សម្តេចធិបតី អំពាវនាវប្រទេសជាមិត្ត និងដៃគូអភិវឌ្ឍន៍បន្តជួយកម្ពុជា ដោះស្រាយការលំបាកកើតពីសង្គ្រាមកម្ពុជា-ថៃ

តាមរយៈសារពិសេសនាយប់ថ្ងៃទី១០ ខែមករា ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពាវនាវដល់ប្រទេសជាមិត្ត និងអង្គការដៃគូអភិវឌ្ឍន៍ទាំងអស់ បន្តជួយដល់កម្ពុជាដោះស្រាយការលំបាកទាំងឡាយកើតពីសង្គ្រាមកម្ពុជា-ថៃ។

ក្នុងសារពិសេសនេះ ក្រៅពីបង្ហាញនូវវិធានការដោះស្រាយផលប៉ះពាល់នានាកើតចេញពីសង្គ្រាមកម្ពុជា-ហើយនោះ សម្តេចធិបតី បានថ្លែងអំណរគុណដល់រដ្ឋាភិបាលចិន រដ្ឋាភិបាលសហរដ្ឋអាមេរិក ធនាគារអភិវឌ្ឍន៍អាស៊ី ADB បណ្តាប្រទេសជាមិត្ត និងដៃគូអភិវឌ្ឍន៍ដទៃទៀត ដែលបានផ្តល់ជំនួយជាសម្ភារ និងហិរញ្ញប្បទានដល់រាជរដ្ឋាភិបាលកម្ពុជា ដើម្បីជួយសម្រាលទុក្ខលំបាក និងដោះស្រាយបញ្ហានានាដល់ជនភៀសសឹក ជាពិសេសការស្តារជីវភាពរស់នៅរបស់ជនភៀសសឹកនៅពេលត្រឡប់ទៅកាន់លំនៅឋានវិញ និងការជួសជុលស្តារហេដ្ឋារចនាសម្ព័ន្ធចាំបាច់ ជាពិសេសសាលារៀន និងមណ្ឌលសុខភាព។

សម្តេចធិបតី នាយករដ្ឋមន្រ្ដីក៏សង្ឃឹមថា ប្រទេសជាមិត្ត និងដៃគូអភិវឌ្ឍន៍ដទៃទៀត នឹងបន្តជួយដល់កិច្ចដំណើរការរបស់កម្ពុជា ឆ្ពោះទៅរកប្រក្រតីភាពឡើងវិញ ជាពិសេសនៅក្នុងការស្តារហេដ្ឋារចនាសម្ព័ន្ធចាំបាច់ និងលើកស្ទួយជីវភាពរបស់ប្រជាពលរដ្ឋ ដែលបានរងផលប៉ះពាល់ពីជម្លោះព្រំដែន៕