ពលរដ្ឋចង់ឱ្យមានការចូលរួមគោរពច្បាប់ទាំងអស់គ្នា ទោះផ្លូវ៦០ម៉ែត្រមានទ្រូងផ្លូវ ឬគំនូសសញ្ញាចរាចរណ៍ក៏ដោយ

ពលរដ្ឋជាអ្នកដំណើរ ចង់ឱ្យបណ្តាអ្នកបើកបរទាំងអស់ ចូលរួមគោរពច្បាប់​ចរាចរណ៍​ឱ្យ​បាន​ខ្ជាប់​ខ្ជួនទាំ​ងអស់គ្នា បើទោះបីជា នៅលើផ្លូវ៦០ម៉ែត្រមានទ្រូងផ្លូវ ឬគំនូសសញ្ញាចរាចរណ៍ក៏ដោយ ។

ពលរដ្ឋយល់ឃើញថា ការដាក់របាំងដែក ឬរបាំងថ្មពុះចែកទ្រូងផ្លូវ ក៏ដូចជាគំនូស​សញ្ញា​ចរាចរណ៍​ផ្សេង​ៗ​លើដងផ្លូវ គឺជារឿងប្រពៃប្រសើរ និងល្អបំផុតដើម្បីកាត់បន្ថយបានពីគ្រោះថ្នាក់ចរាចរណ៍ នៅ​លើ​កំណាត់ផ្លូវ៦០ម៉ែត្រ ប៉ុន្តែបើអ្នកបើកបរទាំងឡាយ នៅតែបន្ត​ការ​បើកបរ​ដោយ​មិន​គោរព​ច្បាប់ ​បើកបរដោយការបើកបញ្ច្រាស បើកបរដោយការបំពាន ឬឋិតក្នុងស្ថានភាពស្រវឹងនោះ នោះ​គ្រោះថ្នាក់ក៏នៅតែអាចកើតមានឡើងដែរ ។

គួរបញ្ជាក់ថា របាំងថ្ម និងរបាំងដែក គឺត្រូវបានរៀបចំដាក់ដោយបែកចែកជា០២កំណាត់ផ្លូវ ដោយ​កំណាត់​ផ្លូវ​ទី១ គិតចាប់ពីស្ពានអាកាសមរតកតេជោ ដល់ស្តុបសឺដែស ត្រូវដាក់របាំង​ដែក​ពុះ​ចែក​ទ្រូង​ផ្លូវ ដោយកំណត់ល្បឿនត្រឹម៤០km/h ។ ដោយឡែកគិតចាប់ពីស្តុបសឺដែស ដល់ផ្លូវ​ជាតិ​លេខ​២ ត្រូវដាក់របាំងថ្មពុះចែកទ្រូងផ្លូវ ដោយកំណត់ល្បឿនត្រឹម ៦០km/h ប៉ុណ្ណោះ ។

ទន្ទឹមនឹការដាក់ទ្រូងផ្លូវខាងលើនេះដែរ បច្ចុប្បន្ន កម្លាំងសមត្ថកិច្ចរាជធានី និង​នគរបាល​ខណ្ឌ​ពាក់ព័ន្ធ នៅតែបន្តពង្រឹងការអនុវត្តច្បាប់ចរាចរណ៍ ដោយការចាប់ល្បឿននៅពេលថ្ងៃ ហើយ​អនុវត្ត​ចាប់​ជាតិស្រវឹងនៅពេលយប់ ដើម្បីជាផ្នែកសម្ខាន់មួយ ក្នុងការកាត់បន្ថយគ្រោះថ្នាក់ ដែល​តែង​ឧស្សាហ៍បង្កឡើងដោយ អ្នកបើកបរយានយន្តទាំងឡើយ នៅបន្តការល្មើសច្បាប់ផងដែរ ៕ លីហេង