សម្ដេចតេជោ ឲ្យសិក្សាចាក់វ៉ាក់សាំងដូសទី ៤ សម្រាប់មន្ត្រីជួរមុខ ខណៈកងអង្គរក្សសម្ដេច បានចាក់រួចហើយ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានណែនាំឲ្យសិក្សាទៅលើ ការចាក់វ៉ាក់សាំងបង្ការជំងឺកូវីដ-១៩ ទៅលើក្រុមមន្ត្រីជំនាញជួរមុខ ជាពិសេសក្រុមគ្រូពេទ្យតែម្ដង។ ក្នុងនោះ សម្ដេចតេជោ ហ៊ុន សែន ក៏បានបង្ហើបថា ក្រុមកងអង្គរក្សរបស់សម្ដេច បានចាក់វ៉ាក់សាំងដូសទី ៤រួចហើយ។

នៅក្នុងពិធីសម្ពោធដាក់ប្រើប្រាស់ អគាររដ្ឋបាលថ្មី នៃអគ្គនាយកដ្ឋានគយ និងរដ្ឋាករកម្ពុជា នាព្រឹកថ្ងៃទី ២៣ ខែធ្នូនេះ សម្ដេចតេជោ ហ៊ុន សែន បានណែនាំដល់លោក អូន ព័ន្ធមុនីរ័ត្ន ប្រធានគណៈប្រចាំការ នៃគណ:កម្មការជាតិប្រយុទ្ធនឹងជំងឺកូវីដ-១៩ និងលោក ម៉ម ប៊ុនហេង រដ្ឋមន្ត្រីក្រសួងសុខាភិបាល សិក្សាទៅលើការចាក់វ៉ាក់សាំងបង្ការជំងឺកូវីដ-១៩ ដូសទី ៤ ទៅលើក្រុមមន្ត្រីជួរមុខ។

បើតាមសម្ដេចតេជោ ហ៊ុន សែន គម្រោងនៃការចាក់វ៉ាក់សាំងបង្ការជំងឺកូវីដ-១៩ សម្រាប់មន្ត្រីជួរមុខ ជាពិសេសក្រុមគ្រូពេទ្យ គឺត្រូវប្រើប្រាស់វ៉ាក់សាំងប្រភេទ Pfizer ដែលជាជំនួយរបស់ប្រទេសអូស្ត្រាលី។ ជាមួយគ្នានេះ សម្ដេចតេជោនាយករដ្ឋមន្ត្រី ក៏បានបង្ហើបឲ្យដឹងថា ក្រុមកងអង្គរក្សរបស់សម្ដេច បានចាក់វ៉ាក់សាំងដូសទី ៤រួចហើយ។

សម្ដេចតេជោ ហ៊ុន សែន មានប្រសាសន៍ថា «កងអង្គរក្សរបស់ខ្ញុំ លេងដូសទី ៤អស់ហើយ ចឹងបានហ្នឹងតែម្ដង ខ្ញុំសូមជម្រាបថា ក្នុងពេលដែលឆ្លងខ្លាំងអង្គរក្សរបស់ខ្ញុំឆ្លង ៤០០នាក់ ៤០០នាក់ឆ្លង ប៉ុន្តែដល់ដូសទី ១ ដូសទី ២ ដូសទី ៣ ឥឡូវដល់ដូសទី ៤ បាត់បណ្ដោយៗ ចឹងបានជាវ៉ាក់សាំងជួយយើងសំខាន់ណាស់ៗ»៕

អត្ថបទពី៖ KPT