ក្រសួងការងារ៖ គិតត្រឹមថ្ងៃទី១៨ ខែកុម្ភៈ វិស័យសំខាន់ៗចំនួនបី មានតំរូវការកម្លាំង​ពលកម្ម​សរុបជាង ៦ម៉ឺនកន្លែង

ភ្នំពេញ៖ វិស័យធំៗចំនួន៣នៅកម្ពុជា បានប្រកាសតំរូវការកម្លាំងកម្មសរុបចំនួន ៦៧ ៤១៤​កន្លែង ក្នុងនោះមានដូចជា វិស័យឧស្សាហកម្មត្រូវការចំនួន ៥៤ ៥២១កន្លែង, វិស័យសេវាកម្ម ៧ ២៥៤​កន្លែង និងវិស័យកសិកម្មត្រូវការចំនួន ៥ ៦៣៩កន្លែង។

យោង​តាមទីភ្នាក់ងារជាតិមុខរបរ និងការងារ (NEA) នៃក្រសួងការងារ និង​បណ្តុះ​បណ្តាល​វិជ្ជា​ជីវៈ​ នៅថ្ងៃទី១៨ ខែកុម្ភៈ ឆ្នាំ២០២៥នេះ បានអំពាវនាវដល់យុវជន សិស្ស និស្សិត និង​អ្នក​ស្វែង​រក​ការងារ ដែលមានបំណងចង់ស្វែងរកការក្នុងវិស័យទាំង៣ខាងលើនេះ អាចទាក់ទង​ទីភ្នាក់ងារ​ជាតិ​មុខរបរ និងការងារ តាមរយៈទូរស័ព្ទ ១២៩៧ ឬ ១២៨៦ ឬតាមប្រព័ន្ធតេលេក្រាម និង CoolApp លេខ 077 23 23 78 ដើម្បីចុះឈ្មោះ និងសម្ភាសការងារភ្លាមៗ។

សូម​ជម្រាបជូនបន្ថែមថា ពាក់ព័ន្ធតំរូវការកម្លាំងពលកម្មនេះដែរ ក្រុមហ៊ុន សាន់ហ្វ័រ ហ្គាមិន ឯ.ក ក៏​បាន​ប្រកាសផ្តល់ឱកាសការចំនួន ៥ ០០០កន្លែងផងដែរទៅដល់កម្មករ និយោជិតគ្រប់ផ្នែក ជា​មួយ​ការ​ផ្តល់ជូននូវអត្ថប្រយោជន៍ជាច្រើនថែមទៀតទៅកាន់កម្មករ និយោជិត ក្រៅពី​ប្រាក់​ឈ្នួល​ផ្សេង​ៗ​៕