ផ្លូវជាតិលេខ៥ បានមន្ទីរសាធារណការជួសជុលចាក់កៅស៊ូAC ចាប់ពីមុខវិទ្យាល័យសុរាមម្រឹត មកទល់នឹងផ្លូវចូលវត្តធម្មយុត្តិចំងាយប្រមាណជាង១ពាន់ម៉ែត្រ

កំពង់ឆ្នាំង៖ កំណាត់ផ្លូវជាតិលេខ៥ ត្រូវបានមន្ទីរសាធារណការ និងដឹកជញ្ជូន ជួសជុលចាក់កៅស៊ូAC រៀបខឿនបេតុង, រៀបការ៉ូឡា, គូសគំនូសសញ្ញាចរាចរណ៍, ដាំផ្លាកសញ្ញាចរាចរណ៍, និងដាំដុំចំណាំងផ្លាត ចាប់ពីមុខវិទ្យាល័យសុរាមម្រឹត មកទល់នឹងផ្លូវចូលវត្តធម្មយុត្តិចំងាយប្រមាណជាង១ពាន់ម៉ែត្រ ដើម្បីអោយប្រជាពលរដ្ឋ សិស្ស មន្ត្រីរាជការ អ្នកទេសចរណ៍ អ្នករកស៊ីធ្វើដំណើរបានស្រួល និងរហ័សទាន់ចិត្ត និងកុំអោយមានការជន់លិចដោយទឹកភ្លៀងទៀត។

លោក ឆាយ លាភា បានថ្លែងថា៖ ពីមុនកំណាត់ផ្លូវជាតិលេខ៥នេះ មានជង្ហុគទឹករលកពិបាកក្នុងការធ្វើដំណើរ ចំណែកតួផ្លូវត្រូវរងការខូចខាតខ្លាំង ។ កន្លងមកនេះ មន្ទីរសាធារណការ និងដឹកជញ្ជូនខេត្តកំពង់ឆ្នាំង បានដាក់គ្រឿងចក្រចុះជួសជុលចាក់កៅស៊ូAC រៀបខឿនបេតុង, រៀបការ៉ូឡា, គូសគំនូសសញ្ញាចរាចរណ៍, ដាំផ្លាកសញ្ញាចរាចរណ៍, និងដាំដុំចំណាំងផ្លាត ដើម្បីពង្រីកតួផ្លូវអោយបានធំទូលាយចាប់ពីមុខវិទ្យាល័យសុរាមម្រឹត មកទល់នឹងផ្លូវចូលវត្តធម្មយុត្តិចំងាយប្រមាណជាង១ពាន់ម៉ែត្រ ។ ប្រជាពលរដ្ឋរស់នៅតាមបណ្តោយផ្លូវជាតិ១នេះ ក៏ដូចជាអ្នកប្រើប្រាស់ផ្លូវបានសំដែងការត្រេកអរ និងអរគុណដល់សម្តេចធិបតី ហ៊ុន ម៉ាណែត នាយករដ្ឋមន្ត្រី និងឯកឧត្តម ស៊ុន សុវណ្ណារិទ្ធិ អភិបាលខេត្តដែលបានផ្តល់សមិទ្ធិផលថ្មីនេះជូនពួកគាត់។

លោក ឆាយ លាភា បន្តថា៖ គម្រោងការងារថែទាំខួបកំណាត់ផ្លូវជាតិលេខ៥ ដោយក្រាលបេតុងកៅស៊ូAC កម្រាស់០,០៥ម ប្រវែង១ ១២០ម ទទឹង១៣ម, ចាក់បេតុងចិញ្ចើមសងខាងផ្លូវ(ម្ខាង ០,៥ម), រៀបខឿនបេតុង, រៀបការ៉ូឡា, គូសគំនូសសញ្ញាចរាចរណ៍, ដាំផ្លាកសញ្ញាចរាចរណ៍, និងដាំដុំចំណាំងផ្លាត ពីចន្លោះគ.ម៨៧+៦៦០ ដល់គ.ម៨៨+៧៨០ ស្ថិតនៅក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង អនុវត្តការងារដោយមន្ទីរសាធារណការ និងដឹកជញ្ជូនខេត្តកំពង់ឆ្នាំង និងជាគម្រោងឆ្នាំ២០២៥៕ កាំង ហុងវាស្នា