អ្នកនយោបាយ អំពាវនាវពលរដ្ឋរួបរួមគ្នាការពារសន្តិភាព ស្ថិរភាព ដើម្បីឱ្យកម្ពុជាចាកផុតពីសង្គ្រាម

ភ្នំពេញ៖ ក្នុងទិវាជ័យជម្នះ ៧ មករា អ្នកនយោបាយ អំពាវនាវប្រជាពលរដ្ឋត្រូវរួបរួមគ្នាការពារសន្តិភាព ស្ថិរភាព ដើម្បីឱ្យប្រទេសកម្ពុជាចាកផុតពីសង្គ្រាម។

ក្នុងឱកាសអបអរសាទរខួប៤៧ឆ្នាំ ទិវាជ័យជម្នះ ៧ មករា ១៩៧៩-៧ មករា ២០២៦ ដែលត្រូវបានចាត់ទុកជាថ្ងៃកំណើតទី២របស់ប្រជាជនខ្មែរបានរួចផុតពីរបបប្រល័យពូជសាសន៍ ប៉ុល ពតនោះ មានបណ្តាអ្នកនយោបាយ បានលើកឡើងថា របបប្រល័យពូជសាសន៍ ប៉ុល ពត គឺជាប្រវត្តិសាស្រ្តមួយក្នុងចំណោមប្រវត្តិសាស្រ្តផ្សេងទៀត ដែលប្រជាជនខ្មែរចងចាំ និងឈឺចាប់បំផុតចំពោះការស្លាប់យ៉ាងរង្គាល និងការព្រាត់ព្រាសបងប្អូនសាច់ញាតិ។

ឯកឧត្តម អ៊ុន វិសិទ្ធគុន ប្រធានគណបក្សកម្លាំងប្រជាធិបតេយ្យ លើកឡើងថា ទិវាជ័យជម្នះ ៧ មករា ១៩៧៩ គឺថ្ងៃដែលប្រជាជនគ្រប់រូបបានចាប់ផ្តើមស្គាល់ពន្លឺនៃការរស់រានជាថ្មី ដែលកត្តានេះ ក្នុងនាមរូបលោកជាអ្នកនយោបាយ សូមអំពាវនាវដល់ប្រជាពលរដ្ឋគ្រប់ទិសទីត្រូវចូលរួមការពារសន្តិភាព និងស្ថិរភាពឱ្យបាន ដោយសារប្រទេសកម្ពុជាមិនត្រូវការសង្គ្រាមកើតឡើងទៀតនោះទេ។

ជាមួយគ្នា លោកជំទាវ ពោធិតី សាវត្ថី ប្រធានគណបក្សធម្មាធិបតេយ្យ លើកឡើងថា ការបង្រួបបង្រួមរបស់ប្រជាពលរដ្ឋគឺជាគ្រឹះដ៏រឹងមាំ ហើយបន្តជឿជាក់លើការដឹកនាំរបស់ថ្នាក់ដឹកនាំ ជាពិសេសសូមអំពាវនាវប្រជាពលរដ្ឋមិនត្រូវជឿលើការញុះញង់ បំបែកបំបាក់ ដែលរារាំងដល់ការបង្រួបបង្រួម។

សូមជម្រាបថា ជារៀងរាល់ឆ្នាំ ក្នុងឱកាសអបអរសាទរ ទិវាជ័យជម្នះ ៧ មករា ប្រជាពលរដ្ឋខ្មែរគ្រប់និន្នាការ ក៏ដូចជាក្នុង និងក្រៅប្រទេស តែងតែប្រារព្ធឡើងដើម្បីរំលឹកដល់ការធ្វើឱ្យប្រជាជាតិខ្មែរបានរស់រានមានជីវិតឡើងវិញទាន់ពេលវេលា រួចផុតពីទារុណកម្ម និងអំពើកាប់សម្លាប់ដ៏សាហាវយង់ឃ្នងបំផុត។ លើសពីនេះ ការរៀបចំខួបទិវាជ័យជម្នះ មានគោលបំណងសំខាន់សម្រាប់ឱ្យយុវជនគួរស្វែងយល់ពីប្រវត្តិសាស្ត្រឱ្យបានច្បាស់មុននឹងជឿជាក់លើព្រឹត្តិការណ៍អ្វីមួយដែលអាចឈានដល់បង្កជាវិនាសកម្មដល់សង្គមជាតិ៕