ក្រសួងអប់រំ ពង្រីកការផ្ទេរមុខងារ និងហិរញ្ញវត្ថុ សម្រាប់ពង្រឹងគុណភាពអប់រំនៅថ្នាក់មូលដ្ឋាន

នៅថ្ងៃទី១៨ ខែកុម្ភៈនេះ ក្រសួងអប់រំយុវជន និងកីឡាបានរៀបចំសិក្ខាសាលាផ្សព្វផ្សាយ ស្តីពី នីតិវិធីហិរញ្ញវត្ថមានភ្ជាប់លក្ខខណ្ឌទៅឲ្យរដ្ឋបាលក្រុងស្រុកខណ្ឌ សម្រាប់អនុវត្តមុខងារ ការ​គ្រប់​គ្រង​ការ​អប់រំកុមារតូច ការអប់រំបឋមសិក្សា ការអប់រំក្រៅប្រព័ន្ធ និងសម្រាប់​គាំទ្រ​ផ្នែក​រដ្ឋបាល​អនុវត្ត​មុខងារ​អប់រំយុវជន និងកីឡានៅថ្នាក់ក្រុងស្រុកខណ្ឌ។

ឯកឧត្តម អ៊ុង បូរាត រដ្ឋលេខាធិការក្រសួងអប់រំយុវជន និងកីឡា បានថ្លែងថា មក​ដល់​ឆ្នាំ​២០២៥​នេះ ក្រសួងអប់រំយុវជន និងកីឡា បានអនុវត្តជាផ្លូវការ នូវការផ្ទេរធនធានហិរញ្ញវត្ថុ សម្រាប់​អនុវត្ត​មុខ​ងារគ្រប់គ្រងការអប់រំកុមារតូច ការអប់រំបឋមសិក្សា ការអប់រំក្រៅប្រព័ន្ធ និងមុខងារ​ប្រគល់​ភារកិច្ច ទៅឲ្យរដ្ឋបាលក្រុងស្រុកខណ្ឌទាំងអស់ អស់ហើយនៅទូទាំងប្រទេស ហើយ​ថវិកា​សម្រាប់​ដំណើរ​ការគ្រឹះស្ថានមត្តេយ្យសិក្សាសាធារណៈ គ្រឹះស្ថានបឋមសិក្សាសាធារណៈ និងមជ្ឈ​មណ្ឌល​សិក្សា​សហគមន៍ គឺត្រូវបានផ្ទេរត្រង់នៅតាមប្រព័ន្ធធនាគារដដែល និងត្រូវផ្ទេរ ១០០% ជា​ប្រចាំ​។

ឯកឧត្តម អ៊ុង បូរាត បន្តថា ការផ្ទេរធនធនហិរញ្ញវត្ថមានភ្ជាប់លក្ខខណ្ឌនេះ គឺមានគោលដៅបី ដើម្បី​ពង្រឹង​គុណភាពអប់រំនៅថ្នាក់មូលដ្ឋាន រួមមាន៖ ការធនានិរន្ត​ភាព​ក្នុង​ការ​អនុវត្ត​មុខ​ងារ​ដោយ​ការ​ទទួល​ខុសត្រូវ ការលើកកម្ពស់គុណភាព ប្រសិទ្ធភាពអនុវត្តមុខងារ និងការប្រើប្រាស់​ធន​ធាន​ថវិកាដើម្បីដោះស្រាយបញ្ហាដែលកើតឡើង។

លោកស្រី ជា គីម ប្រធាននាយកដ្ឋានហិរញ្ញវត្ថុ ក្រសួងអប់រំយុវជន និងកីឡា បានថ្លែងដែរថា តាម​គោលការណ៍នៃការផ្ទេរមុខងារ បានតម្រូវឱ្យមានការផ្ទេរភ្ជាប់ទៅជាមួយនូវធនធានហិរញ្ញវត្ថុ ធនធាន​មនុស្ស ការរៀបចំនីតិវិធីសម្រាប់ការអនុវត្ត ការអភិវឌ្ឍសមត្ថភាព ការតាម​ដាន​ត្រួត​ពិនិត្យ និងការគាំទ្រផ្នែកបច្ចេកទេស ដើម្បីធានាឱ្យរដ្ឋបាលថ្នាក់ក្រោមជាតិមានលទ្ធភាព សមត្ថ​ភាព​សមស្របក្នុងការគ្រប់គ្រង ចាត់ចែង និងអនុវត្តមុខងារទាំងនោះប្រកបដោយគុណភាព ប្រសិ​ទ្ធ​ភាព តម្លាភាព គណនេយ្យភាព និងស្របតាមស្តង់ដាជាតិដែលបានកំណត់។

សូមបញ្ជាក់ថា នៅក្នុងការផ្ទេរមុខងារអប់រំ យុវជន និងកីឡាទៅឱ្យរដ្ឋបាលក្រុង ស្រុក ខណ្ឌទូទាំង​ប្រទេសនេះ ក្រសួងអប់រំ បាននិងកំពុងរៀបចំ​ផ្ទេរ​បុគ្គលិក​អប់រំ​ជា​គ្រូ​បង្រៀន​ប្រមាណ​ជាង ៦០.០០០ នាក់ ទៅឱ្យរដ្ឋបាលក្រុង ស្រុក ខណ្ឌ ដើម្បីបន្តគ្រប់គ្រង និងប្រើប្រាស់​សម្រាប់​អនុវត្ត​មុខងារដែលបានផ្ទេរ៕ អត្ថបទ ស៊ុម សុខជា