ភបុណ្យចូលឆ្នាំថ្មី ប្រពៃណីជាតិ បុណ្យភ្ជុំបិណ្ឌ ទូទាត់​ទំនិញគ្រប់ប្រភេទ ថវិកាធានា និងអបអរសាធរខួបលើកទី ២៦ ទិវាសន្តិភាពនៅកម្ពុជា និង​ជំនាញ​ដទៃ​ទៀតជាច្រើន។

លោកឧត្តមសេនីយ៍ទោ បានលើកឡើងទៀតថា អគ្គនាយករដ្ឋាន យកចិត្តទុកដាក់ បើក​ផ្ដល់​ប្រាក់​បៀវត្ស ជូនយោធិន​ទាន់​ពេល​វេលា​មិនមាន​ការ​យឺត​យ៉ាវ, ធានា​ថវិកា​ប្រើ​ប្រាស់​សម្រាប់​សម​យុទ្ធ ​ជា​មួយភាគីមិត្ត តាមផែនការហ្វឹកហ្វឺនរបស់អគ្គបញ្ជាការដ្ឋាន និងធ្វើការ​ទំនាក់​ទំនង​ល្អ​ជាមួយ​ក្រសួងសេដ្ឋកិច្ច-ហិរញ្ញវត្ថុ ជាប់ជាប្រចាំអំពីប្រាក់ឋានន្តរសក្តិ និងមុខតំណែងជាដើម៕ អត្ថបទ៖ បាន ចក់