ពលរដ្ឋខ្មែរនៅអាម៉េរិកទទូចដល់អន្តរជាតិជំរុញឲ្យថៃគោរពបទឈប់បាញ់ និងដោះលែង​កងទ័ព​កម្ពុជា

បន្ទាប់ពីភាគីថៃបានរំលោភបំពានបទឈប់បាញ់ ពលរដ្ឋ​ខ្មែរ​រស់​នៅ​សហរដ្ឋ​អាម៉េរិក​បាន​ទទូច​ដល់​អន្តរជាតិជំរុញឱ្យភាគីថៃគោរពបទឈប់បាញ់ និងដោះលែងកងទ័ពកម្ពុជាចំនួន១៨រូប ឲ្យ​ត្រឡប់​មកប្រទេសកម្ពុជាវិញ។

តាមរយៈវីឌីអូឃ្លីបដែលBTVទទួលបាន នៅព្រឹកថ្ងៃទី០២ខែតុលានេះ ពលរដ្ឋខ្មែរ​កំពុង​រស់​នៅ​សហរដ្ឋ​អាម៉េរិក បានលើកឡើងថា ប្រទេសកម្ពុជាស្រលាញ់សុខសន្តិភាព មិនដែលបង្ក​ជម្លោះ​ជាមួយ​ប្រទេស​ថៃនោះទេ ម្លោះហើយពួកគេបានទទូចដល់អន្តរជាតិ និងជាពិសេស​តំណាង​រាស្រ្ត​នៅ​សហរដ្ឋអាម៉េរិកជួយជំរុញដល់លោកដូណាល់ ត្រាំ ប្រធានាធិបតីសហរដ្ឋអាម៉េរិក ដាក់​សម្ពោធ​ទៅ​លើប្រទេសថៃ ឲ្យគោរពបទឈប់បាញ់ និងដោះលែងកងទ័ពកម្ពុជាចំនួន១៨រូប ដែល​បាន​ឃុំ​ខ្លួន​នៅប្រទេសថៃ ឲ្យត្រលប់មកប្រទេសកំណើតវិញ។

កាលពីថ្ងៃទី២៧ ខែកញ្ញា ឆ្នាំ២០២៥ ភាគីថៃបានរំលោភបំពានបទឈប់បាញ់ ដោយប្រើ​កាំ​ភ្លើង​ត្បាល់​ និងកាំភ្លើងយន្តបាញ់មកលើទឹកដីកម្ពុជា ខណៈយោធាកម្ពុជាមិនបានតបតវិញនោះទេ ព្រោះ​ប្រទេសកម្ពុជារក្សាគោលជំហរ គោរពបទឈប់បាញ់ និងស្រលាញ់សន្តិភាព។

ដោយ​ឡែក កងទ័ពកម្ពុជាចំនួន១៨រូប ដែលកំពុងឃុំខ្លួននៅប្រទេសថៃ រាជរដ្ឋាភិបាលកម្ពុជា បាន​នឹង​កំពុងធ្វើការយ៉ាងសស្រាក់សស្រាំឥតឈប់ឈរ នូវគ្រប់យន្តការដោះស្រាយ ដើម្បី​ឱ្យ​ភាគី​ថៃ ដោះលែងកងទ័ពកម្ពុជាទាំង១៨រូបនោះ វិលត្រលប់មកវិញឱ្យបានឆាប់រហ័សជាទីបំផុត និង​ដោយ​សុខសុវត្ថិភាព៕ អត្ថបទ៖ទូច សោភ័ណ