ឯកឧត្តម Anwar Ibrahim ទូរស័ព្ទជាមួយ ឯកឧត្តម ដូណាល់ ត្រាំ ជជែកពីបញ្ហាព្រំដែន កម្ពុជា-ថៃ

ភ្នំពេញ៖ នៅថ្ងៃទី២៥ ខែកញ្ញា ឆ្នាំ២០២៥នេះ ឯកឧត្តម Anwar Ibrahim នាយករដ្ឋមន្ត្រីម៉ាឡេស៊ី និងជាប្រធានប្តូរវេនអាស៊ានឆ្នាំ២០២៥ បានទូរស័ព្ទជាមួយឯកឧត្តមប្រធានាធិបតី ដូណាល់ ត្រាំ ពាក់ព័ន្ធនឹងការដោះស្រាយបញ្ហាព្រំដែនកម្ពុជា និងថៃ។

ឯកឧត្តម Anwar Ibrahim បានសរសេរនៅលើបណ្ដាញសង្គមហ្វេសប៊ុករបស់ឯកឧត្តមថា នៅក្នុងកិច្ចសន្ទនាតាមទូរស័ព្ទជាមួយប្រធានាធិបតី ដូណាល់ ត្រាំ មុននេះបន្តិច ឯកឧត្តម បានបញ្ជាក់ជាថ្មីពីការប្តេជ្ញាចិត្តរបស់ម៉ាឡេស៊ី ក្នុងនាមជាប្រធានអាស៊ាន ដើម្បីបន្តដើរតួនាទីយ៉ាងសកម្មក្នុងការធានាសុខសន្តិភាពក្នុងតំបន់ ជាពិសេសទាក់ទងនឹងបញ្ហាកម្ពុជា-ថៃ។

ឯកឧត្តមបានថ្លែងថា ឯកឧត្តមប្រធានាធិបតី ត្រាំ ទទួលស្គាល់ភាពជោគជ័យរបស់ម៉ាឡេស៊ី ក្នុងការសម្រួលកិច្ចព្រមព្រៀងឈប់បាញ់រវាងកម្ពុជា និងថៃ ជាសមិទ្ធផលដ៏ធំធេង ដែលបង្ហាញពីអធិបតេយ្យភាព និងភាពរឹងមាំរបស់ម៉ាឡេស៊ី, ហើយឯកឧត្តម ក៏បានសរសើរទៅកាន់ឯកឧត្តម ដូណាល់ ត្រាំវិញដែរចំពោះ តួនាទី ដែលសហរដ្ឋអាមេរិកកំពុងតែធ្វើការធានាថាបទឈប់បាញ់គ្នាបានសម្រេច។

ឯកឧត្តម Anwar Ibrahim បានបញ្ជាក់ថា ម៉ាឡេស៊ី ទន្ទឹងរង់ចាំវត្តមានរបស់លោកប្រធានាធិបតី ត្រាំ ក្នុងកិច្ចប្រជុំកំពូលអាស៊ាននៅខែក្រោយ ដែលនឹងក្លាយជាវេទិកាសំខាន់មួយដើម្បីពង្រឹងកិច្ចសហប្រតិបត្តិការ ដើម្បីសន្តិភាព ស្ថិរភាព និងវិបុលភាពក្នុងតំបន់៕