ថ្នាក់ដឹកនាំគណបក្សខេត្តស្វាយរៀងជំរុញដល់មន្ត្រីពាក់ព័ន្ធចុះធ្វើការអប់រំនិងឆ្លើយតបដោះស្រាយកង្វល់ពលរដ្ឋ

ស្វាយរៀង ៖ ឯកឧត្តមថាច់ រតនា សមាជិកគណៈអចិន្ត្រៃយ៏គណៈកម្មាធិការគណបក្សខេត្ត និងជាប្រធានគណៈឃោសនាអប់រំខេត្ត បានជំរុញដល់មន្ត្រីថ្នាក់ដឹកនាំនៅគ្រប់ផ្នែកពាក់ព័ន្ធ ដែលនៅកៀកនិងពលរដ្ឋត្រូវចុះធ្វើការអប់រំ ពន្យល់ពលរដ្ឋឲ្យយល់កាន់តែច្បាស់ពីការដឹកនាំរបស់គណបក្ស ក៏ដូចជារបស់រាជរដ្ឋាភិបាលទាំងលើការងារសន្តិសុខសុវត្ថិភាព ការងារអភិវឌ្ឍន៏ និងការងារសេដ្ឋកិច្ច ដើម្បីបញ្ចៀសបាននូវការអូសទាញរបស់អង្គការសង្គមស៊ីវិលនិងគណបក្សផ្សេងៗ ងាកមកធ្វើការវាយប្រហារមកលើការដឹកនាំរបស់គណបក្ស និងរាជរដ្ឋាភិបាលដែលកើតចេញពីការបោះឆ្នោតគាំទ្រពីពលរដ្ឋ ខណៈដែលពលរដ្ឋនៅទូទាំងប្រទេសក៏ដូចជានៅក្នុងខេត្តស្វាយរៀងយើងទាំងមូលបានប្រឈមទៅនឹងបញ្ហាលក់ផលិតផលមិនឆ្លើយតបទៅនិងការចំណាយ ។

ការថ្លែងនិងជំរុញរបស់មន្ត្រីគណបក្សរូបនេះបានធ្វើឡើងក្នុងឱកាស ឯកឧត្តមអញ្ជើញដឹកនាំកិច្ចប្រជុំផ្សព្វផ្សាយសភាពការណ៍ទូទៅប្រចាំខែមករា និងទិសដៅអនុវត្តបន្តរបស់គណៈឃោសនាអប់រំខែកុម្ភៈ នៅសាលប្រជុំស្នាក់ការគណៈកម្មាធិការគណបក្សប្រជាជនកម្ពុជាខេត្តស្វាយរៀងថ្ងៃទី៧ ខែកុម្ភៈ ឆ្នាំ២០២៥ ដោយមានការអញ្ជើញចូលរួមពីឯកឧត្តម លោកជំទាវ លោក លោកស្រី នៅក្នុងក្រុមប្រឹក្សាខេត្តមន្ត្រីជនបង្គោលគណៈឃោសនាអប់រំតាមមន្ទីរ អង្គភាព និងស្រុក ក្រុងទាំង៨របស់ខេត្តផងដែរ។

ឯកឧត្តមបានបញ្ជាក់ថានិន្នាការសេដ្ឋកិច្ច ពិសេសស្រូវ អង្ករ មានការចុះថោកគឺជាគោលដៅដែលគណបក្សនិងអង្គការសង្គមស៊ីវិលតែងតែធ្វើការវាយបកមកលើការដឹកនាំរបស់រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា ដូច្នេះមន្ត្រីដែលនៅកៀកនិងពលរដ្ឋក្រៅពីការងារអប់រំការសតិអារម្មណ៍ របស់មន្ត្រីរាជការ និងពលរដ្ឋឲ្យមានភាពជឿជាក់មកលើការដឹកនាំរបស់រាជរដ្ឋាភិបាលត្រូវ លៃលក ធ្វើការឆ្លើយតបរាល់តម្រូវការចាំបាច់ចំពោះមុខជូនពលរដ្ឋ រួមមានការងារដោះស្រាយបូមបាចទឹកសង្គ្រោះស្រូវប្រាំង ពិសេសរកទីផ្សារស្រូវ អង្ករដែលជាគោលដៅពលរដ្ឋចង់អោយការលក់ដោះដូរបានល្អនៅគ្រប់រដូវ ។

ជាមួយគ្នានោះដែរក្នុងនាមមន្ត្រីថ្នាក់ដឹកនាំគណបក្សឯកឧត្តម ថាច់ រតនា បានជំរុញណែនាំដល់មន្ត្រី និងជនបង្គោល បន្តបំផុសចលនាអនុវត្តគោលនយោបាយភូមិឃុំមានសុវត្ថិភាព រក្សាសន្តិភាព ប្រឆាំងវាយបកគ្រប់សកម្មភាព ដែលអង្គការសង្គមស៊ីវិលនិងគណបក្សផ្សេងៗបានធ្វើការរិះគន់មកលើការដឹកនាំរបស់រាជរដ្ឋាភិបាលឲ្យបានទាន់ពេលវេលា សំដៅបញ្ជៀសសកម្មភាព រំជើបរំជួលនៅក្នុងស្រទាប់ពលរដ្ឋនិងមន្ត្រីរាជការ ។