លោកជំទាវ ឱ វណ្ណឌីន បញ្ចេញសៀវភៅស្ថាដៃថ្មីមានចំណងជើងថា «១០៩៩ ថ្ងៃ ក្នុង​សមរភូមិ​ព័ត៌មានកូវីដ-១៩» ដើម្បីដាស់តឿនពលរដ្ឋកុំឱ្យភ្លេចថែទាំសុខភាព

ភ្នំពេញ៖ លោកជំទាវ ឱ វណ្ណឌីន រដ្ឋលេខាធិការ ក្រសួងសុខាភិបាល បានបញ្ចេញសៀវភៅ ជាស្ថាដៃថ្មី មក្រោមចំណងជើងថា «១០៩៩ ថ្ងៃ ក្នុងសមរភូមិព័ត៌មានកូវីដ-១៩» ដើម្បីក្រើនរម្លឹក និងដាស់តឿនប្រជាពលរដ្ឋ កុំឱ្យភ្លេចថែទាំសុខភាព។

ដោយភ្ជាប់មកជាមួយពាក្យជូនពរ និងការដាស់តឿនផ្នែកសុខភាព លោកជំទាវ ឱ វណ្ណឌីន រដ្ឋលេខាធិការ ក្រសួងសុខាភិបាល នៅព្រឹកថ្ងៃទី៦ ខែកុម្ភៈ ឆ្នាំ២០២៥ នេះបានបញ្ចេញសៀវភៅថ្មី ជាស្នាដៃទី២ ក្រោមចំណងជើងថា “១០៩៩ ថ្ងៃ ក្នុងសមរភូមិព័ត៌មានកូវីដ-១៩ ក្នុងអំឡុងពេលវិបត្តិកូវីដ-១៩ នៅកម្ពុជា ឆ្នាំ២០២០ ដល់ ឆ្នាំ២០២២” ។

សៀវភៅដែលបានចេញជាពីរភាសារនេះ គឺជាការម្លឹកឡើងវិញ ពីកិច្ចប្រឹងប្រែងរបស់រាជរដ្ឋាភិបាលកម្ពុជា ដែលក្នុងនោះ លោកជំទាវ ឱ វណ្ណឌីន ក៏ជាតួអង្គសំខាន់មួយរូបផងដែរ ក្នុងការងារ ផ្សព្វផ្សាយដល់ប្រជាពលរដ្ឋ អំពី ជំងឺរាតត្បាតសកល កូវីដ ១៩។

តាមរយៈការបញ្ចេញស្នាដៃថ្មីនេះ លោកជំទាវ បានក្រើនរម្លឹកផ្នែកសុខភាព ដោយលើកជាពាក្យស្លោកថា៖ ”បុគ្គលម្នាក់ គឺជាអ្នកអប់រំ និងជាអ្នកថែទាំសុខភាពក្រុមគ្រួសាររបស់ខ្លួនបានល្អប្រសើរបំផុត” ដោយមិនត្រូវរងចាំ ទាល់តែឈឺហើយទើបទៅរកការព្យាបាលនោះឡើយ ដោយអនុលោមតាមអភិក្រម “ការពារ ប្រសើជាងព្យាបាល” ដែលគ្រួសារនីមួយៗ ត្រូវតែប្រកាន់យក ដើម្បីនាំសមាជិកគ្រួសារ ឆ្ពោះទៅរកការចៀសផុតនូវជំងឺដង្កាត់នានាដែលអាចការពារបាន ជាពិសេសសូមចូលរួមអនុវត្តន៍ទាំងអស់គ្នានូវសារអប់រំសុខភាព “តិចអំបិល តិចខ្លាញ់ តិចស្ករ និងកាត់បន្ថយការប្រើប្រាស់គ្រឿងស្រវឹង ព្រមទាំងបញ្ឈប់ការប្រើប្រាស់ផលិតផលថ្នាំជក់ រួមទាំងបារីអេឡិចត្រូនិក” ដែលជាកត្តាបង្កឱ្យមានជំងឺមិនឆ្លងផងដែរ៕