ក្រសួងការងារ ណែនាំកម្មវិធីអែបស្វែងរកការងារនៅក្រៅប្រទេសប្រកបដោយទំនុកចិត្តខ្ពស់ និងមានសុវត្ថិភាព

ក្រសួងការងារ និងបណ្ដុះបណ្ដាលវិជ្ជាជីវៈ បានណែនាំកម្មវិធីអែប (Apps)មួយ ដើម្បីផ្ដល់ភាព​ងាយ​ស្រួលដល់ប្រជាពលរដ្ឋ និងយុវជនដែល​កំពុង​ស្វែង​រក​ឱកាស​ធ្វើ​ការងារ​នៅ​ក្រៅ​ប្រទេស​ប្រកប​ដោយ​ទំនុកចិត្តខ្ពស់ មានសុវត្ថិភាព ចៀសវាងពីការជួញដូរកម្លាំងពលកម្មខុសច្បាប់ និង​ធ្វើ​ការ​ងារជាមួយក្រុមហ៊ុនមានច្បាប់ត្រឹមត្រូវ។

ក្រសួងការងារ និងបណ្ដុះបណ្ដាលវិជ្ជាជីវៈបានឱ្យដឹងថា ជាដំបូងបងប្អូនគ្រាន់តែដំឡើងអែប (Install Apps)របស់ក្រសួងការងារ និងបណ្ដុះបណ្ដាលវិជ្ជាជីវៈដែលមានឈ្មោះថា MLVT Service ហើយចុចទៅលើអែបនោះដែលមានឈ្មោះថា «សេវាសាធារណៈក្រសួងការងារ»។ បន្ទាប់​មកបងប្អូន នឹងឃើញមានមាតិកាសំខាន់ៗ (Content)​ជា​ច្រើន​ដែល​ជា​សេវា​សាធារណៈ​សម្រាប់​ផ្ដល់ជូនបងប្អូន និងសាធារណៈជនជ្រើសរើសទៅតាមតម្រូវការរបស់ខ្លួន។

ក្រសួង​ការងារបន្តថា ក្នុងចំណោមមាតិកាទាំងនោះ គឺមានមាតិកាមួយឈ្មោះថា «ចុះឈ្មោះ​ស្វែង​រក​ការងារក្រៅប្រទេស»។ មារិកាមួយនេះ បងប្អូនអាច​ស្វែង​រក​ឈ្មោះ​ប្រទេស​ដែល​បង​ប្អូន​ចង់​ទៅ​ធ្វើ​ការងារ ប្រភេទការងារដែលបងប្អូនពេញចិត្ត និងនីតិវិធីក្នុងការចុះឈ្មោះផងដែរ។

បន្ទាប់​មកទៀត បងប្អូនគ្រាន់តែចុះឈ្មោះទៅតាមការណែនាំរបស់ក្រសួងការងារ និងចុច​បញ្ជូន​ជា​ការ​ស្រេច។ កិច្ចការបន្ទាប់នោះ គឺក្រុមការងាររបស់ក្រសួងការងារ និងបណ្ដុះ​បណ្ដាល​វិជ្ជា​ជីវៈ​នឹង​ពិនិ​ត្យ​ពាក្យដែលបងប្អូនបានបំពេញនៅលើអែបរបស់ក្រសួង ហើយក្រុម​ការងារ​ក្រសួង​នឹង​ជូន​ដំណឹង​ទៅ​បងប្អូនវិញ។

រាជរដ្ឋាភិបាលដែលមានក្រសួងការងារ និងបណ្ដុះបណ្ដាលវិជ្ជាជីវៈជាសេនាធិការ តែងតែលើកទឹកចិត្តបងប្អូន និងប្រជាពលរដ្ឋដែលស្វែងរកឱកាសការងារនៅក្រៅប្រទេស ត្រូវតែពិនិត្យពិចារណាទៅលើព័ត៌មានគ្រប់ជ្រុងជ្រោយពីការងារនោះឱ្យបានច្បាស់លាស់ជាមុន ជាពិសេសត្រូវស្គាល់ក្រុមហ៊ុនដែលមានច្បាប់ និងមានអាជ្ញាប័នត្រឹមត្រូវ។

ក្រសួងការងារ បានស្នើឱ្យបងប្អូនឈប់ជាបន្ទាន់ក្នុងការចេញទៅធ្វើការងារនៅក្រៅប្រទេសដោយខុសច្បាប់។ ក្នុងករណីមានការបបួល ឬលួងលោមពីសំណាក់មេខ្យល់ ដើម្បីចេញទៅធ្វើការដោយខុសច្បាប់ សូមរាយការណ៍ជូនសមត្ថកិច្ច ឬអាជ្ញាធរមូលដ្ឋានជាបន្ទាន់ ដើម្បីមានវិធានការច្បាប់ចំពោះជនល្មើសទាំងនោះ។

បច្ចុប្បន្ននេះមានតែភ្នាក់ងារជ្រើសរើសឯកជនដែលបានចុះបញ្ជីការជាមួយក្រសួងការងារ និងបណ្តុះបណ្តាលវិជ្ជាជីវៈប៉ុណ្ណោះ ដែលមានសិទ្ធិបញ្ជូនពលករខ្មែរទៅធ្វើការនៅក្រៅប្រទេសដោយស្របច្បាប់បាន ក្រៅពីនោះគឺជាការបញ្ជូនពលករដោយខុសច្បាប់។ ទន្ទឹមនេះ ក្រសួងបានព្រមានពីវិធានការផ្លូវច្បាប់យ៉ាងតឹងរ៉ឹង ប្រសិនបើរកឃើញថាមានបុគ្គល ឬទីភ្នាក់ងារណាមួយដែលបានបញ្ជូនពលករទៅធ្វើការនៅក្រៅប្រទេសដោយខុសច្បាប់។

ជុំវិញព័ត៌មានផ្សេងៗពាក់ព័ន្ធនឹងការទៅធ្វើការងារនៅក្រៅប្រទេសដោយស្របច្បាប់ ក្រសួងការងារ បានអំពាវនាវដល់បងប្អូន ប្រជាពលរដ្ឋអាចទាក់ទងផ្ទាល់មកក្រសួង ឬមន្ទីរការងារ និងបណ្តុះបណ្តាលវិជ្ជាជីវៈរាជធានី ខេត្ត ឬ ទូរស័ព្ទមកលេខ ១២៩៧ ឬ ១២៨៦៕