ក្រុមហ៊ុនអាកាសចរណ៍ Turkish Airline បើកជើងហោះហើរត្រង់ពីតួគីយ៉េ មកកាន់​រាជ​ធានី​ភ្នំពេញ

ក្រុមហ៊ុនអាកាសចរណ៍ Turkish Airline បានប្រកាស​ជាផ្លូវ​ការ​អំពី​ការ​តភ្ជាប់​ជើង​ហោះ​ហើរ​ត្រង់​ពី​អ៊ីស្តង់ប៊ុល នៃសាធារណរដ្ឋតួគីយ៉េ មកកាន់រាជធានីភ្នំពេញ នៃព្រះរាជាណាចក្រកម្ពុជា។

ជើង​ហោះហើរត្រង់ជាលើកដំបូងពីទីក្រុងអ៊ីស្តង់ប៊ុល សាធារណរដ្ឋTürkiye នេះ បានចុះចត​នៅ​អាកាសយា​នដ្ឋានអន្តរជាតិតេជោនៅរសៀលថ្ងៃទី១១ ខែធ្នូ ឆ្នាំ២០២៥នេះ ដែលបានដឹក​អ្នក​ដំណើរ​សរុប ១០៩នាក់។

នៅក្នុងពិធីសម្ពោធជើងហោះហើរថ្មីនេះ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួល​បន្ទុក​រដ្ឋ​លេខា​ធិការដ្ឋានអាកាសចរស៊ីវិល បានមានប្រសាសន៍ថា ការបើកជើងហោះហើរថ្មីនេះ មិនត្រឹម​តែ​ជា​ព្រឹត្តិការណ៍ដ៏សំខាន់សម្រាប់វិស័យអាកាសចរណ៍របស់កម្ពុជាទេ ប៉ុន្តែក៏ជានិមិត្ត​រូប​នៃ​ទំនាក់​ទំនង​មិត្តភាព និងកិច្ចសហប្រតិបត្តិការដ៏ស៊ីជម្រៅរវាងកម្ពុជា និងទួរគីផងដែរ។

ឯកឧត្តម​បណ្ឌិត ម៉ៅ ហាវណ្ណាល់ បានបញ្ជាក់​បន្ថែម​ទៀត​ថា​ការ​ដាក់​ឱ្យប្រើប្រាស់ជើងហោះហើរដែលបានគ្រោងទុករបស់ក្រុមហ៊ុនអាកាសចរណ៍ទួរគីនឹងដើរតួយ៉ាងសំខាន់ក្នុងការពង្រឹងការតភ្ជាប់របស់កម្ពុជាទៅកាន់អឺរ៉ុប និងក្រៅប្រទេស ពង្រីកជម្រើសនៃការធ្វើដំណើរសម្រាប់ភ្ញៀវទេសចរអន្តរជាតិដែលចូលមកកម្ពុជា, គាំទ្រដល់កំណើននៃការផ្លាស់ប្តូរអាជីវកម្ម និងកិច្ចសហប្រតិបត្តិការសេដ្ឋកិច្ច; និងពង្រឹងវត្តមានរបស់កម្ពុជាក្នុងបណ្តាញអាកាសចរណ៍ពិភពលោក។

ជើងហោះហើរត្រង់ពីអ៊ីស្តង់ប៊ុល នៃសាធារណរដ្ឋតួគីយ៉េ មកកាន់រាជធានីភ្នំពេញ នៃព្រះរាជាណាចក្រកម្ពុជា នឹងបើកដំណើរការ៣ដង ក្នុងមួយសប្តាហ៍ ដោយប្រើយន្តហោះ Boeing 777-300ER ។

ក្រុមហ៊ុនអាកាសចរណ៍ទួរគី ជាក្រុមហ៊ុនអាកាសចរណ៍ទី៣៦ ដែលប្រតិបត្តិការក្នុង និងក្រៅប្រទេសកម្ពុជា។ គិតមកដល់ពេលនេះ កម្ពុជាអាចភ្ជាប់ការហោះហើរដោយផ្ទាល់ទៅកាន់ទីក្រុងចំនួន៤៦ នៅលើពិភពលោក និង ១៧ប្រទេសដោយការដឹកជញ្ជូនតាមផ្លូវអាកាស។

សូមជម្រាបជូនថា ពិធីសម្ពោធការហោះហើរត្រង់របស់តួគីយ៉េ មានការអញ្ជើញចូលរួមពី លោកជំទាវ Ülkü Kocaefe ឯកអគ្គរដ្ឋទូតនៃសាធារណៈរដ្ឋតួគីយ៉េ (Türkiye) ប្រចាំនៅកម្ពុជា , ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍, លោក Bilal Ekşi នាយកប្រតិបត្តិក្រុមហ៊ុនអាកាសចរណ៍ទួរគី, អ្នកឧកញ៉ា ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) និងភ្ញៀវកិត្តិយសជាច្រើនរូបផ្សេងទៀត៕