មកទល់ថ្ងៃនេះយោធាថៃនៅបន្តបាញ់ប្រហារចូលដែនអធិបតេយ្យកម្ពុជាក្នុងភូមិសាស្រ្ដភូមិភាគទី៤ និងទី៥

ភ្នំពេញ ៖ គិតមកទល់រសៀលថ្ងៃទី១៧ ខែធ្នូ ឆ្នាំ២០២៥នេះ គឺមានរយៈពេល ១១ ថ្ងៃហើយ ដែលយោធាថៃបានបើកការបាញ់ប្រហារយ៉ាងកំរោលចូលឈ្លានពានដែនអធិបតេយ្យភាពកម្ពុជាដោយមិនរើសគោលដៅ ខណៈនៅថ្ងៃនេះ ស្ថានភាពនៅទិសដៅយោធភូមិភាគទី៤ និងទី៥ យោធាថៃនៅបន្តធ្វើការបាញ់ប្រហារចូលមកភូមិសាស្រ្ដខេត្តព្រះវិហារ និងឧត្តរមានជ័យ និងបន្ទាយមានជ័យ ដោយបាញ់បផ្លោងចូលតាំងសំខាន់ៗមួយចំនួន ខណៈកងកម្លាំងកម្ពុជាបន្តឈរឈើងយ៉ាងរឹងមាំដើម្បីការពារបូរណភាពទឹកដីមិនឱ្យសត្រូវឈ្លានពានបានឡើយ។

​លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជា បានបញ្ជាក់តាមរយៈសន្និសីទសារព័ត៌មាននៅរសៀលនេះថា គិតត្រឹមម៉ោង ៥ល្ងាច ថ្ងៃទី១៧ ខែធ្នូ ឆ្នាំ២០២៥នេះ សមរភូមិទិសឧត្តរមានជ័យ, បន្ទាយមានជ័យ និងព្រះវិហារ កម្លាំងទាហានឈ្លានពានសៀមនៅតែបន្ដបាញ់ផ្លោង និងប្រើប្រាស់ដ្រូនទម្លាក់គ្រាប់បែក ក្នុងនោះ កងទ័ពថៃបន្តបាញ់ប្រហារមកលើកម្ពុជា ដោយប្រើកាំភ្លើងធំ, ដ្រូនពាំក្បាល រថក្រោះ និងកម្លាំងថ្មើរជើង តែកម្លាំងកម្ពុជានៅតែមោះមុតតស៊ូប្រយុទ្ធយ៉ាងស្វិតស្វាញដើម្បីការពារដែនអធិបតេយ្យភាពកម្ពុជាមិនឱ្យសត្រូវចូលឈ្លានពានឡើយ។ អ្នកនាំពាក្យបានឱ្យដឹងដែរថា ស្ថានភាពនៅភូមិសាស្រ្ដផ្សេងទៀត ដូចជានៅភូមិថ្មដាជាដើម មានភាពស្ងប់ស្ងាត់ ប៉ុន្ដែកងកម្លាំងកម្ពុជានៅតែមានការប្រុងប្រយ័ត្នខ្ពស់ជានិច្ច។

អ្នកនាំពាក្យក្រសួងការពារជាតិកម្ពុជា បញ្ជាក់ជាថ្មីថា គោលដៅនៃការវាយការពារខ្លួនរបស់កម្ពុជា គឺផ្ដោតតែលើគោលដៅយោធាថៃប៉ុណ្ណោះ មិនសំដៅលើគោលដៅជនស៊ីវិល ឬទីកន្លែងស៊ីវិលណាមួយឡើយ ប៉ុន្ដែមានតែភាគថៃទេដែលធ្វើការវាយប្រហារមកលើទីតាំងប្រជាជនស៊ីវិលរបស់កម្ពុជាដោយមិនរើសមុខ និងមិនរើសគោលដៅ ដោយបានធ្វើឱ្យជនស៊ីវិលកម្ពុជាបាត់បង់ជីវិត។ កម្ពុជាបន្តអំពាវនាវដល់សហគមន៍អន្តរជាតិថ្កោលទៅសយ៉ាងម៉ឹងម៉ាត់ចំពោះភាគីថៃដែលបានរំលោភលើសេចក្ដីថ្លែងការណ៍រួមស្ដីពីកិច្ចព្រមព្រៀងសន្ដិភាពរវាងកម្ពុជា-ថៃ និងសកម្មភាពឧក្រិដ្ឋកម្មសង្គ្រាមខុសច្បាប់របស់ថៃម្ដងហើយម្ដងទៀតមកលើកម្ពុជានេះ ដោយទាមទារឱ្យថៃទទួលខុសត្រូវទាំងស្រុងចំពោះការរំលោភបំពានដ៏កំរោលនេះ។