ពលរដ្ឋខេត្តស្វាយរៀងសម្ដែងសុទិដ្ឋិនិយមចំពោះរដ្ឋបាលខេត្តដែលបានស្ថាបនាផ្លូវតាមខ្សែបន្ទាត់ព្រំដែន

ស្វាយរៀង ៖ ផ្លូវបេតុងឆ្អឹកដែក១ខ្សែប្រវែងជាង១០គីឡូម៉ែត្រ ស្ថិតនៅតាមខ្សែបន្ទាត់ព្រំដែនត្រង់បង្គោលព្រំដែនលេខ១៧១ ឆ្ពោះទៅបង្គោលព្រំដែនលេខ១៧៥ លាតសន្ធឹងក្នុងសង្កាត់បាវិត ក្រុងបាវិត ខេត្តស្វាយរៀង ប្រវែងជាង៥គីឡូម៉ែត្រ ឆ្លងកាត់ទៅសង្កាត់បាទី ប្រវែងជាង៧គីឡូម៉ែត្រ ប្រើប្រាស់ថវិការបស់សប្បុរសជន តាមរយះឯកឧត្តម​ ប៉េង ពោធិសា អភិបាលខេត្ត ត្រូវបានចាប់ផ្តើមចាក់បេតុងជាបណ្តើរ និងឈានទៅដាក់អោយពលរដ្ឋ ប្រើប្រាស់នៅពេលឆាប់ៗខាងមុខនេះហើយ ។

លោក លឹម សៀងហេង អភិបាលក្រុងបាវិត នៅថ្ងៃទី១១ ខែកុម្ភៈ ឆ្នាំ២០២៥ បានប្រាប់ទូរទស្សន៏ BTV អោយដឹងថា ផ្លូវបេតុងដែលក្រុមការងារស្ថាបនានេះ មានប្រវែង១១គីឡូម៉ែត្រ ស្ថិតនៅលើគ្រឹះផ្លូវខ្សែក្រវ៉ាត់ព្រំដែនលេខ១៧១.និងបង្គោលព្រំដែនលេខ១៧៥ ក្នុងសង្កាត់ចំនួន២របស់ក្រុង រួមមានសង្កាត់បាវិត និងសង្កាត់បាទី ។ លោកបានបញ្ជាក់បន្ថែមថាផ្លូវនេះក្រោយពីស្ថាបនារួច អាចផ្តល់អោយ កម្មករ និងពលរដ្ឋ​ សង្កាត់បាទី ក្រុងបាវិត និងពលរដ្ឋនៅក្នុងឃុំមួយចំនួនរបស់ស្រុកចន្ទ្រា ធើ្វដំណើរ ដឹកជញ្ជូនទំនិញចេញចូលបានមួយភាគធំឆ្ពោះមកក្រុងបាវិត និងតំបន់ផ្សេងៗទៀត បានលឿនហើយរួមចំណែកកាត់បន្ថយសោហ៊ុនចំណាយលើការធ្វើដំណើរនិងដឹកជញ្ជូន ពិសេសបង្ហាញពីការយកចិត្តទុកដាក់របស់រាជរដ្ឋាភិបាលក្នុងកិច្ចការការពារព្រំដែនផងដែរ ។

តំណាងពលរដ្ឋសង្កាត់បាទីក្រុងបាវិត ខេត្តស្វាយរៀងក្នុងពេលចូលរួមពិនិត្យការងារស្ថាបនាផ្លូវ បានមានចំណាប់អារមណ្មសំដែងនូវសុទិដ្ឋិនិយម ចំពោះរាជរដ្ឋាភិបាលសម្ដេចមហាបវរធិបតីហ៊ុន ម៉ាណេត នាយករដ្ឋមន្ត្រី ដែលសម្តេចបានគិតគូរ និងណែនាំដល់រដ្ឋបាលខេត្ត ស្រុក ក្រុង ធ្វើការគៀងគរប្រមូលមូលនិធិ  សម្រាប់ស្ថាបនាផ្លូវដាក់ឲ្យពួកគាត់ប្រើប្រាស់ ខណៈដែលនៅតំបន់នេះជាប់ខ្សែក្រវ៉ាត់ព្រំដែនពុំដែលមានផ្លូវល្អសម្រាប់ប្រើប្រាស់ ក្នុងការធ្វើដំណើរក៏ដូចជាការដឹកកសិផលពីតំបន់មួយទៅតំបន់មួយនោះទេ។សំឡេង…..

សូមបញ្ជាក់បាវិតជាក្រុងដែលរាជរដ្ឋាភិបាលបង្កើតឡើងថ្មី កាត់ចេញពីស្រុកចន្ទ្រាចំនួន៤ឃុំ ​និងស្រុកស្វាយទាបចំនួន១ឃុំ ក្រុងបាវិតស្ថិតនៅខាងកើតខេត្តស្វាយរៀង ដែលមានខ្សែបន្ទាត់ព្រំដែនជាមួយប្រទេសវៀតណាម រាល់ហេដ្ឋារចនាសម្ពន្ទ័រូបវន្ត័ ពិសេសផ្លូវថ្នល់ត្រូវបានរដ្ឋបាលខេត្ត និងរាជរដ្ឋាភិបាលបានចាត់ទុកជាវិសយ័អាទិភាព ខណៈដែលក្រុងទាំងមូលមានកំណើនរោងចក្រសហគ្រាសនិងកម្មករមានការមមាញឹកក្នុងការធ្វើដំណើរនិងដឹកជញ្ជូន​ ។ ដោយ ៖ ភា សារិទ្ធ