អភិបាលខេត្តឧត្តរមានជ័យ ចុះពិនិត្យសួរសុខទុក្ខដល់ពលរដ្ឋភៀសខ្លួនយប់មិញ

ឧត្តរមានជ័យ៖ នៅថ្ងៃទី២៨ ខែកញ្ញា ឆ្នាំ២០២៥ ឯកឧត្តម មាន ចាន់យ៉ាដា អភិបាលខេត្តឧត្តរមានជ័យអមដំណើរដោយមន្រ្តីក្រុមការងារមួយចំនួនបានអញ្ជើញចុះពិនិត្យ និងសួរសុខទុក្ខដល់បងប្អូនប្រជាពលរដ្ឋដែលបានភៀសខ្លួនពីយប់មិញ ដែលមានការបារម្ភភ័យខ្លាចពីការផ្ទះអាវុធរបស់ទាហានថៃវាយប្រហារសារជាថ្មីមកលើកម្ពុជា ដោយពួកគាត់បានធ្វើដំណើរមករកទីតាំងកន្លែងសុវត្ថិភាពដើម្បីស្នាក់នៅជាបណ្តោះអាសន្ននៅចំណុច សាលាបឋមសិក្សាឈើស្លាប់ ឃុំកោគខ្ពស់ ស្រុកបន្ទាយអំពឹល ខេត្តឧត្តរមានជ័យ។

ឯកឧត្តម មាន ចាន់យ៉ាដា បានប្រសាសន៍អំពាវនាវឱ្យបងប្អូនប្រជាពលរដ្ឋទាំងអស់ត្រូវមានការអត់ធ្មត់ខ្ពស់ និងត្រូវរក្សាសុខភាព អនាម័យ ក្នុងការស្នាក់ជាបណ្តោះនេះឱ្យបានល្អប្រសើរ។ ជាមួយគ្នានេះ ឯកឧត្តម បានបន្តថា ដោយសារតែការឈ្លានពានពីទាហានសៀមម្តងហើយម្តងទៀតមកលើអធិបតីភាពកម្ពុជា កម្ពុជានៅតែរក្សាភាពអត់ធ្មត់ខ្ពស់បំផុត ដើម្បីអនុវត្តគោរពនូវបទឈប់បាញ់។ ប៉ុន្តែភាគីទាហានថៃនៅតែបន្តសកម្មភាពយ៉ាងគគ្លើនរំលោភបំពានម្តងហើយម្តងទៀតមលើកម្ពុជា ធ្វើឱ្យប្រជាពលរដ្ឋស្លូតត្រង់កម្ពុជាដែលរស់នៅតាមបន្ទាត់ព្រំដែនមានបញ្ហាប្រឈមខ្លាំងទៅនឹងសុវត្ថិភាព និងការភ័យខ្លាចរបស់បងប្អូនប្រជាពលរដ្ឋផងដែរ។

ឯកឧត្តម មាន ចាន់យ៉ាដា បានបញ្ជាក់ថា ទោះភាគីទាហានថៃបំពានមកកម្ពុជាយ៉ាងណាក្តី ក៏កម្ពុជានៅតែរក្សាភាពអត់ធ្មត់ខ្ពស់ និងដោះស្រាយបញ្ហាប្រឈមនានាតាមច្បាប់អន្តរជាតិ ដើម្បីរកវិធីសាស្រ្តបញ្ចប់សង្រ្គាម ព្រោះសង្រ្គោមមិនបានផ្តល់ផលចំណេញណាមួយសម្រាប់ប្រទេសទាំងពីរនោះឡើយ។

សូមបញ្ជាក់ថា ភាគីទាហានថៃតែងតែធ្វើការយីយាបង្កការរំខានបំពានដោយការបាញ់ប្រហារមកលើកងទ័ពកម្ពុជាមុន នៅវេលាម៉ោង ៣:៥៨នាទីទាបភ្លឺ ថ្ងៃទី២៨ ខែកញ្ញា ឆ្នាំ២០២៥ នៅព្រំដែនចំណុចប្រាសាទតាមាន់ ដោយការបោកគ្រាប់បែក និងបាញ់កាំភ្លើងធនតូច ខណៈកងទ័ពកម្ពុជាមិនមានការតបតនោះឡើយ ដោយកម្ពុជាបានអនុវត្តគោរពកិច្ចព្រមព្រៀងបទឈប់បាញ់៕

អត្ថបទ៖ ឃិនសារិទ្ធ